Sri Rama Stavaraja Stotram pdf download – శ్రీ రామ స్తవరాజ స్తోత్రం

అస్య శ్రీరామచంద్ర స్తవరాజస్తోత్రమంత్రస్య సనత్కుమారఋషిః | శ్రీరామో దేవతా | అనుష్టుప్ ఛందః | సీతా బీజం | హనుమాన్ శక్తిః | శ్రీరామప్రీత్యర్థే జపే వినియోగః ||
సూత ఉవాచ |
సర్వశాస్త్రార్థతత్త్వజ్ఞం వ్యాసం సత్యవతీసుతం |
ధర్మపుత్రః ప్రహృష్టాత్మా ప్రత్యువాచ మునీశ్వరం || 1 ||
యుధిష్ఠిర ఉవాచ |
భగవన్యోగినాం శ్రేష్ఠ సర్వశాస్త్రవిశారద |
కిం తత్త్వం కిం పరం జాప్యం కిం ధ్యానం ముక్తిసాధనం || 2 ||
శ్రోతుమిచ్ఛామి తత్సర్వం బ్రూహి మే మునిసత్తమ || 3 ||
వేదవ్యాస ఉవాచ |
ధర్మరాజ మహాభాగ శృణు వక్ష్యామి తత్త్వతః || 4 ||
యత్పరం యద్గుణాతీతం యజ్జ్యోతిరమలం శివం |
తదేవ పరమం తత్త్వం కైవల్యపదకారణం || 5 ||
శ్రీరామేతి పరం జాప్యం తారకం బ్రహ్మసంజ్ఞకం |
బ్రహ్మహత్యాదిపాపఘ్నమితి వేదవిదో విదుః || 6 ||
శ్రీరామ రామేతి జనా యే జపంతి చ సర్వదా |
తేషాం భుక్తిశ్చ ముక్తిశ్చ భవిష్యతి న సంశయః || 7 ||
స్తవరాజం పురా ప్రోక్తం నారదేన చ ధీమతా |
తత్సర్వం సంప్రవక్ష్యామి హరిధ్యానపురఃసరం || 8 ||
తాపత్రయాగ్నిశమనం సర్వాఘౌఘనికృంతనం |
దారిద్ర్యదుఃఖశమనం సర్వసంపత్కరం శివం || 9 ||
విజ్ఞానఫలదం దివ్యం మోక్షైకఫలసాధనం |
నమస్కృత్య ప్రవక్ష్యామి రామం కృష్ణం జగన్మయం || 10 ||
అయోధ్యానగరే రంయే రత్నమండపమధ్యగే |
స్మరేత్కల్పతరోర్మూలే రత్నసింహాసనం శుభం || 11 ||
తన్మధ్యేఽష్టదలం పద్మం నానారత్నైశ్చ వేష్టితం |
స్మరేన్మధ్యే దాశరథిం సహస్రాదిత్యతేజసం || 12 ||
పితురంకగతం రామమింద్రనీలమణిప్రభం |
కోమలాంగం విశాలాక్షం విద్యుద్వర్ణాంబరావృతం || 13 ||
భానుకోటిప్రతీకాశ కిరీటేన విరాజితం |
రత్నగ్రైవేయకేయూరరత్నకుండలమండితం || 14 ||
రత్నకంకణమంజీరకటిసూత్రైరలంకృతం |
శ్రీవత్సకౌస్తుభోరస్కం ముక్తాహారోపశోభితం || 15 ||
దివ్యరత్నసమాయుక్తముద్రికాభిరలంకృతం |
రాఘవం ద్విభుజం బాలం రామమీషత్స్మితాననం || 16 ||
తులసీకుందమందారపుష్పమాల్యైరలంకృతం |
కర్పూరాగురుకస్తూరీదివ్యగంధానులేపనం || 17 ||
యోగశాస్త్రేష్వభిరతం యోగేశం యోగదాయకం |
సదా భరతసౌమిత్రిశత్రుఘ్నైరుపశోభితం || 18 ||
విద్యాధరసురాధీశసిద్ధగంధర్వకిన్నరైః |
యోగీంద్రైర్నారదాద్యైశ్చ స్తూయమానమహర్నిశం || 19 ||
విశ్వామిత్రవసిష్ఠాదిమునిభిః పరిసేవితం |
సనకాదిమునిశ్రేష్ఠైర్యోగివృందైశ్చ సేవితం || 20 ||
రామం రఘువరం వీరం ధనుర్వేదవిశారదం |
