Sri Stotram (Agni puranam) pdf download – శ్రీ స్తోత్రం (అగ్నిపురాణం)

పుష్కర ఉవాచ |
రాజ్యలక్ష్మీస్థిరత్వాయ యథేంద్రేణ పురా శ్రియః |
స్తుతిః కృతా తథా రాజా జయార్థం స్తుతిమాచరేత్ || 1 ||
ఇంద్ర ఉవాచ |
నమస్యే సర్వలోకానాం జననీమబ్ధిసంభవాం |
శ్రియమున్నిద్రపద్మాక్షీం విష్ణువక్షఃస్థలస్థితాం || 2 ||
త్వం సిద్ధిస్త్వం స్వధా స్వాహా సుధా త్వం లోకపావని |
సంధ్యా రాత్రిః ప్రభా భూతిర్మేధా శ్రద్ధా సరస్వతీ || 3 ||
యజ్ఞవిద్యా మహావిద్యా గుహ్యవిద్యా చ శోభనే |
ఆత్మవిద్యా చ దేవి త్వం విముక్తిఫలదాయినీ || 4 ||
ఆన్వీక్షికీ త్రయీ వార్తా దండనీతిస్త్వమేవ చ |
సౌంయా సౌంయైర్జగద్రూపైస్త్వయైతద్దేవి పూరితం || 5 ||
కా త్వన్యా త్వామృతే దేవి సర్వయజ్ఞమయం వపుః |
అధ్యాస్తే దేవ దేవస్య యోగిచింత్యం గదాభృతః || 6 ||
త్వయా దేవి పరిత్యక్తం సకలం భువనత్రయం |
వినష్టప్రాయమభవత్ త్వయేదానీం సమేధితం || 7 ||
దారాః పుత్రాస్తథాగారం సుహృద్ధాన్యధనాదికం |
భవత్యేతన్మహాభాగే నిత్యం త్వద్వీక్షణాన్నృణాం || 8 ||
శరీరారోగ్యమైశ్వర్యమరిపక్షక్షయః సుఖం |
దేవి త్వద్దృష్టిదృష్టానాం పురుషాణాం న దుర్లభం || 9 ||
త్వమంబా సర్వభూతానాం దేవదేవో హరిః పితా |
త్వయైతద్విష్ణునా చాంబ జగద్వ్యాప్తం చరాచరం || 10 ||
మానం కోశం తథా గోష్ఠం మా గృహం మా పరిచ్ఛదం |
మా శరీరం కలత్రం చ త్యజేథాః సర్వపావని || 11 ||
మా పుత్రాన్ మా సుహృద్వర్గాన్ మా పశూన్ మా విభూషణం |
త్యజేథా మమ దేవస్య విష్ణోర్వక్షఃస్థలాలయే || 12 ||
సత్త్వేన సత్యశౌచాభ్యాం తథా శీలాదిభిర్గుణైః |
త్యజంతే తే నరాః సద్యః సంత్యక్తా యే త్వయామలే || 13 ||
త్వయావలోకితాః సద్యః శీలాద్యైరఖిలైర్గుణైః |
కులైశ్వర్యైశ్చ యుజ్యంతే పురుషా నిర్గుణా అపి || 14 ||
స శ్లాఘ్యః స గుణీ ధన్యః స కులీనః స బుద్ధిమాన్ |
స శూరః స చ విక్రాంతో యస్త్వయా దేవి వీక్షితః || 15 ||
సద్యో వైగుణ్యమాయాంతి శీలాద్యాః సకలా గుణాః |
పరాఙ్ముఖీ జగద్ధాత్రీ యస్య త్వం విష్ణువల్లభే || 16 ||
న తే వర్ణయితుం శక్తా గుణాన్ జిహ్వాపి వేధసః |
ప్రసీద దేవి పద్మాక్షి మాఽస్మాంస్త్యాక్షీః కదాచన || 17 ||
పుష్కర ఉవాచ |
ఏవం స్తుతా దదౌ శ్రీశ్చ వరమింద్రాయ చేప్సితం |
సుస్థిరత్వం చ రాజ్యస్య సంగ్రామవిజయాదికం || 18 ||
స్వస్తోత్రపాఠశ్రవణకర్తౄణాం భుక్తిముక్తిదం |
శ్రీస్తోత్రం సతతం తస్మాత్పఠేచ్చ శృణుయాన్నరః || 19 ||
ఇత్యగ్నిపురాణే సప్తత్రింశదధికద్విశతతమోఽధ్యాయే శ్రీస్తోత్రం |