విక్రమపాండ్య ఉవాచ-
కల్యాణాచలకోదండకాంతదోర్దండమండితం |
కబళీకృతసంసారం కలయేఽట్టాలసుందరం || 1 ||
కాలకూటప్రభాజాలకళంకీకృతకంధరం |
కలాధరం కలామౌళిం కలయేఽట్టాలసుందరం || 2 ||
కాలకాలం కళాతీతం కలావంతం చ నిష్కళం |
కమలాపతిసంస్తుత్యం కలయేఽట్టాలసుందరం || 3 ||
కాంతార్ధం కమనీయాంగం కరుణామృతసాగరం |
కలికల్మషదోషఘ్నం కలయేఽట్టాలసుందరం || 4 ||
కదంబకాననాధీశం కాంక్షితార్థసురద్రుమం |
కామశాసనమీశానం కలయేఽట్టాలసుందరం || 5 ||
సృష్టాని మాయయా యేన బ్రహ్మాండాని బహూని చ |
రక్షితాని హతాన్యంతే కలయేఽట్టాలసుందరం || 6 ||
స్వభక్తజనసంతాపపాపాపద్భంగతత్పరం |
కారణం సర్వజగతాం కలయేఽట్టాలసుందరం || 7 ||
కులశేఖరవంశోత్థభూపానాం కులదైవతం |
పరిపూర్ణం చిదానందం కలయేఽట్టాలసుందరం || 8 ||
అట్టాలవీరశ్రీశంభోరష్టకం వరమిష్టదం |
పఠతాం శృణ్వతాం సద్యస్తనోతు పరమాం శ్రియం || 9 ||
ఇతి శ్రీహాలాస్యమాహాత్ంయే విక్రమపాండ్యకృతం అట్టాలసుందరాష్టకం |