నారద ఉవాచ |
ఇంద్రాదిదేవవృందేశ ఈడ్యేశ్వర జగత్పతే |
మహావిష్ణోర్నృసింహస్య కవచం బ్రూహి మే ప్రభో |
యస్య ప్రపఠనాద్విద్వాంస్త్రైలోక్యవిజయీ భవేత్ || 1 ||
బ్రహ్మోవాచ |
శృణు నారద వక్ష్యామి పుత్రశ్రేష్ఠ తపోధన |
కవచం నరసింహస్య త్రైలోక్యవిజయీ భవేత్ || 2 ||
స్రష్టాఽహం జగతాం వత్స పఠనాద్ధారణాద్యతః |
లక్ష్మీర్జగత్త్రయం పాతి సంహర్తా చ మహేశ్వరః || 3 ||
పఠనాద్ధారణాద్దేవా బహవశ్చ దిగీశ్వరాః |
బ్రహ్మమంత్రమయం వక్ష్యే భ్రాంత్యాదివినివారకం || 4 ||
యస్య ప్రసాదాద్దుర్వాసాస్త్రైలోక్యవిజయీ భవేత్ |
పఠనాద్ధారణాద్యస్య శాస్తా చ క్రోధభైరవః || 5 ||
త్రైలోక్యవిజయస్యాస్య కవచస్య ప్రజాపతిః |
ఋషిశ్ఛందస్తు గాయత్రీ నృసింహో దేవతా విభుః || 6 ||
చతుర్వర్గే చ శాంతౌ చ వినియోగః ప్రకీర్తితః |
క్ష్రౌం బీజం మే శిరః పాతు చంద్రవర్ణో మహామనుః || 7 ||
ఓం ఉగ్రం వీరం మహావిష్ణుం జ్వలంతం సర్వతోముఖం |
నృసింహం భీషణం భద్రం మృత్యుమృత్యుం నమాంయహం || 8 ||
ద్వాత్రింశదక్షరో మంత్రో మంత్రరాజః సురద్రుమః |
కంఠం పాతు ధ్రువం క్ష్రౌం హృద్భగవతే చక్షుషీ మమ || 9 ||
నరసింహాయ చ జ్వాలామాలినే పాతు కర్ణకం |
దీప్తదంష్ట్రాయ చ తథా అగ్నినేత్రాయ నాసికాం || 10 ||
సర్వరక్షోఘ్నాయ తథా సర్వభూతహితాయ చ |
సర్వజ్వరవినాశాయ దహ దహ పదద్వయం || 11 ||
రక్ష రక్ష వర్మమంత్రః స్వాహా పాతు ముఖం మమ |
తారాదిరామచంద్రాయ నమః పాతు హృదం మమ || 12 ||
క్లీం పాయాత్ పార్శ్వయుగ్మం చ తారో నమః పదం తతః |
నారాయణాయ నాభిం చ ఆం హ్రీం క్రోం క్ష్రౌం చ హుం ఫట్ || 13 ||
షడక్షరః కటిం పాతు ఓం నమో భగవతే పదం |
వాసుదేవాయ చ పృష్ఠం క్లీం కృష్ణాయ ఉరుద్వయం || 14 ||
క్లీం కృష్ణాయ సదా పాతు జానునీ చ మనూత్తమః |
క్లీం గ్లౌం క్లీం శ్యామలాంగాయ నమః పాయాత్ పదద్వయం || 15 ||
క్ష్రౌం నృసింహాయ క్ష్రౌం హ్రీం చ సర్వాంగం మే సదాఽవతు |
ఇతి తే కథితం వత్స సర్వమంత్రౌఘవిగ్రహం || 16 ||
తవ స్నేహాన్మయా ఖ్యాతం ప్రవక్తవ్యం న కస్యచిత్ |
గురుపూజాం విధాయాథ గృహ్ణీయాత్ కవచం తతః || 17 ||
సర్వపుణ్యయుతో భూత్వా సర్వసిద్ధియుతో భవేత్ |
శతమష్టోత్తరం చాస్య పురశ్చర్యావిధిః స్మృతః || 18 ||
హవనాదీన్ దశాంశేన కృత్వా సత్సాధకోత్తమః |
తతస్తు సిద్ధకవచో రూపేణ మదనోపమః || 19 ||
స్పర్ధాముద్ధూయ భవనే లక్ష్మీర్వాణీ వసేన్ముఖే |
పుష్పాంజల్యష్టకం దత్త్వా మూలేనైవ పఠేత్ సకృత్ || 20 ||
అపి వర్షసహస్రాణాం పూజానాం ఫలమాప్నుయాత్ |
భూర్జే విలిఖ్య గుటికాం స్వర్ణస్థాం ధారయేద్యది || 21 ||
కంఠే వా దక్షిణే బాహౌ నరసింహో భవేత్ స్వయం |
యోషిద్వామభుజే చైవ పురుషో దక్షిణే కరే || 22 ||
బిభృయాత్ కవచం పుణ్యం సర్వసిద్ధియుతో భవేత్ |
కాకవంధ్యా చ యా నారీ మృతవత్సా చ యా భవేత్ || 23 ||
జన్మవంధ్యా నష్టపుత్రా బహుపుత్రవతీ భవేత్ |
కవచస్య ప్రసాదేన జీవన్ముక్తో భవేన్నరః || 24 ||
త్రైలోక్యం క్షోభయత్యేవం త్రైలోక్యవిజయీ భవేత్ |
భూతప్రేతపిశాచాశ్చ రాక్షసా దానవాశ్చ యే || 25 ||
తం దృష్ట్వా ప్రపలాయంతే దేశాద్దేశాంతరం ధ్రువం |
యస్మిన్ గృహే చ కవచం గ్రామే వా యది తిష్ఠతి |
తద్దేశం తు పరిత్యజ్య ప్రయాంతి హ్యాతిదూరతః || 26 ||
ఇతి శ్రీబ్రహ్మసంహితాయాం సప్తదశోఽధ్యాయే త్రైలోక్యవిజయం నామ శ్రీ నృసింహ కవచం |