ఓం అస్య శ్రీ ఆపదుద్ధారక హనుమత్ స్తోత్ర మహామంత్ర కవచస్య, విభీషణ ఋషిః, హనుమాన్ దేవతా, సర్వాపదుద్ధారక శ్రీహనుమత్ప్రసాదేన మమ సర్వాపన్నివృత్త్యర్థే, సర్వకార్యానుకూల్య సిద్ధ్యర్థే జపే వినియోగః |
ధ్యానం |
వామే కరే వైరిభిదం వహన్తం
శైలం పరే శృంఖలహారిటంకం |
దధానమచ్ఛచ్ఛవియజ్ఞసూత్రం
భజే జ్వలత్కుండలమాంజనేయం || 1 ||
సంవీతకౌపీన ముదంచితాంగుళిం
సముజ్జ్వలన్మౌంజిమథోపవీతినం |
సకుండలం లంబిశిఖాసమావృతం
తమాంజనేయం శరణం ప్రపద్యే || 2 ||
ఆపన్నాఖిలలోకార్తిహారిణే శ్రీహనూమతే |
అకస్మాదాగతోత్పాత నాశనాయ నమో నమః || 3 ||
సీతావియుక్తశ్రీరామశోకదుఃఖభయాపహ |
తాపత్రితయసంహారిన్ ఆంజనేయ నమోఽస్తు తే || 4 ||
ఆధివ్యాధి మహామారీ గ్రహపీడాపహారిణే |
ప్రాణాపహర్త్రేదైత్యానాం రామప్రాణాత్మనే నమః || 5 ||
సంసారసాగరావర్త కర్తవ్యభ్రాన్తచేతసాం |
శరణాగతమర్త్యానాం శరణ్యాయ నమోఽస్తు తే || 6 ||
వజ్రదేహాయ కాలాగ్నిరుద్రాయాఽమితతేజసే |
బ్రహ్మాస్త్రస్తంభనాయాస్మై నమః శ్రీరుద్రమూర్తయే || 7 ||
రామేష్టం కరుణాపూర్ణం హనూమన్తం భయాపహం |
శత్రునాశకరం భీమం సర్వాభీష్టప్రదాయకం || 8 ||
కారాగృహే ప్రయాణే వా సంగ్రామే శత్రుసంకటే |
జలే స్థలే తథాఽఽకాశే వాహనేషు చతుష్పథే || 9 ||
గజసింహ మహావ్యాఘ్ర చోర భీషణ కాననే |
యే స్మరంతి హనూమన్తం తేషాం నాస్తి విపత్ క్వచిత్ || 10 ||
సర్వవానరముఖ్యానాం ప్రాణభూతాత్మనే నమః |
శరణ్యాయ వరేణ్యాయ వాయుపుత్రాయ తే నమః || 11 ||
ప్రదోషే వా ప్రభాతే వా యే స్మరంత్యంజనాసుతం |
అర్థసిద్ధిం జయం కీర్తిం ప్రాప్నువంతి న సంశయః || 12 ||
జప్త్వా స్తోత్రమిదం మంత్రం ప్రతివారం పఠేన్నరః |
రాజస్థానే సభాస్థానే ప్రాప్తే వాదే లభేజ్జయం || 13 ||
విభీషణకృతం స్తోత్రం యః పఠేత్ ప్రయతో నరః |
సర్వాపద్భ్యో విముచ్యేత నాఽత్ర కార్యా విచారణా || 14 ||
మంత్రః |
మర్కటేశ మహోత్సాహ సర్వశోకనివారక |
శత్రూన్ సంహర మాం రక్ష శ్రియం దాపయ భో హరే || 15
ఇతి విభీషణకృతం సర్వాపదుద్ధారక శ్రీహనుమత్ స్తోత్రం ||