మంగళాయతనం దేవం రామం రాజీవలోచనం || 21 ||
సర్వశాస్త్రార్థతత్త్వజ్ఞమానందకరసుందరం |
కౌసల్యానందనం రామం ధనుర్బాణధరం హరిం || 22 ||
ఏవం సంచింతయన్విష్ణుం యజ్జ్యోతిరమలం విభుం |
ప్రహృష్టమానసో భూత్వా మునివర్యః స నారదః || 23 ||
సర్వలోకహితార్థాయ తుష్టావ రఘునందనం |
కృతాంజలిపుటో భూత్వా చింతయన్నద్భుతం హరిం || 24 ||
యదేకం యత్పరం నిత్యం యదనంతం చిదాత్మకం |
యదేకం వ్యాపకం లోకే తద్రూపం చింతయాంయహం || 25 ||
విజ్ఞానహేతుం విమలాయతాక్షం
ప్రజ్ఞానరూపం స్వసుఖైకహేతుం |
శ్రీరామచంద్రం హరిమాదిదేవం
పరాత్పరం రామమహం భజామి || 26 ||
కవిం పురాణం పురుషం పురస్తా-
-త్సనాతనం యోగినమీశితారం |
అణోరణీయాంసమనంతవీర్యం
ప్రాణేశ్వరం రామమసౌ దదర్శ || 27 ||
నారద ఉవాచ |
నారాయణం జగన్నాథమభిరామం జగత్పతిం |
కవిం పురాణం వాగీశం రామం దశరథాత్మజం || 28 ||
రాజరాజం రఘువరం కౌసల్యానందవర్ధనం |
భర్గం వరేణ్యం విశ్వేశం రఘునాథం జగద్గురుం || 29 ||
సత్యం సత్యప్రియం శ్రేష్ఠం జానకీవల్లభం విభుం |
సౌమిత్రిపూర్వజం శాంతం కామదం కమలేక్షణం || 30 ||
ఆదిత్యం రవిమీశానం ఘృణిం సూర్యమనామయం |
ఆనందరూపిణం సౌంయం రాఘవం కరుణామయం || 31 ||
జామదగ్నిం తపోమూర్తిం రామం పరశుధారిణం |
వాక్పతిం వరదం వాచ్యం శ్రీపతిం పక్షివాహనం || 32 ||
శ్రీశార్ఙ్గధారిణం రామం చిన్మయానందవిగ్రహం |
హలధృగ్విష్ణుమీశానం బలరామం కృపానిధిం || 33 ||
శ్రీవల్లభం కృపానాథం జగన్మోహనమచ్యుతం |
మత్స్యకూర్మవరాహాదిరూపధారిణమవ్యయం || 34 ||
వాసుదేవం జగద్యోనిమనాదినిధనం హరిం |
గోవిందం గోపతిం విష్ణుం గోపీజనమనోహరం || 35 ||
గోగోపాలపరీవారం గోపకన్యాసమావృతం |
విద్యుత్పుంజప్రతీకాశం రామం కృష్ణం జగన్మయం || 36 ||
గోగోపికాసమాకీర్ణం వేణువాదనతత్పరం |
కామరూపం కలావంతం కామినీకామదం విభుం || 37 ||
మన్మథం మథురానాథం మాధవం మకరధ్వజం |
శ్రీధరం శ్రీకరం శ్రీశం శ్రీనివాసం పరాత్పరం || 38 ||
భూతేశం భూపతిం భద్రం విభూతిం భూమిభూషణం |
సర్వదుఃఖహరం వీరం దుష్టదానవవైరిణం || 39 ||
శ్రీనృసింహం మహాబాహుం మహాంతం దీప్తతేజసం |
చిదానందమయం నిత్యం ప్రణవం జ్యోతిరూపిణం || 40 ||
ఆదిత్యమండలగతం నిశ్చితార్థస్వరూపిణం |
భక్తిప్రియం పద్మనేత్రం భక్తానామీప్సితప్రదం || 41 ||
కౌసల్యేయం కలామూర్తిం కాకుత్స్థం కమలాప్రియం |
సింహాసనే సమాసీనం నిత్యవ్రతమకల్మషం || 42 ||
విశ్వామిత్రప్రియం దాంతం స్వదారనియతవ్రతం |
యజ్ఞేశం యజ్ఞపురుషం యజ్ఞపాలనతత్పరం || 43 ||
