నిత్యో హి యస్య మహిమా న హి మానమేతి
స త్వం మహేశ భగవన్మఘవన్ముఖేడ్య |
ఉత్తిష్ఠ తిష్ఠదమృతైరమృతైరివోక్తై-
-ర్గీతాగమైశ్చ పురుధా పురుధామశాలిన్ || 1 ||
భక్తేషు జాగృహి ముదాఽహిముదారభావం
తల్పం విధాయ సవిశేషవిశేషహేతో |
యః శేష ఏష సకలః సకలః స్వగీతై-
-స్త్వం జాగృహి శ్రితపతే తపతే నమస్తే || 2 ||
దృష్ట్వా జనాన్ వివిధకష్టవశాన్ దయాలు-
-స్త్ర్యాత్మా బభూవ సకలార్తిహరోఽత్ర దత్తః |
అత్రేర్మునేః సుతపసోఽపి ఫలం చ దాతుం
బుద్ధ్యస్వ స త్వమిహ యన్మహిమానియత్తః || 3 ||
ఆయాత్యశేషవినుతోఽప్యవగాహనాయ
దత్తోఽధునేతి సురసింధురపేక్షతే త్వాం |
క్షేత్రే తథైవ కురుసంజ్ఞక ఏత్య సిద్ధా-
-స్తస్థుస్తవాచమనదేశ ఇనోదయాత్ప్రాక్ || 4 ||
సంధ్యాముపాసితమజోఽప్యధునాఽఽగమిష్య-
-త్యాకాంక్షతే కృతిజనః ప్రతివీక్షతే త్వాం |
కృష్ణాతటేఽపి నరసింహసువాటికాయాం
సారార్తికః కృతిజనః ప్రతివీక్షతే త్వాం || 5 ||
గాంధర్వసంజ్ఞకపురేఽపి సుభావికాస్తే
ధ్యానార్థమత్ర భగవాన్ సముపైష్యతీతి |
మత్వాస్థురాచరితసన్నియతాప్లవాద్యా
ఉత్తిష్ఠ దేవ భగవన్నత ఏవ శీఘ్రం || 6 ||
పుత్రీ దివః ఖగగణాన్ సుచిరం ప్రసుప్తాన్
ఉత్పాతయత్యరుణగా అధిరుహ్య తూషాః |
కాషాయవస్త్రమపిధానమపావృణూద్యన్
తార్క్ష్యాగ్రజోఽయమవలోకయ తం పురస్తాత్ || 7 ||
శాటీనిభాభ్రపటలాని తవేంద్రకాష్ఠా-
-భాగం యతీంద్ర రురుధుర్గరుడాగ్రజోఽతః |
అస్మాభిరీశ విదితో హ్యుదితోఽయమేవం
చంద్రోఽపి తే ముఖరుచిం చిరగాం జహాతి || 8 ||
ద్వారేఽర్జునస్తవ చ తిష్ఠతి కార్తవీర్యః
ప్రహ్లాద ఏష యదురేష మదాలసాజః |
త్వాం ద్రష్టుకామ ఇతరే మునయోఽపి చాహం
ఉత్తిష్ఠ దర్శయ నిజం సుముఖం ప్రసీద || 9 ||
ఏవం ప్రబుద్ధ ఇవ సంస్తవనాదభూత్స
మాలాం కమండలుమధో డమరుం త్రిశూలం |
చక్రం చ శంఖముపరి స్వకరైర్దధానో
నిత్యం స మామవతు భావితవాసుదేవః || 10 ||
ఇతి శ్రీవాసుదేవానందసరస్వతీ విరచితం శ్రీ దత్త ప్రబోధః |
Sri Datta Prabodha pdf download – శ్రీ దత్త ప్రబోధః
Author
Pavan Teja
పవన్ తేజ రచయితగా సినిమాలు, రాజకీయం, ఆరోగ్యం, వ్యాయామం, అందం, ధర్మం, విజ్ఞాన శాస్త్రం, సాంకేతికత, డబ్బు సంపాదించే మార్గాలు, ఆంగ్లం నుండి తెలుగు అనువాదం మొదలైన అంశాలలో అనుభవం పొందాడు. అతను గతంలో తెలుగు సినిమా విశ్లేషకుడిగా పని చేశాడు. ప్రస్తుతం అసిస్టెంట్ డైరెక్టర్ గా పనిచేస్తున్నాడు.
