అంబరీష ఉవాచ |
త్వమగ్నిర్భగవాన్ సూర్యస్త్వం సోమో జ్యోతిషాం పతిః |
త్వమాపస్త్వం క్షితిర్వ్యోమ వాయుర్మాత్రేంద్రియాణి చ || 1 ||
సుదర్శన నమస్తుభ్యం సహస్రారాచ్యుతప్రియ |
సర్వాస్త్రఘాతిన్ విప్రాయ స్వస్తి భూయా ఇడస్పతే || 2 ||
త్వం ధర్మస్త్వమృతం సత్యం త్వం యజ్ఞోఽఖిలయజ్ఞభుక్ |
త్వం లోకపాలః సర్వాత్మా త్వం తేజః పౌరుషం పరం || 3 ||
నమః సునాభాఖిలధర్మసేతవే
హ్యధర్మశీలాసురధూమకేతవే |
త్రైలోక్యగోపాయ విశుద్ధవర్చసే
మనోజవాయాద్భుతకర్మణే గృణే || 4 ||
త్వత్తేజసా ధర్మమయేన సంహృతం
తమః ప్రకాశశ్చ ధృతో మహాత్మనాం |
దురత్యయస్తే మహిమా గిరాం పతే
త్వద్రూపమేతత్ సదసత్ పరావరం || 5 ||
యదా విసృష్టస్త్వమనంజనేన వై
బలం ప్రవిష్టోఽజిత దైత్యదానవం |
బాహూదరోర్వంఘ్రిశిరోధరాణి
వృక్ణన్నజస్రం ప్రధనే విరాజసే || 6 ||
స త్వం జగత్త్రాణ ఖలప్రహాణయే
నిరూపితః సర్వసహో గదాభృతా |
విప్రస్య చాస్మత్కులదైవహేతవే
విధేహి భద్రం తదనుగ్రహో హి నః || 7 ||
యద్యస్తి దత్తమిష్టం వా స్వధర్మో వా స్వనుష్ఠితః |
కులం నో విప్రదైవం చేద్ద్విజో భవతు విజ్వరః || 8 ||
యది నో భగవాన్ ప్రీత ఏకః సర్వగుణాశ్రయః |
సర్వభూతాత్మభావేన ద్విజో భవతు విజ్వరః || 9 ||
ఇతి శ్రీమద్భాగవతే నవమస్కంధే పంచమోఽధ్యాయే అంబరీష కృత శ్రీ సుదర్శన స్తోత్రం |