మహాయోగిపీఠస్థలే తుంగభద్రా-
-తటే సూక్ష్మకాశ్యాం సదాసంవసంతీం |
మహాయోగిబ్రహ్మేశవామాంకసంస్థాం
శరచ్చంద్రబింబాం భజే జోగులాంబాం || 1 ||
జ్వలద్రత్నవైడూర్యముక్తాప్రవాల
ప్రవీణ్యస్థగాంగేయకోటీరశోభాం |
సుకాశ్మీరరేఖాప్రభాఖ్యాం స్వఫాలే
శరచ్చంద్రబింబాం భజే జోగులాంబాం || 2 ||
స్వసౌందర్యమందస్మితాం బిందువక్త్రాం
రసత్కజ్జలాలిప్త పద్మాభనేత్రాం |
పరాం పార్వతీం విద్యుదాభాసగాత్రీం
శరచ్చంద్రబింబాం భజే జోగులాంబాం || 3 ||
ఘనశ్యామలాపాదసంలోక వేణీం
మనః శంకరారామపీయూషవాణీం |
శుకాశ్లిష్టసుశ్లాఘ్యపద్మాభపాణీం
శరచ్చంద్రబింబాం భజే జోగులాంబాం || 4 ||
సుధాపూర్ణ గాంగేయకుంభస్తనాఢ్యాం
లసత్పీతకౌశేయవస్త్రాం స్వకట్యాం |
గలేరత్నముక్తావలీపుష్పహారాం
శరచ్చంద్రబింబాం భజే జోగులాంబాం || 5 ||
శివాం శాంకరీం సర్వకల్యాణశీలాం
భవానీం భవాంభోనిధేర్దివ్యనౌకాం |
కుమారీం కులోత్తారణీమాదివిద్యాం
శరచ్చంద్రబింబాం భజే జోగులాంబాం || 6 ||
చలత్కింకిణీం నూపురాపాదపద్మాం
సురేంద్రైర్మృగేంద్రైర్మహాయోగిబృందైః |
సదా సంస్తువంతీం పరం వేదవిద్భిః
శరచ్చంద్రబింబాం భజే జోగులాంబాం || 7 ||
హరేః సోదరీం హవ్యవాహస్వరూపాం
ప్రసన్నాం ప్రపన్నార్తిహంత్రీం ప్రసిద్ధాం |
మహాసిద్ధిబుద్ధ్యాదివంద్యాం పరేశీం
శరచ్చంద్రబింబాం భజే జోగులాంబాం || 8 ||
ఇదం జోగులాంబాష్టకం యః పఠేద్వా
ప్రభాతే నిశార్ధేఽథవా చిత్తశుద్ధిః |
పృథివ్యాం పరం సర్వభోగాంశ్చ భుక్త్వా
శ్రియం ముక్తిమాప్నోతి దివ్యాం ప్రసిద్ధః || 9 ||