Ganga stotram in telugu pdf download – గంగా స్తోత్రం

దేవి సురేశ్వరి భగవతి గంగే
త్రిభువనతారిణి తరళతరంగే |
శంకరమౌళివిహారిణి విమలే
మమ మతిరాస్తాం తవ పదకమలే || 1 ||
భాగీరథిసుఖదాయిని మాత-
-స్తవ జలమహిమా నిగమే ఖ్యాతః |
నాహం జానే తవ మహిమానం
పాహి కృపామయి మామజ్ఞానం || 2 ||
హరిపదపాద్యతరంగిణి గంగే
హిమవిధుముక్తాధవళతరంగే |
దూరీకురు మమ దుష్కృతిభారం
కురు కృపయా భవసాగరపారం || 3 ||
తవ జలమమలం యేన నిపీతం
పరమపదం ఖలు తేన గృహీతం |
మాతర్గంగే త్వయి యో భక్తః
కిల తం ద్రష్టుం న యమః శక్తః || 4 ||
పతితోద్ధారిణి జాహ్నవి గంగే
ఖండితగిరివరమండిత భంగే |
భీష్మజనని హే మునివరకన్యే
పతితనివారిణి త్రిభువనధన్యే || 5 ||
కల్పలతామివ ఫలదాం లోకే
ప్రణమతి యస్త్వాం న పతతి శోకే |
పారావారవిహారిణి గంగే
విముఖయువతికృతతరళాపాంగే || 6 ||
తవ చేన్మాతః స్రోతః స్నాతః
పునరపి జఠరే సోఽపి న జాతః |
నరకనివారిణి జాహ్నవి గంగే
కలుషవినాశిని మహిమోత్తుంగే || 7 ||
పునరసదంగే పుణ్యతరంగే
జయ జయ జాహ్నవి కరుణాపాంగే |
ఇంద్రముకుటమణిరాజితచరణే
సుఖదే శుభదే భృత్యశరణ్యే || 8 ||
రోగం శోకం తాపం పాపం
హర మే భగవతి కుమతికలాపం |
త్రిభువనసారే వసుధాహారే
త్వమసి గతిర్మమ ఖలు సంసారే || 9 ||
అలకానందే పరమానందే
కురు కరుణామయి కాతరవంద్యే |
తవ తటనికటే యస్య నివాసః
ఖలు వైకుంఠే తస్య నివాసః || 10 ||
వరమిహ నీరే కమఠో మీనః
కిం వా తీరే శరటః క్షీణః |
అథవా శ్వపచో మలినో దీన-
-స్తవ న హి దూరే నృపతికులీనః || 11 ||
భో భువనేశ్వరి పుణ్యే ధన్యే
దేవి ద్రవమయి మునివరకన్యే |
గంగాస్తవమిమమమలం నిత్యం
పఠతి నరో యః స జయతి సత్యం || 12 ||
యేషాం హృదయే గంగాభక్తి-
-స్తేషాం భవతి సదా సుఖముక్తిః |
మధురాకాంతా పంఝటికాభిః
పరమానందకలితలలితాభిః || 13 ||
గంగాస్తోత్రమిదం భవసారం
వాంఛితఫలదం విమలం సారం |
శంకరసేవకశంకరరచితం
పఠతి సుఖీ స్తవ ఇతి చ సమాప్తః || 14 ||
ఇతి శ్రీమచ్ఛంకరాచార్య కృతం శ్రీ గంగా స్తోత్రం |