సత్యసంధం జితక్రోధం శరణాగతవత్సలం |
సర్వక్లేశాపహరణం విభీషణవరప్రదం || 44 ||
దశగ్రీవహరం రౌద్రం కేశవం కేశిమర్దనం |
వాలిప్రమథనం వీరం సుగ్రీవేప్సితరాజ్యదం || 45 ||
నరవానరదేవైశ్చసేవితం హనుమత్ప్రియం |
శుద్ధం సూక్ష్మం పరం శాంతం తారకం బ్రహ్మరూపిణం || 46 ||
సర్వభూతాత్మభూతస్థం సర్వాధారం సనాతనం |
సర్వకారణకర్తారం నిదానం ప్రకృతేః పరం || 47 ||
నిరామయం నిరాభాసం నిరవద్యం నిరంజనం |
నిత్యానందం నిరాకారమద్వైతం తమసః పరం || 48 ||
పరాత్పరతరం తత్త్వం సత్యానందం చిదాత్మకం |
మనసా శిరసా నిత్యం ప్రణమామి రఘూత్తమం || 49 ||
సూర్యమండలమధ్యస్థం రామం సీతాసమన్వితం |
నమామి పుండరీకాక్షమమేయం గురుతత్పరం || 50 ||
నమోఽస్తు వాసుదేవాయ జ్యోతిషాం పతయే నమః |
నమోఽస్తు రామదేవాయ జగదానందరూపిణే || 51 ||
నమో వేదాంతనిష్ఠాయ యోగినే బ్రహ్మవాదినే |
మాయామయనిరాసాయ ప్రపన్నజనసేవినే || 52 ||
వందామహే మహేశానచండకోదండఖండనం |
జానకీహృదయానందవర్ధనం రఘునందనం || 53 ||
ఉత్ఫుల్లామలకోమలోత్పలదలశ్యామాయ రామాయ తే-
-ఽకామాయ ప్రమదామనోహరగుణగ్రామాయ రామాత్మనే |
యోగారూఢమునీంద్రమానససరోహంసాయ సంసారవి-
-ధ్వంసాయ స్ఫురదోజసే రఘుకులోత్తంసాయ పుంసే నమః || 54 ||
భవోద్భవం వేదవిదాం వరిష్ఠ-
-మాదిత్యచంద్రానలసుప్రభావం |
సర్వాత్మకం సర్వగతస్వరూపం
నమామి రామం తమసః పరస్తాత్ || 55 ||
నిరంజనం నిష్ప్రతిమం నిరీహం
నిరాశ్రయం నిష్కలమప్రపంచం |
నిత్యం ధ్రువం నిర్విషయస్వరూపం
నిరంతరం రామమహం భజామి || 56 ||
భవాబ్ధిపోతం భరతాగ్రజం తం
భక్తిప్రియం భానుకులప్రదీపం |
భూతత్రినాథం భువనాధిపం తం
భజామి రామం భవరోగవైద్యం || 57 ||
సర్వాధిపత్యం సమరాంగధీరం
సత్యం చిదానందమయస్వరూపం |
సత్యం శివం శాంతిమయం శరణ్యం
సనాతనం రామమహం భజామి || 58 ||
కార్యక్రియాకారణమప్రమేయం
కవిం పురాణం కమలాయతాక్షం |
కుమారవేద్యం కరుణామయం తం
కల్పద్రుమం రామమహం భజామి || 59 ||
త్రైలోక్యనాథం సరసీరుహాక్షం
దయానిధిం ద్వంద్వవినాశహేతుం |
మహాబలం వేదనిధిం సురేశం
సనాతనం రామమహం భజామి || 60 ||
వేదాంతవేద్యం కవిమీశితార-
-మనాదిమధ్యాంతమచింత్యమాద్యం |
అగోచరం నిర్మలమేకరూపం
నమామి రామం తమసః పరస్తాత్ || 61 ||
అశేషవేదాత్మకమాదిసంజ్ఞ-
-మజం హరిం విష్ణుమనంతమాద్యం |
అపారసంవిత్సుఖమేకరూపం
పరాత్పరం రామమహం భజామి || 62 ||
తత్త్వస్వరూపం పురుషం పురాణం
స్వతేజసా పూరితవిశ్వమేకం |
రాజాధిరాజం రవిమండలస్థం
