సిందూరపూరరుచిరో బలవీర్యసింధుః
బుద్ధిప్రభావనిధిరద్భుతవైభవశ్రీః |
దీనార్తిదావదహనో వరదో వరేణ్యః
సంకష్టమోచనవిభుస్తనుతాం శుభం నః || 1 ||
సోత్సాహలంఘితమహార్ణవపౌరుషశ్రీః
లంకాపురీప్రదహనప్రథితప్రభావః |
ఘోరాహవప్రమథితారిచయప్రవీరః
ప్రాభంజనిర్జయతి మర్కటసార్వభౌమః || 2 ||
ద్రోణాచలానయనవర్ణితభవ్యభూతిః
శ్రీరామలక్ష్మణసహాయకచక్రవర్తీ |
కాశీస్థ దక్షిణవిరాజితసౌధమల్లః
శ్రీమారుతిర్విజయతే భగవాన్ మహేశః || 3 ||
నూనం స్మృతోఽపి దదతే భజతాం కపీంద్రః
సంపూజితో దిశతి వాంఛితసిద్ధివృద్ధిం |
సంమోదకప్రియ ఉపైతి పరం ప్రహర్షం
రామాయణశ్రవణతః పఠతాం శరణ్యః || 4 ||
శ్రీభారతప్రవరయుద్ధరథోద్ధతశ్రీః
పార్థైకకేతనకరాళవిశాలమూర్తిః |
ఉచ్చైర్ఘనాఘనఘటా వికటాట్టహాసః
శ్రీకృష్ణపక్షభరణః శరణం మమాఽస్తు || 5 ||
జంఘాలజంఘ ఉపమాతివిదూరవేగో
ముష్టిప్రహారపరిమూర్ఛితరాక్షసేంద్రః |
శ్రీరామకీర్తనపరాక్రమణోద్ధవశ్రీః
ప్రాకంపనిర్విభురుదంచతు భూతయే నః || 6 ||
సీతార్తిదారణపటుః ప్రబలః ప్రతాపీ
శ్రీరాఘవేంద్రపరిరంభవరప్రసాదః |
వర్ణీశ్వరః సవిధిశిక్షితకాలనేమిః
పంచాననోఽపనయతాం విపదోఽధిదేశం || 7 ||
ఉద్యద్భానుసహస్రసన్నిభతనుః పీతాంబరాలంకృతః
ప్రోజ్జ్వాలానలదీప్యమాననయనో నిష్పిష్టరక్షోగణః |
సంవర్తోద్యతవారిదోద్ధతరవః ప్రోచ్చైర్గదావిభ్రమః
శ్రీమాన్ మారుతనందనః ప్రతిదినం ధ్యేయో విపద్భంజనః || 8 ||
రక్షఃపిశాచభయనాశనమామయాధి
ప్రోచ్చైర్జ్వరాపహరణం హననం రిపూణాం |
సంపత్తిపుత్రకరణం విజయప్రదానం
సంకష్టమోచనవిభోః స్తవనం నరాణాం || 9 ||
దారిద్ర్యదుఃఖదహనం శమనం వివాదే
కళ్యాణసాధనమమంగళవారణాయ |
దాంపత్యదీర్ఘసుఖసర్వమనోరథాప్తిం
శ్రీమారుతేః స్తవశతావృతిరాతనోతి || 10 ||
స్తోత్రం య ఏతదనువాసరమాప్తకామః
శ్రీమారుతిం సమనుచింత్య పఠేత్ సుధీరః |
తస్మై ప్రసాదసుముఖో వరవానరేంద్రః
సాక్షాత్కృతో భవతి శాశ్వతికః సహాయః || 11 ||
సంకష్టమోచనస్తోత్రం శంకరాచార్యభిక్షుణా |
మహేశ్వరేణ రచితం మారుతేశ్చరణేఽర్పితం || 12 ||
ఇతి కాశీపీఠాధీశ్వర జగద్గురుశంకరాచార్యస్వామి శ్రీమహేశ్వరానందసరస్వతీవిరచితం శ్రీ సంకష్టమోచన హనుమత్ స్తోత్రం |