ప్రహ్లాద ఉవాచ |
నమస్తే పుండరీకాక్ష నమస్తే పురుషోత్తమ |
నమస్తే సర్వలోకాత్మన్ నమస్తే తిగ్మచక్రిణే || 1 ||
నమో బ్రహ్మణ్యదేవాయ గోబ్రాహ్మణహితాయ చ |
జగద్ధితాయ కృష్ణాయ గోవిందాయ నమో నమః || 2 ||
బ్రహ్మత్వే సృజతే విశ్వం స్థితౌ పాలయతే పునః |
రుద్రరూపాయ కల్పాంతే నమస్తుభ్యం త్రిమూర్తయే || 3 ||
దేవా యక్షాసురాః సిద్ధా నాగా గంధర్వకిన్నరాః |
పిశాచా రాక్షసాశ్చైవ మనుష్యాః పశవస్తథా || 4 ||
పక్షిణః స్థావరాశ్చైవ పిపీలికసరీసృపాః |
భూంయాపోఽగ్నిర్నభో వాయుః శబ్దః స్పర్శస్తథా రసః || 5 ||
రూపం గంధో మనో బుద్ధిరాత్మా కాలస్తథా గుణాః |
ఏతేషాం పరమార్థశ్చ సర్వమేతత్త్వమచ్యుత || 6 ||
విద్యావిద్యే భవాన్ సత్యమసత్యం త్వం విషామృతే |
ప్రవృత్తం చ నివృత్తం చ కర్మ వేదోదితం భవాన్ || 7 ||
సమస్తకర్మభోక్తా చ కర్మోపకరణాని చ |
త్వమేవ విష్ణో సర్వాణి సర్వకర్మఫలం చ యత్ || 8 ||
మయ్యన్యత్ర తథాఽశేషభూతేషు భువనేషు చ |
తవైవ వ్యాప్తిరైశ్వర్యగుణసంసూచికీ ప్రభో || 9 ||
త్వాం యోగినశ్చింతయంతి త్వాం యజంతి చ యాజకాః |
హవ్యకవ్యభుగేకస్త్వం పితృదేవస్వరూపధృక్ || 10 ||
రూపం మహత్తే స్థితమత్ర విశ్వం
తతశ్చ సూక్ష్మం జగదేతదీశ |
రూపాణి సర్వాణి చ భూతభేదా-
-స్తేష్వంతరాత్మాఖ్యమతీవ సూక్ష్మం || 11 ||
తస్మాచ్చ సూక్ష్మాదివిశేషణానా-
-మగోచరే యత్పరమాత్మరూపం |
కిమప్యచింత్యం తవ రూపమస్తి
తస్మై నమస్తే పురుషోత్తమాయ || 12 ||
సర్వభూతేషు సర్వాత్మన్ యా శక్తిరపరా తవ |
గుణాశ్రయా నమస్తస్యై శాశ్వతాయై సురేశ్వర || 13 ||
యాతీతగోచరా వాచాం మనసాం చావిశేషణా |
జ్ఞానిజ్ఞానపరిచ్ఛేద్యా తాం వందే చేశ్వరీం పరాం || 14 ||
ఓం నమో వాసుదేవాయ తస్మై భగవతే సదా |
వ్యతిరిక్తం న యస్యాస్తి వ్యతిరిక్తోఽఖిలస్య యః || 15 ||
నమస్తస్మై నమస్తస్మై నమస్తస్మై మహాత్మనే |
నామ రూపం న యస్యైకో యోఽస్తిత్వేనోపలభ్యతే || 16 ||
యస్యావతారరూపాణి సమర్చంతి దివౌకసః |
అపశ్యంతః పరం రూపం నమస్తస్మై మహాత్మనే || 17 ||
యోఽంతస్తిష్ఠన్నశేషస్య పశ్యతీశః శుభాశుభం |
తం సర్వసాక్షిణం విశ్వం నమస్యే పరమేశ్వరం || 18 ||
నమోఽస్తు విష్ణవే తస్మై యస్యాభిన్నమిదం జగత్ |
ధ్యేయః స జగతామాద్యః స ప్రసీదతు మేఽవ్యయః || 19 ||
యత్రోతమేతత్ ప్రోతం చ విశ్వమక్షరమవ్యయం |
ఆధారభూతః సర్వస్య స ప్రసీదతు మే హరిః || 20 ||
ఓం నమో విష్ణవే తస్మై నమస్తస్మై పునః పునః |
యత్ర సర్వం యతః సర్వం యః సర్వం సర్వసంశ్రయః || 21 ||
సర్వగత్వాదనంతస్య స ఏవాహమవస్థితః |
మత్తః సర్వమహం సర్వం మయి సర్వం సనాతనే || 22 ||
అహమేవాక్షయో నిత్యః పరమాత్మాఽఽత్మసంశ్రయః |
బ్రహ్మసంజ్ఞోఽహమేవాగ్రే తథాఽంతే చ పరః పుమాన్ || 23 ||
ఇతి శ్రీవిష్ణుపురాణే ప్రథమాంశే ఏకోనవింశోఽధ్యాయే ప్రహ్లాద కృత భగవత్ స్తుతిః |