ధ్యానం |
దేవీం షోడశవర్షీయాం రంయాం సుస్థిరయౌవనాం |
సర్వరూపగుణాఢ్యాం చ కోమలాంగీం మనోహరాం || 1 ||
శ్వేతచంపకవర్ణాభాం చంద్రకోటిసమప్రభాం |
వహ్నిశుద్ధాంశుకాధానాం రత్నభూషణభూషితాం || 2 ||
బిభ్రతీం కబరీభారం మల్లికామాల్యభూషితం |
బింబోష్ఠీం సుదతీం శుద్ధాం శరత్పద్మనిభాననాం || 3 ||
ఈషద్ధాస్యప్రసన్నాస్యాం సునీలోత్పలలోచనాం |
జగద్ధాత్రీం చ దాత్రీం చ సర్వేభ్యః సర్వసంపదాం || 4 ||
సంసారసాగరే ఘోరే పోతరుపాం వరాం భజే || 5 ||
దేవ్యాశ్చ ధ్యానమిత్యేవం స్తవనం శ్రూయతాం మునే |
ప్రయతః సంకటగ్రస్తో యేన తుష్టావ శంకరః || 6 ||
శంకర ఉవాచ |
రక్ష రక్ష జగన్మాతర్దేవి మంగళచండికే |
సంహర్త్రి విపదాం రాశేర్హర్షమంగళకారికే || 7 ||
హర్షమంగళదక్షే చ హర్షమంగళచండికే |
శుభే మంగళదక్షే చ శుభమంగళచండికే || 8 ||
మంగళే మంగళార్హే చ సర్వమంగళమంగళే |
సతాం మంగళదే దేవి సర్వేషాం మంగళాలయే || 9 ||
పూజ్యా మంగళవారే చ మంగళాభీష్టదైవతే |
పూజ్యే మంగళభూపస్య మనువంశస్య సంతతం || 10 ||
మంగళాధిష్ఠాతృదేవి మంగళానాం చ మంగళే |
సంసారమంగళాధారే మోక్షమంగళదాయిని || 11 ||
సారే చ మంగళాధారే పారే త్వం సర్వకర్మణాం |
ప్రతిమంగళవారే చ పూజ్యే త్వం మంగళప్రదే || 12 ||
స్తోత్రేణానేన శంభుశ్చ స్తుత్వా మంగళచండికాం |
ప్రతిమంగళవారే చ పూజాం కృత్వా గతః శివః || 13 ||
దేవ్యాశ్చ మంగళస్తోత్రం యః శృణోతి సమాహితః |
తన్మంగళం భవేచ్ఛశ్వన్న భవేత్తదమంగళం || 14 ||
ప్రథమే పూజితా దేవీ శంభునా సర్వమంగళా |
ద్వితీయే పూజితా దేవీ మంగళేన గ్రహేణ చ || 15 ||
తృతీయే పూజితా భద్రా మంగళేన నృపేణ చ |
చతుర్థే మంగళే వారే సుందరీభిశ్చ పూజితా |
పంచమే మంగళాకాంక్షైర్నరైర్మంగళచండికా || 16 ||
పూజితా ప్రతివిశ్వేషు విశ్వేశైః పూజితా సదా |
తతః సర్వత్ర సంపూజ్య సా బభూవ సురేశ్వరీ || 17 ||
దేవాదిభిశ్చ మునిభిర్మనుభిర్మానవైర్మునే |
దేవ్యాశ్చ మంగళస్తోత్రం యః శృణోతి సమాహితః || 18 ||
తన్మంగళం భవేచ్ఛశ్వన్న భవేత్తదమంగళం |
వర్ధంతే తత్పుత్రపౌత్రా మంగళం చ దినే దినే || 19 ||
ఇతి శ్రీబ్రహ్మవైవర్తే మహాపురాణే ప్రకృతిఖండే నారదనారాయణసంవాదే చతుశ్చత్వారింశోఽధ్యాయే మంగళ చండికా స్తోత్రం |