అవినయమపనయ విష్ణో
దమయ మనః శమయ విషయమృగతృష్ణాం |
భూతదయాం విస్తారయ
తారయ సంసారసాగరతః || 1 ||
దివ్యధునీమకరందే
పరిమళపరిభోగసచ్చిదానందే |
శ్రీపతిపదారవిందే
భవభయఖేదచ్ఛిదే వందే || 2 ||
సత్యపి భేదాపగమే
నాథ తవాఽహం న మామకీనస్త్వం |
సాముద్రో హి తరంగః
క్వచన సముద్రో న తారంగః || 3 ||
ఉద్ధృతనగ నగభిదనుజ
దనుజకులామిత్ర మిత్రశశిదృష్టే |
దృష్టే భవతి ప్రభవతి
న భవతి కిం భవతిరస్కారః || 4 ||
మత్స్యాదిభిరవతారై-
-రవతారవతావతా సదా వసుధాం |
పరమేశ్వర పరిపాల్యో
భవతా భవతాపభీతోఽహం || 5 ||
దామోదర గుణమందిర
సుందరవదనారవింద గోవింద |
భవజలధిమథనమందర
పరమం దరమపనయ త్వం మే || 6 ||
నారాయణ కరుణామయ
శరణం కరవాణి తావకౌ చరణౌ |
ఇతి షట్పదీ మదీయే
వదనసరోజే సదా వసతు || 7 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ షట్పదీ స్తోత్రం సంపూర్ణం |
Vishnu Shatpadi stotram pdf download – శ్రీ విష్ణు షట్పదీ స్తోత్రం
Author
Pavan Teja
పవన్ తేజ రచయితగా సినిమాలు, రాజకీయం, ఆరోగ్యం, వ్యాయామం, అందం, ధర్మం, విజ్ఞాన శాస్త్రం, సాంకేతికత, డబ్బు సంపాదించే మార్గాలు, ఆంగ్లం నుండి తెలుగు అనువాదం మొదలైన అంశాలలో అనుభవం పొందాడు. అతను గతంలో తెలుగు సినిమా విశ్లేషకుడిగా పని చేశాడు. ప్రస్తుతం అసిస్టెంట్ డైరెక్టర్ గా పనిచేస్తున్నాడు.