విశ్వేశ్వరం రామమహం భజామి || 63 ||
లోకాభిరామం రఘువంశనాథం
హరిం చిదానందమయం ముకుందం |
అశేషవిద్యాధిపతిం కవీంద్రం
నమామి రామం తమసః పరస్తాత్ || 64 ||
యోగీంద్రసంఘైశ్చ సుసేవ్యమానం
నారాయణం నిర్మలమాదిదేవం |
నతోఽస్మి నిత్యం జగదేకనాథ-
-మాదిత్యవర్ణం తమసః పరస్తాత్ || 65 ||
విభూతిదం విశ్వసృజం విరామం
రాజేంద్రమీశం రఘువంశనాథం |
అచింత్యమవ్యక్తమనంతమూర్తిం
జ్యోతిర్మయం రామమహం భజామి || 66 ||
అశేషసంసారవిహారహీన-
-మాదిత్యగం పూర్ణసుఖాభిరామం |
సమస్తసాక్షిం తమసః పరస్తా-
-న్నారాయణం విష్ణుమహం భజామి || 67 ||
మునీంద్రగుహ్యం పరిపూర్ణకామం
కలానిధిం కల్మషనాశహేతుం |
పరాత్పరం యత్పరమం పవిత్రం
నమామి రామం మహతో మహాంతం || 68 ||
బ్రహ్మా విష్ణుశ్చ రుద్రశ్చ దేవేంద్రో దేవతాస్తథా |
ఆదిత్యాదిగ్రహాశ్చైవ త్వమేవ రఘునందన || 69 ||
తాపసా ఋషయః సిద్ధాః సాధ్యాశ్చ మరుతస్తథా |
విప్రా వేదాస్తథా యజ్ఞాః పురాణం ధర్మసంహితాః || 70 ||
వర్ణాశ్రమాస్తథా ధర్మా వర్ణధర్మాస్తథైవ చ |
యక్షరాక్షసగంధర్వాదిక్పాలా దిగ్గజాదయః || 71 ||
సనకాదిమునిశ్రేష్ఠాస్త్వమేవ రఘుపుంగవ |
వసవోఽష్టౌ త్రయః కాలా రుద్రా ఏకాదశ స్మృతాః || 72 ||
తారకాః దశ దిక్ చైవ త్వమేవ రఘునందన |
సప్తద్వీపాః సముద్రాశ్చ నగాః నద్యస్తథా ద్రుమాః || 73 ||
స్థావరాః జంగమాశ్చైవ త్వమేవ రఘునాయక |
దేవతిర్యఙ్మనుష్యాణాం దానవానాం తథైవ చ || 74 ||
మాతా పితా తథా భ్రాతా త్వమేవ రఘువల్లభ |
సర్వేషాం త్వం పరం బ్రహ్మ త్వన్మయం సర్వమేవ హి || 75 ||
త్వమక్షరం పరం జ్యోతిస్త్వమేవ పురుషోత్తమ |
త్వమేవ తారకం బ్రహ్మ త్వత్తోఽన్యన్నైవ కించన || 76 ||
శాంతం సర్వగతం సూక్ష్మం పరం బ్రహ్మ సనాతనం |
రాజీవలోచనం రామం ప్రణమామి జగత్పతిం || 77 ||
వ్యాస ఉవాచ |
తతః ప్రసన్నః శ్రీరామః ప్రోవాచ మునిపుంగవం |
తుష్టోఽస్మి మునిశార్దూల వృణీష్వ వరముత్తమం || 78 ||
నారద ఉవాచ |
యది తుష్టోఽసి సర్వజ్ఞ శ్రీరామ కరుణానిధే |
త్వన్మూర్తిదర్శనేనైవ కృతార్థోఽహం చ సర్వదా || 79 ||
ధన్యోఽహం కృతకృత్యోఽహం పుణ్యోఽహం పురుషోత్తమ |
అద్య మే సఫలం జన్మ జీవితం సఫలం చ మే || 80 ||
అద్య మే సఫలం జ్ఞానమద్య మే సఫలం తపః |
అద్య మే సఫలం కర్మ త్వత్పాదాంభోజదర్శనాత్ || 81 ||
అద్య మే సఫలం సర్వం త్వన్నామస్మరణం తథా |
త్వత్పాదాంభోరుహద్వంద్వసద్భక్తిం దేహి రాఘవ || 82
తతః పరమసంప్రీతః స రామః ప్రాహ నారదం |
మేఘగంభీరయా వాచా ధన్వీ వీజితమన్మథః || 83 ||
శ్రీరామ ఉవాచ |
