నవగ్రహాణాం సర్వేషాం సూర్యాదీనాం పృథక్ పృథక్ |
పీడా చ దుస్సహా రాజన్ జాయతే సతతం నృణాం || 1 ||
పీడానాశాయ రాజేంద్ర నామాని శృణు భాస్వతః |
సూర్యాదీనాం చ సర్వేషాం పీడా నశ్యతి శృణ్వతః || 2 ||
ఆదిత్యః సవితా సూర్యః పూషార్కః శీఘ్రగో రవిః |
భగస్త్వష్టాఽర్యమా హంసో హేలిస్తేజోనిధిర్హరిః || 3 ||
దిననాథో దినకరః సప్తసప్తిః ప్రభాకరః |
విభావసుర్వేదకర్తా వేదాంగో వేదవాహనః || 4 ||
హరిదశ్వః కాలవక్త్రః కర్మసాక్షీ జగత్పతిః |
పద్మినీబోధకో భానుర్భాస్కరః కరుణాకరః || 5 ||
ద్వాదశాత్మా విశ్వకర్మా లోహితాంగస్తమోనుదః |
జగన్నాథోఽరవిందాక్షః కాలాత్మా కశ్యపాత్మజః || 6 ||
భూతాశ్రయో గ్రహపతిః సర్వలోకనమస్కృతః |
జపాకుసుమసంకాశో భాస్వానదితినందనః || 7 ||
ధ్వాంతేభసింహః సర్వాత్మా లోకనేత్రో వికర్తనః |
మార్తాండో మిహిరః సూరస్తపనో లోకతాపనః || 8 ||
జగత్కర్తా జగత్సాక్షీ శనైశ్చరపితా జయః |
సహస్రరశ్మిస్తరణిర్భగవాన్భక్తవత్సలః || 9 ||
వివస్వానాదిదేవశ్చ దేవదేవో దివాకరః |
ధన్వంతరిర్వ్యాధిహర్తా దద్రుకుష్ఠవినాశనః || 10 ||
చరాచరాత్మా మైత్రేయోఽమితో విష్ణుర్వికర్తనః |
లోకశోకాపహర్తా చ కమలాకర ఆత్మభూః || 11 ||
నారాయణో మహాదేవో రుద్రః పురుష ఈశ్వరః |
జీవాత్మా పరమాత్మా చ సూక్ష్మాత్మా సర్వతోముఖః || 12 ||
ఇంద్రోఽనలో యమశ్చైవ నైరృతో వరుణోఽనిలః |
శ్రీద ఈశాన ఇందుశ్చ భౌమః సౌంయో గురుః కవిః || 13 ||
శౌరిర్విధుంతుదః కేతుః కాలః కాలాత్మకో విభుః |
సర్వదేవమయో దేవః కృష్ణః కామప్రదాయకః || 14 ||
య ఏతైర్నామభిర్మర్త్యో భక్త్యా స్తౌతి దివాకరం |
సర్వపాపవినిర్ముక్తః సర్వరోగవివర్జితః || 15 ||
పుత్రవాన్ ధనవాన్ శ్రీమాన్ జాయతే స న సంశయః |
రవివారే పఠేద్యస్తు నామాన్యేతాని భాస్వతః || 16 ||
పీడాశాంతిర్భవేత్తస్య గ్రహాణాం చ విశేషతః |
సద్యః సుఖమవాప్నోతి చాయుర్దీర్ఘం చ నీరుజం || 17 ||
ఇతి శ్రీభవిష్యపురాణే శ్రీ ఆదిత్య స్తోత్రం ||