వామనోఽసి త్వమంశేన మత్పితుర్యజ్ఞభిక్షుకః |
రాజ్యహర్తా చ శ్రీహర్తా సుతలస్థలదాయకః || 1 ||
బలిభక్తివశో వీరః సర్వేశో భక్తవత్సలః |
శీఘ్రం త్వం హింధి మాం పాపం శాపాద్గర్దభరూపిణం || 2 ||
మునేర్దుర్వాససః శాపాదీదృశం జన్మ కుత్సితం |
మృత్యురుక్తశ్చ మునినా త్వత్తో మమ జగత్పతే || 3 ||
షోడశారేణ చక్రేణ సుతీక్ష్ణేనాతితేజసా |
జహి మాం జగతాం నాథ సద్భక్తిం కురు మోక్షద || 4 ||
త్వమంశేన వరాహశ్చ సముద్ధర్తుం వసుంధరాం |
వేదానాం రక్షితా నాథ హిరణ్యాక్షనిషూదనః || 5 ||
త్వం నృసింహః స్వయం పూర్ణో హిరణ్యకశిపోర్వధే |
ప్రహ్లాదానుగ్రహార్థాయ దేవానాం రక్షణాయ చ || 6 ||
త్వం చ వేదోద్ధారకర్తా మీనాంశేన దయానిధే |
నృపస్య జ్ఞానదానాయ రక్షాయై సురవిప్రయోః || 7 ||
శేషాధారశ్చ కూర్మస్త్వమంశేన సృష్టిహేతవే |
విశ్వాధారశ్చ విశ్వస్త్వమంశేనాపి సహస్రధృత్ || 8 ||
రామో దాశరథిస్త్వం చ జానక్యుద్ధారహేతవే |
దశకంధరహంతా చ సింధౌ సేతువిధాయకః || 9 ||
కలయా పరశురామశ్చ జమదగ్నిసుతో మహాన్ |
త్రిఃసప్తకృత్వో భూపానాం నిహంతా జగతీపతే || 10 ||
అంశేన కపిలస్త్వం చ సిద్ధానాం చ గురోర్గురుః |
మాతృజ్ఞానప్రదాతా చ యోగశాస్త్రవిధాయకః || 11 ||
అంశేన జ్ఞానినాం శ్రేష్ఠౌ నరనారాయణావృషీ |
త్వం చ ధర్మసుతో భూత్వా లోకవిస్తారకారకః || 12 ||
అధునా కృష్ణరూపస్త్వం పరిపూర్ణతమః స్వయం |
సర్వేషామవతారాణాం బీజరూపః సనాతనః || 13 ||
యశోదాజీవనో నిత్యో నందైకానందవర్ధనః |
ప్రాణాధిదేవో గోపీనాం రాధాప్రాణాధికప్రియః || 14 ||
వసుదేవసుతః శాంతో దేవకీదుఃఖభంజనః |
అయోనిసంభవః శ్రీమాన్ పృథివీభారహారకః || 15 ||
పూతనాయై మాతృగతిం ప్రదాతా చ కృపానిధిః |
బకకేశిప్రలంబానాం మమాపి మోక్షకారకః || 16 ||
స్వేచ్ఛామయ గుణాతీత భక్తానాం భయభంజన |
ప్రసీద రాధికానాథ ప్రసీద కురు మోక్షణం || 17 ||
హే నాథ గార్దభీయోనేః సముద్ధర భవార్ణవాత్ |
మూర్ఖస్త్వద్భక్తపుత్రోఽహం మాముద్ధర్తుం త్వమర్హసి || 18 ||
వేదా బ్రహ్మాదయో యం చ మునీంద్రాః స్తోతుమక్షమాః |
కిం స్తౌమి తం గుణాతీతం పురా దైత్యోఽధునా ఖరః || 19 ||
ఏవం కురు కృపాసింధో యేన మే న భవేజ్జనుః |
దృష్ట్వా పాదారవిందం తే కః పునర్భవనం వ్రజేత్ || 20 ||
బ్రహ్మా స్తోతా ఖరః స్తోతా నోపహాసితుమర్హసి |
సదీశ్వరస్య విజ్ఞస్య యోగ్యాయోగ్యే సమా కృపా || 21 ||
ఇత్యేవముక్త్వా దైత్యేంద్రస్తస్థౌ చ పురతో హరేః |
ప్రసన్నవదనః శ్రీమానతితుష్టో బభూవ హ || 22 ||
ఇదం దైత్యకృతం స్తోత్రం నిత్యం భక్త్యా చ యః పఠేత్ |
సాలోక్యసార్ష్టిసామీప్యం లీలయా లభతే హరేః || 23 ||
ఇహ లోకే హరేర్భక్తిమంతే దాస్యం సుదుర్లభం |
విద్యాం శ్రియం సుకవితాం పుత్రపౌత్రాన్ యశో లభేత్ || 24 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే ద్వావింశోఽధ్యాయే దానవకృత శ్రీ కృష్ణ స్తోత్రం |