Sri Shaligrama Stotram pdf download – శాలిగ్రామ స్తోత్రం

అస్య శ్రీశాలిగ్రామస్తోత్రమంత్రస్య శ్రీభగవాన్ ఋషిః శ్రీనారాయణో దేవతా అనుష్టుప్ ఛందః శ్రీశాలిగ్రామస్తోత్రమంత్ర జపే వినియోగః |
యుధిష్ఠిర ఉవాచ |
శ్రీదేవదేవ దేవేశ దేవతార్చనముత్తమం |
తత్సర్వం శ్రోతుమిచ్ఛామి బ్రూహి మే పురుషోత్తమ || 1 ||
శ్రీభగవానువాచ |
గండక్యాం చోత్తరే తీరే గిరిరాజస్య దక్షిణే |
దశయోజనవిస్తీర్ణా మహాక్షేత్రవసుంధరా || 2 ||
శాలిగ్రామో భవేద్దేవో దేవీ ద్వారావతీ భవేత్ |
ఉభయోః సంగమో యత్ర ముక్తిస్తత్ర న సంశయః || 3 ||
శాలిగ్రామశిలా యత్ర యత్ర ద్వారావతీ శిలా |
ఉభయోః సంగమో యత్ర ముక్తిస్తత్ర న సంశయః || 4 ||
ఆజన్మకృతపాపానాం ప్రాయశ్చిత్తం య ఇచ్ఛతి |
శాలిగ్రామశిలావారి పాపహారి నమోఽస్తు తే || 5 ||
అకాలమృత్యుహరణం సర్వవ్యాధివినాశనం |
విష్ణోః పాదోదకం పీత్వా శిరసా ధారయాంయహం || 6 ||
శంఖమధ్యే స్థితం తోయం భ్రామితం కేశవోపరి |
అంగలగ్నం మనుష్యాణాం బ్రహ్మహత్యాదికం దహేత్ || 7 ||
స్నానోదకం పిబేన్నిత్యం చక్రాంకితశిలోద్భవం |
ప్రక్షాళ్య శుద్ధం తత్తోయం బ్రహ్మహత్యాం వ్యపోహతి || 8 ||
అగ్నిష్టోమసహస్రాణి వాజపేయశతాని చ |
సంయక్ ఫలమవాప్నోతి విష్ణోర్నైవేద్యభక్షణాత్ || 9 ||
నైవేద్యయుక్తాం తులసీం చ మిశ్రితాం
విశేషతః పాదజలేన విష్ణోః |
యోఽశ్నాతి నిత్యం పురతో మురారేః
ప్రాప్నోతి యజ్ఞాయుతకోటిపుణ్యం || 10 ||
ఖండితా స్ఫుటితా భిన్నా వహ్నిదగ్ధా తథైవ చ |
శాలిగ్రామశిలా యత్ర తత్ర దోషో న విద్యతే || 11 ||
న మంత్రః పూజనం నైవ న తీర్థం న చ భావనా |
న స్తుతిర్నోపచారశ్చ శాలిగ్రామశిలార్చనే || 12 ||
బ్రహ్మహత్యాదికం పాపం మనోవాక్కాయసంభవం |
శీఘ్రం నశ్యతి తత్సర్వం శాలిగ్రామశిలార్చనాత్ || 13 ||
నానావర్ణమయం చైవ నానాభోగేన వేష్టితం |
తథా వరప్రసాదేన లక్ష్మీకాంతం వదాంయహం || 14 ||
నారాయణోద్భవో దేవశ్చక్రమధ్యే చ కర్మణా |
తథా వరప్రసాదేన లక్ష్మీకాంతం వదాంయహం || 15 ||
కృష్ణే శిలాతలే యత్ర సూక్ష్మం చక్రం చ దృశ్యతే |
సౌభాగ్యం సంతతిం ధత్తే సర్వసౌఖ్యం దదాతి చ || 16 ||
వాసుదేవస్య చిహ్నాని దృష్ట్వా పాపైః ప్రముచ్యతే |
శ్రీధరః సూకరే వామే హరిద్వర్ణస్తు దృశ్యతే || 17 ||
వరాహరూపిణం దేవం కూర్మాంగైరపి చిహ్నితం |
గోపదం తత్ర దృశ్యేత వారాహం వామనం తథా || 18 ||
పీతవర్ణం తు దేవానాం రక్తవర్ణం భయావహం |
నారసింహోఽభవద్దేవో మోక్షదం చ ప్రకీర్తితం || 19 ||
శంఖచక్రగదాకూర్మాః శంఖో యత్ర ప్రదృశ్యతే |
శంఖవర్ణస్య దేవానాం వామే దేవస్య లక్షణం || 20 ||
దామోదరం తథా స్థూలం మధ్యే చక్రం ప్రతిష్ఠితం |
పూర్ణద్వారేణ సంకీర్ణా పీతరేఖా చ దృశ్యతే || 21 ||
ఛత్రాకారే భవేద్రాజ్యం వర్తులే చ మహాశ్రియః |
కపటే చ మహాదుఃఖం శూలాగ్రే తు రణం ధ్రువం || 22 ||
లలాటే శేషభోగస్తు శిరోపరి సుకాంచనం |
చక్రకాంచనవర్ణానాం వామదేవస్య లక్షణం || 23 ||
వామపార్శ్వే చ వై చక్రే కృష్ణవర్ణస్తు పింగళం |
లక్ష్మీనృసింహదేవానాం పృథగ్వర్ణస్తు దృశ్యతే || 24 ||
లంబోష్ఠే చ దరిద్రం స్యాత్పింగళే హానిరేవ చ |
లగ్నచక్రే భవేద్వ్యాధిర్విదారే మరణం ధ్రువం || 25 ||
పాదోదకం చ నిర్మాల్యం మస్తకే ధారయేత్సదా |
విష్ణోర్దృష్టం భక్షితవ్యం తులసీదళమిశ్రితం || 26 ||
కల్పకోటిసహస్రాణి వైకుంఠే వసతే సదా |
శాలిగ్రామశిలాబిందుర్హత్యాకోటివినాశనః || 27 ||
తస్మాత్సంపూజయేద్ధ్యాత్వా పూజితం చాపి సర్వదా |
శాలిగ్రామశిలాస్తోత్రం యః పఠేచ్చ ద్విజోత్తమః || 28 ||
స గచ్ఛేత్పరమం స్థానం యత్ర లోకేశ్వరో హరిః |
సర్వపాపవినిర్ముక్తో విష్ణులోకం స గచ్ఛతి || 29 ||
దశావతారో దేవానాం పృథగ్వర్ణస్తు దృశ్యతే |
ఈప్సితం లభతే రాజ్యం విష్ణుపూజామనుక్రమాత్ || 30 ||
కోట్యో హి బ్రహ్మహత్యానామగంయాగంయకోటయః |
తాః సర్వా నాశమాయాంతి విష్ణోర్నైవేద్యభక్షణాత్ || 31 ||
విష్ణోః పాదోదకం పీత్వా కోటిజన్మాఘనాశనం |
తస్మాదష్టగుణం పాపం భూమౌ బిందునిపాతనాత్ || 32 ||
ఇతి శ్రీభవిష్యోత్తరపురాణే గండకీశిలామాహాత్ంయే శ్రీకృష్ణయుధిష్ఠిరసంవాదే శాలిగ్రామ స్తోత్రం |