దేవర్షయ ఊచుః |
నమస్తే శిఖివాహాయ మయూరధ్వజధారిణే |
మయూరేశ్వరనాంనే వై గణేశాయ నమో నమః || 1 ||
అనాథానాం ప్రణాథాయ గతాహంకారిణాం పతే |
మాయాప్రచాలకాయైవ విఘ్నేశాయ నమో నమః || 2 ||
సర్వానందప్రదాత్రే తే సదా స్వానందవాసినే |
స్వస్వధర్మరతానాం చ పాలకాయ నమో నమః || 3 ||
అనాదయే పరేశాయ దైత్యదానవమర్దినే |
విధర్మస్థస్వభావానాం హర్త్రే వికట తే నమః || 4 ||
శివపుత్రాయ సర్వేషాం మాత్రే పిత్రే నమో నమః |
పార్వతీనందనాయైవ స్కందాగ్రజ నమో నమః || 5 ||
నానావతారరూపైస్తు విశ్వసంస్థాకరాయ తే |
కాశ్యపాయ నమస్తుభ్యం శేషపుత్రాయ తే నమః || 6 ||
సింధుహంత్రే చ హేరంబాయ పరశుధరాయ తే |
దేవదేవేశ పాలాయ బ్రహ్మణాం పతయే నమః || 7 ||
యోగేశాయ సుశాంతిభ్యః శాంతిదాత్రే కృపాళవే |
అనంతాననబాహో తేఽనంతోదర నమో నమః || 8 ||
అనంతవిభవాయైవ చిత్తవృత్తిప్రచాలక |
సర్వహృత్స్థాయ సర్వేషాం పూజ్యాయ తే నమో నమః || 9 ||
సర్వాదిపూజ్యరూపాయ జ్యేష్ఠరాజాయ తే నమః |
గణానాం పతయే చైవ సిద్ధిబుద్ధివరాయ చ || 10 ||
కిం స్తుమస్త్వాం మయూరేశ యత్ర వేదాదయః ప్రభో |
యోగినః శాంతిమాపన్నా అతో నమామహే వయం || 11 ||
తేన తుష్టో భవ స్వామిన్ దయాఘన ప్రవర్తక |
త్వదీయాంగసముద్భూతాన్ రక్ష నో నిత్యదా ప్రభో || 12 ||
ఏవం స్తుత్వా ప్రణేముస్తం తతో దేవోఽబ్రవీన్ స తాన్ |
వరాన్ వృణుత దేవేశా మునిభిశ్చ సమన్వితాః || 13 ||
భవత్కృతమిదం స్తోత్రం సర్వసిద్ధిప్రదాయకం |
భవిష్యతి మహాభాగా మమ ప్రీతివివర్ధనం || 14 ||
యః పఠేచ్ఛృణుయాద్వాపి శ్రావయేత్స లభత్ పరాం |
భుక్తిం ముక్తిం మదీయాం తు నరో భక్తిం న సంశయః || 15 ||
ఇతి శ్రీమన్ముద్గలే మహాపురాణే షష్ఠే ఖండే శ్రీ మయూరేశ స్తుతిః |