Sri Datta Manasa Puja pdf download – శ్రీ దత్త మానసపూజా

పరానందమయో విష్ణుర్హృత్స్థో వేద్యోప్యతీంద్రియః |
సదా సంపూజ్యతే భక్తైర్భగవాన్ భక్తిభావనః || 1 ||
అచింత్యస్య కుతో ధ్యానం కూటస్థావాహనం కుతః |
క్వాసనం విశ్వసంస్థస్య పాద్యం పూతాత్మనః కుతః || 2 ||
క్వానర్ఘోరుక్రమస్యార్ఘ్యం విష్ణోరాచమనం కుతః |
నిర్మలస్య కుతః స్నానం క్వ నిరావరణేంబరం || 3 ||
స్వసూత్రస్య కుతః సూత్రం నిర్మలస్య చ లేపనం |
నిస్తృషః సుమనోభిః కిం కిమక్లేద్యస్య ధూపతః || 4 ||
స్వప్రకాశస్య దీపైః కిం కిం భక్ష్యాద్యైర్జగద్భృతః |
కిం దేయం పరితృప్తస్య విరాజః క్వ ప్రదక్షిణాః || 5 ||
కిమనంతస్య నతిభిః స్తౌతి కో వాగగోచరం |
అంతర్బహిః ప్రపూర్ణస్య కథముద్వాసనం భవేత్ || 6 ||
సర్వతోఽపీత్యసంభావ్యో భావ్యతే భక్తిభావనః |
సేవ్యసేవకభావేన భక్తైర్లీలానృవిగ్రహః || 7 ||
తవేశాతీంద్రియస్యాపి పారంపర్యాశ్రుతాం తనుం |
ప్రకల్ప్యాశ్మాదావర్చంతి ప్రార్చయేఽర్చాం మనోమయీం || 8 ||
కలసుశ్లోకగీతేన భగవన్ దత్త జాగృహి |
భక్తవత్సల సామీప్యం కురు మే మానసార్చనే || 9 ||
శ్రీదత్తం ఖేచరీముద్రాముద్రితం యోగిసద్గురుం |
సిద్ధాసనస్థం ధ్యాయేఽభీవరప్రదకరం హరిం || 10 ||
దత్తాత్రేయాహ్వయాంయత్ర పరివారైః సహార్చనే |
శ్రద్ధాభక్త్యేశ్వరాగచ్ఛ ధ్యాతధాంనాంజసా విభో || 11 ||
సౌవర్ణం రత్నజడితం కల్పితం దేవతామయం |
రంయం సింహాసనం దత్త తత్రోపవిశ యంత్రితే || 12 ||
పాద్యం చందనకర్పూరసురభి స్వాదు వారి తే |
గృహాణ కల్పితం తేన దత్తాంఘ్రీ క్షాలయామి తే || 13 ||
గంధాబ్జతులసీబిల్వశమీపత్రాక్షతాన్వితం |
సాంబ్వర్ఘ్యం స్వర్ణపాత్రేణ కల్పితం దత్త గృహ్యతాం || 14 ||
సుస్వాద్వాచమనీయాంబు హైమపాత్రేణ కల్పితం |
తుభ్యమాచంయతాం దత్త మధుపర్కం గృహాణ చ || 15 ||
పుష్పవాసితసత్తైలమంగేష్వాలిప్య దత్త భోః |
పంచామృతైశ్చ గాంగాద్భిః స్నానం తే కల్పయాంయహం || 16 ||
భక్త్యా దిగంబరాచాంత జలేదం దత్త కల్పితం |
కాషాయపరిధానం తద్గృహాణైణేయచర్మ చ || 17 ||
నానాసూత్రధరైతే తే బ్రహ్మసూత్రే ప్రకల్పితే |
గృహాణ దైవతమయే శ్రీదత్త నవతంతుకే || 18 ||
భూతిమృత్స్నాసుకస్తూరీకేశరాన్వితచందనం |
రత్నాక్షతాః కల్పితాస్త్వామలంకుర్వేఽథ దత్త తైః || 19 ||
సచ్ఛమీబిల్వతులసీపత్రైః సౌగంధికైః సుమైః |
మనసా కల్పితైర్నానావిధైర్దత్తార్చయాంయహం || 20 ||
లాక్షాసితాభ్రశ్రీవాసశ్రీఖండాగరుగుగ్గులైః |
యుక్తోఽగ్నియోజితో ధూపో హృదా స్వీకురు దత్త తం || 21 ||
స్వర్ణపాత్రే గోఘృతాక్తవర్తిప్రజ్వాలితం హృదా |
దీపం దత్త సకర్పూరం గృహాణ స్వప్రకాశక || 22 ||
సషడ్రసం షడ్విధాన్నం నైవేద్యం గవ్యసంయుతం |
కల్పితం హైమపాత్రే తే భుంక్ష్వ దత్తాంబ్వదః పిబ || 23 ||
ప్రక్షాల్యాస్యం కరౌ చాద్భిర్దత్తాచంయ ప్రగృహ్యతాం |
తాంబూలం దక్షిణాం హైమీం కల్పితాని ఫలాని చ || 24 ||
నీరాజ్య రత్నదీపైస్త్వాం ప్రణంయ మనసా చ తే |
పరితస్త్వత్కథోద్ఘాతైః కుర్వే దత్త ప్రదక్షిణాః || 25 ||
మంత్రవన్నిహితో మూర్ధ్ని దత్త తే కుసుమాంజలిః |
కల్ప్యంతే మనసా గీతవాద్యనృత్యోపచారకాః || 26 ||
ప్రేర్యమాణప్రేరకేణ త్వయా దత్తేరితేన తే |
కృతేయం మనసా పూజా శ్రీమంస్తుష్టో భవానయా || 27 ||
దత్త మానసతల్పే మే సుఖనిద్రాం రహః కురు |
రంయే వ్యాయతభక్త్యామతూలికాఢ్యే సువీజితే || 28 ||
ఇతి శ్రీవాసుదేవానందసరస్వతీ విరచితం శ్రీ దత్త మానసపూజా |