లోమహర్షణ ఉవాచ |
దేవదేవో జగద్యోనిరయోనిర్జగదాదిజః |
అనాదిరాదిర్విశ్వస్య వరేణ్యో వరదో హరిః || 1 ||
పరావరాణాం పరమః పరాపరసతాం గతిః |
ప్రభుః ప్రమాణం మానానాం సప్తలోకగురోర్గురుః |
స్థితిం కర్తుం జగన్నాథః సోఽచింత్యో గర్భతాం గతః || 2 ||
ప్రభుః ప్రభూణాం పరమః పరాణా-
-మనాదిమధ్యో భగవాననంతః |
త్రైలోక్యమంశేన సనాథమేకః
కర్తుం మహాత్మాదితిజోఽవతీర్ణః || 3 ||
న యస్య రుద్రో న చ పద్మయోని-
-ర్నేంద్రో న సూర్యేందుమరీచిమిశ్రాః |
జానంతి దైత్యాధిప యత్స్వరూపం
స వాసుదేవః కలయావతీర్ణః || 4 ||
యమక్షరం వేదవిదో వదంతి
విశంతి యం జ్ఞానవిధూతపాపాః |
యస్మిన్ ప్రవిష్టా న పునర్భవంతి
తం వాసుదేవం ప్రణమామి దేవం || 5 ||
భృతాన్యశేషాణి యతో భవంతి
యథోర్మయస్తోయనిధేరజస్రం |
లయం చ యస్మిన్ ప్రలయే ప్రయాంతి
తం వాసుదేవం ప్రణతోఽస్ంయచింత్యం || 6 ||
న యస్య రూపం న బలం ప్రభావో
న చ ప్రతాపః పరమస్య పుంసః |
విజ్ఞాయతే సర్వపితామహాద్యై-
-స్తం వాసుదేవం ప్రణమామి దేవం || 7 ||
రూపస్య చక్షుర్గ్రహణే త్వగేషా
స్పర్శగ్రహిత్రీ రసనా రసస్య |
ఘ్రాణం చ గంధగ్రహణే నియుక్తం
న ఘ్రాణచక్షుః శ్రవణాది తస్య || 8 ||
స్వయంప్రకాశః పరమార్థతో యః
సర్వేశ్వరో వేదితవ్యః స యుక్త్యా |
శక్యం తమీడ్యమనఘం చ దేవం
గ్రాహ్యం నతోఽహం హరిమీశితారం || 9 ||
యేనైకదంష్ట్రేణ సముద్ధృతేయం
ధరాచలా ధారయతీహ సర్వం |
శేతే గ్రసిత్వా సకలం జగద్య-
-స్తమీడ్యమీశం ప్రణతోఽస్మి విష్ణుం || 10 ||
అంశావతీర్ణేన చ యేన గర్భే
హృతాని తేజాంసి మహాసురాణాం |
నమామి తం దేవమనంతమీశ-
-మశేషసంసారతరోః కుఠారం || 11 ||
దేవో జగద్యోనిరయం మహాత్మా
స షోడశాంశేన మహాసురేంద్రాః |
సురేంద్ర మాతుర్జఠరం ప్రవిష్టో
హృతాని వస్తేన బలం వపూంషి || 12 ||
ఇతి వామనపురాణాంతర్గత శ్రీ వామన స్తోత్రం |