ఏకదా కౌతుకావిష్టా భైరవం భూతసేవితం |
భైరవీ పరిపప్రచ్ఛ సర్వభూతహితే రతా || 1 ||
శ్రీభైరవ్యువాచ |
భగవన్ సర్వధర్మజ్ఞ భూతవాత్సల్యభావన |
అహం తు వేత్తుమిచ్ఛామి సర్వభూతోపకారం || 2 ||
కేన మంత్రేణ జప్తేన స్తోత్రేణ పఠితేన చ |
సర్వథా శ్రేయసాం ప్రాప్తిర్భూతానాం భూతిమిచ్ఛతాం || 3 ||
శ్రీభైరవ ఉవాచ |
శృణు దేవి తవ స్నేహాత్ప్రాయో గోప్యమపి ప్రియే |
కథయిష్యామి తత్సర్వం సుఖసంపత్కరం శుభం || 4 ||
పఠతాం శృణ్వతాం నిత్యం సర్వసంపత్తిదాయకం |
విద్యైశ్వర్యసుఖావాప్తి మంగళప్రదముత్తమం || 5 ||
మాతంగ్యా హృదయం స్తోత్రం దుఃఖదారిద్ర్యభంజనం |
మంగళం మంగళానాం చ హ్యస్తి సర్వసుఖప్రదం || 6 ||
అస్య శ్రీమాతంగీ హృదయస్తోత్ర మంత్రస్య దక్షిణామూర్తిరృషిః విరాట్ ఛందః మాతంగీ దేవతా హ్రీం బీజం హూం శక్తిః క్లీం కీలకం సర్వవాంఛితార్థసిద్ధ్యర్థే పాఠే వినియోగః ||
ఋష్యాదిన్యాసః –
ఓం దక్షిణామూర్తిరృషయే నమః శిరసి | విరాట్ఛందసే నమో ముఖే | మాతంగీదేవతాయై నమః హృది | హ్రీం బీజాయ నమః గుహ్యే | హూం శక్తయే నమః పాదయోః | క్లీం కీలకాయ నమో నాభౌ | వినియోగాయ నమః సర్వాంగే ||
కరన్యాసః –
ఓం హ్రీం అంగుష్ఠాభ్యాం నమః | ఓం క్లీం తర్జనీభ్యాం నమః | ఓం హూం మధ్యమాభ్యాం నమః | ఓం హ్రీం అనామికాభ్యాం నమః | ఓం క్లీం కనిష్ఠికాభ్యాం నమః | ఓం హూం కరతలకరపృష్ఠాభ్యాం నమః |
అంగన్యాసః –
ఓం హ్రీం హృదయాయ నమః | ఓం క్లీం శిరసే స్వాహా | ఓం హూం శిఖాయై వషట్ | ఓం హ్రీం నేత్రత్రయాయ వౌషట్ | ఓం క్లీం కవచాయ హుం | ఓం హూం అస్త్రాయ ఫట్ |
ధ్యానం |
శ్యామాం శుభ్రాంశుభాలాం త్రికమలనయనాం రత్నసింహాసనస్థాం
భక్తాభీష్టప్రదాత్రీం సురనికరకరాసేవ్యకంజాంఘ్రియుగ్మాం |
నీలాంభోజాంశుకాంతిం నిశిచరనికరారణ్యదావాగ్నిరూపాం
మాతంగీమావహంతీమభిమతఫలదాం మోదినీం చింతయామి || 7 ||
నమస్తే మాతంగ్యై మృదుముదితతన్వై తనుమతాం
పరశ్రేయోదాయై కమలచరణధ్యానమనసాం |
సదా సంసేవ్యాయై సదసి విబుధైర్దివ్యధిషణై-
-ర్దయార్ద్రాయై దేవ్యై దురితదలనోద్దండమనసే || 8 ||
పరం మాతస్తే యో జపతి మనుమవ్యగ్రహృదయః
కవిత్వం కల్పానాం కలయతి సుకల్పః ప్రతిపదం |
అపి ప్రాయో రంయాఽమృతమయపదా తస్య లలితా
నటీం మన్యా వాణీ నటతి రసనాయాం చ ఫలితా || 9 ||
తవ ధ్యాయంతో యే వపురనుజపంతి ప్రవలితం
సదా మంత్రం మాతర్నహి భవతి తేషాం పరిభవః |
కదంబానాం మాలాః శిరసి యుంజంతి సదయే
భవంతి ప్రాయస్తే యువతిజనయూథస్వవశగాః || 10 ||
సరోజైః సాహస్రైః సరసిజపదద్వంద్వమపి యే
సహస్రం నామోక్త్వా తదపి తవ ఙేంతం మనుమితం |
పృథఙ్నాంనా తేనాయుతకలితమర్చంతి ఖలు తే
సదా దేవవ్రాతప్రణమితపదాంభోజయుగళాః || 11 ||
తవ ప్రీత్యై మాతర్దదతి బలిమాధాయ బలినా
సమత్స్యం మాంసం వా సురుచిరసితం రాజరుచితం |
సుపుణ్యా యే స్వాంతస్తవ చరణమోదైకరసికా
అహో భాగ్యం తేషాం త్రిభువనమలం వశ్యమఖిలం || 12 ||
లసల్లోలశ్రోత్రాభరణకిరణక్రాంతికలితం
[ మితస్మిత్యాపన్నప్రతిభితమమన్నం వికరితం ] మితస్మేరజ్యోత్స్నాప్రతిఫలితభాభిర్వికరితం |
ముఖాంభోజం మాతస్తవ పరిలుఠద్భ్రూమధుకరం
రమా యే ధ్యాయంతి త్యజతి న హి తేషాం సుభవనం || 13 ||
పరః శ్రీమాతంగ్యా జపతి హృదయాఖ్యః సుమనసా-
-మయం సేవ్యః సద్యోఽభిమతఫలదశ్చాతిలలితః |
నరా యే శృణ్వంతి స్తవమపి పఠంతీమమనిశం
న తేషాం దుష్ప్రాప్యం జగతి యదలభ్యం దివిషదాం || 14 ||
ధనార్థీ ధనమాప్నోతి దారార్థీ సుందరీం ప్రియాం |
సుతార్థీ లభతే పుత్రం స్తవస్యాస్య ప్రకీర్తనాత్ || 15 ||
విద్యార్థీ లభతే విద్యాం వివిధాం విభవప్రదాం |
జయార్థీ పఠనాదస్య జయం ప్రాప్నోతి నిశ్చితం || 16 ||
నష్టరాజ్యో లభేద్రాజ్యం సర్వసంపత్సమాశ్రితం |
కుబేరసమసంపత్తిః స భవేద్ధృదయం పఠన్ || 17 ||
కిమత్ర బహునోక్తేన యద్యదిచ్ఛతి మానవః |
మాతంగీహృదయస్తోత్రపాఠాత్తత్సర్వమాప్నుయాత్ || 18 ||
ఇతి శ్రీదక్షిణామూర్తిసంహితాయాం శ్రీ మాతంగీ హృదయ స్తోత్రం |