Sri Pashupathi Ashtakam pdf download – పశుపత్యష్టకం

ధ్యాయేన్నిత్యం మహేశం రజతగిరినిభం చారుచంద్రావతంసం
రత్నాకల్పోజ్జ్వలాంగం పరశుమృగవరాభీతిహస్తం ప్రసన్నం |
పద్మాసీనం సమంతాత్ స్తుతమమరగణైర్వ్యాఘ్రకృత్తిం వసానం
విశ్వాద్యం విశ్వబీజం నిఖిలభయహరం పంచవక్త్రం త్రినేత్రం ||
పశుపతిం ద్యుపతిం ధరణీపతిం
భుజగలోకపతిం చ సతీపతిం |
ప్రణత భక్తజనార్తిహరం పరం
భజత రే మనుజా గిరిజాపతిం || 1 ||
న జనకో జననీ న చ సోదరో
న తనయో న చ భూరిబలం కులం |
అవతి కోఽపి న కాలవశం గతం
భజత రే మనుజా గిరిజాపతిం || 2 ||
మురజడిండిమవాద్యవిలక్షణం
మధురపంచమనాదవిశారదం |
ప్రమథభూతగణైరపి సేవితం
భజత రే మనుజా గిరిజాపతిం || 3 ||
శరణదం సుఖదం శరణాన్వితం
శివ శివేతి శివేతి నతం నృణాం |
అభయదం కరుణావరుణాలయం
భజత రే మనుజా గిరిజాపతిం || 4 ||
నరశిరోరచితం మణికుండలం
భుజగహారముదం వృషభధ్వజం |
చితిరజోధవళీకృతవిగ్రహం
భజత రే మనుజా గిరిజాపతిం || 5 ||
మఖవినాశకరం శశిశేఖరం
సతతమధ్వరభాజి ఫలప్రదం |
ప్రళయదగ్ధసురాసురమానవం
భజత రే మనుజా గిరిజాపతిం || 6 ||
మదమపాస్య చిరం హృది సంస్థితం
మరణజన్మజరాభయపీడితం |
జగదుదీక్ష్య సమీపభయాకులం
భజత రే మనుజా గిరిజాపతిం || 7 ||
హరివిరంచిసురాధిపపూజితం
యమజనేశధనేశనమస్కృతం |
త్రినయనం భూవనత్రితయాధిపం
భజత రే మనుజా గిరిజాపతిం || 8 ||
పశుపతేరిదమష్టకమద్భుతం
విరచితం పృథివీపతిసూరిణా |
పఠతి సంశృణుతే మనుజః సదా
శివపురీం వసతే లభతే ముదం || 9 ||
ఇతి శ్రీపృథివీపతిసూరివిరచితం శ్రీపశుపత్యష్టకం |