తరేయుస్సంసారం కథమగతపారం సురజనాః
కథం భావాత్మానం హరిమనుసరేయుశ్చ సరసాః |
కథం వా మాహాత్ంయం నిజహృది నయేయుర్వ్రజభువాం
భవేదావిర్భావో యది న భువి వాగీశ భవతః || 1 ||
శ్రయేయుస్సన్మార్గం కథమనుభవేయుస్సుఖకరం
కథం వా సర్వస్వం నిజమహహ కుర్యుశ్చ సఫలం |
త్యజేయుః కర్మాదేః ఫలమపి కథం దుఃఖసహితాః
భవేదావిర్భావో యది న భువి వాగీశ భవతః || 2 ||
వదేయుస్సద్వాదం కథమపహరేయుశ్చ కుమతిం
కథం వా సద్బుద్ధిం భగవతి విదధ్యుః కృతిధియః |
కథం లోకాస్తాపం సపది శమయేయుశ్శమయుతా
భవేదావిర్భావో యది న భువి వాగీశ భవతః || 3 ||
వ్రజేయుర్విశ్వాసం పరమఫలనిస్సాధనపథే
కథం వేదాలోకాజ్జగతి విచరేయుర్గతభయాః |
కథం లీలాస్సర్వాస్సదసి కథయేయుః ప్రముదితా
భవేదావిర్భావో యది న భువి వాగీశ భవతః || 4 ||
స్మరేయుస్సద్భావం కథమఖిలలీలాముతవిభో
రసం తత్వం రూపే కథమపి చ జానీయురఖిలాః |
కథం వా గాయేయుర్గణ గణమిహా లౌకికరసా
భవేదావిర్భావో యది న భువి వాగీశ భవతః || 5 ||
పఠేయుః శ్రీకృష్ణోదితమథపురాణం నియమితాః
కథం తస్యాప్యర్థం నిజహృదిధరేయుర్ధృతియుతాః |
కథం వా గోపీశం సదయముపజేపుః ఫలతయా
భవేదావిర్భావో యది న భువి వాగీశ భవతః || 6 ||
వహేయుస్స్వం ధర్మం కథమితరసంబంధరహితం
సహేయుః పారుష్యం కథమసురసంబంధివచసాం |
దహేయుస్స్వాన్దోషాన్ కథమిహ వినా సాధనబలం
భవేదావిర్భావో యది న భువి వాగీశ భవతః || 7 ||
జయేయుర్దుర్జేయాన్ దనుజమనుజాతానపి కథం
కథం వా మార్గీయం ఫలముపదిశేయుశ్చ పరమం |
కథం వైగచ్ఛేయుశ్శరణమతిభావేన సతతం
భవేదావిర్భావో యది న భువి వాగీశ భవతః || 8 ||
ఇతి శ్రీహరిరాయాచార్య విరచితం శ్రీవల్లభభావాష్టకం |