మునివర్య మహాభాగ మునే త్విష్టం దదామి తే |
యత్త్వయా చేప్సితం సర్వం మనసా తద్భవిష్యతి || 84 ||
నారద ఉవాచ |
వరం న యాచే రఘునాథ యుష్మ-
-త్పదాబ్జభక్తిః సతతం మమాస్తు |
ఇదం ప్రియం నాథ వరం ప్రయాచ్ఛ
పునః పునస్త్వామిదమేవ యాచే || 85 ||
వ్యాస ఉవాచ |
ఇత్యేవమీడితో రామః ప్రాదాత్తస్మై వరాంతరం |
వీరో రామో మహాతేజాః సచ్చిదానందవిగ్రహః || 86 ||
అద్వైతమమలం జ్ఞానం స్వనామస్మరణం తథా |
అంతర్దధౌ జగన్నాథః పురతస్తస్య రాఘవః || 87 ||
ఇతి శ్రీరఘునాథస్య స్తవరాజమనుత్తమం |
సర్వసౌభాగ్యసంపత్తిదాయకం ముక్తిదం శుభం || 88 ||
కథితం బ్రహ్మపుత్రేణ వేదానాం సారముత్తమం |
గుహ్యాద్గుహ్యతమం దివ్యం తవ స్నేహాత్ప్రకీర్తితం || 89 ||
యః పఠేచ్ఛృణుయాద్వాపి త్రిసంధ్యం శ్రద్ధయాన్వితః |
బ్రహ్మహత్యాదిపాపాని తత్సమాని బహూని చ || 90 ||
స్వర్ణస్తేయం సురాపానం గురుతల్పగతిస్తథా |
గోవధాద్యుపపాపాని అనృతాత్సంభవాని చ || 91 ||
సర్వైః ప్రముచ్యతే పాపైః కల్పాయుతశతోద్భవైః |
మానసం వాచికం పాపం కర్మణా సముపార్జితం || 92 ||
శ్రీరామస్మరణేనైవ తత్క్షణాన్నశ్యతి ధ్రువం |
ఇదం సత్యమిదం సత్యం సత్యమేతదిహోచ్యతే || 93 ||
రామం సత్యం పరం బ్రహ్మ రామాత్కించిన్న విద్యతే |
తస్మాద్రామస్వరూపం హి సత్యం సత్యమిదం జగత్ || 94 ||
శ్రీరామచంద్ర రఘుపుంగవ రాజవర్య
రజేంద్ర రామ రఘునాయక రాఘవేశ |
రాజాధిరాజ రఘునందన రామచంద్ర
దాసోఽహమద్య భవతః శరణాగతోఽస్మి || 95 ||
వైదేహీసహితం సురద్రుమతలే హైమే మహామండపే
మధ్యే పుష్పకమాసనే మణిమయే వీరాసనే సంస్థితం |
అగ్రే వాచయతి ప్రభంజనసుతే తత్త్వం మునిభ్యః పరం
వ్యాఖ్యాతం భరతాదిభిః పరివృతం రామం భజే శ్యామలం || 96 ||
రామం రత్నకిరీటకుండలయుతం కేయూరహారాన్వితం
సీతాలంకృతవామభాగమమలం సింహాసనస్థం విభుం |
సుగ్రీవాదిహరీశ్వరైః సురగణైః సంసేవ్యమానం సదా
విశ్వామిత్రపరాశరాదిమునిభిః సంస్తూయమానం ప్రభుం || 97 ||
సకలగుణనిధానం యోగిభిః స్తూయమానం
భుజవిజితసమానం రాక్షసేంద్రాదిమానం |
మహితనృపభయానం సీతయా శోభమానం
స్మర హృదయ విమానం బ్రహ్మ రామాభిధానం || 98 ||
రఘువర తవ మూర్తిర్మామకే మానసాబ్జే
నరకగతిహరం తే నామధేయం ముఖే మే |
అనిశమతులభక్త్యా మస్తకం త్వత్పదాబ్జే
భవజలనిధిమగ్నం రక్ష మామార్తబంధో || 99 ||
రామరత్నమహం వందే చిత్రకూటపతిం హరిం |
కౌసల్యాభక్తిసంభూతం జానకీకంఠభూషణం || 100 ||
ఇతి శ్రీసనత్కుమారసంహితాయాం నారదోక్తం శ్రీరామస్తవరాజస్తోత్రం సంపూర్ణం |