శ్రీవిభాండక ఉవాచ |
వరాహదేహసంభూతే గిరిజే పాపభంజిని |
దర్శనాన్ముక్తిదే దేవి మహాపాతకినామపి || 1 ||
వాగ్దేవీ త్వం మహాలక్ష్మీః గిరిజాసి శచీ తథా |
ప్రభా సూర్యస్య దేవేశి మరీచిస్త్వం కలానిధేః || 2 ||
పర్జన్యస్య యథా విద్యుద్విష్ణోర్మాయా త్వమేవ హి |
తృణగుల్మలతావృక్షాః సిద్ధా దేవా ఉదీరితాః || 3 ||
దృష్టా స్పృష్టా తథా పీతా వందితా చావగాహితా |
ముక్తిదే పాపినాం దేవి శతకృత్వో నమో నమః || 4 ||
మాండవ్య ఉవాచ |
నమస్తే తుంగభద్రాయై నమస్తే హరిదేహజే |
నమస్తే వేదగిరిజే శ్రీశైలపదభాజిని || 1 ||
విష్ణుమాయే విష్ణురూపే విష్వక్సేనప్రియేఽనఘే |
విశ్వంభరే విశాలాక్షి విలసత్కూలసంయుతే |
విలోకయ వినోదేన కురు మాం విగతైనసం || 2 ||
త్వద్వాతవీజితా భూతా విమలాఘా భవంతి హి |
దర్శనాత్ స్పర్శనాత్ పానాద్వక్తవ్యం కిం ను విద్యతే || 3 ||
దృష్ట్వా జన్మశతం పాపం స్పృష్ట్వా జన్మశతత్రయం |
పీత్వా జన్మసహస్రాణాం పాపం నాశయ మంగళే || 4 ||
పుత్రాన్ దారాన్ ధనం ధాన్యం పశువస్త్రాణి యే నరాః |
కామాన్మజ్జనశీలాస్తే యాంతి తత్ఫలమంజసా |
భుక్త్వా యాంతి హరేః స్థానం యావదాచంద్రతారకం || 5 ||
ఇతి బ్రహ్మాండపురాణే తుంగభద్రామాహాత్ంయే శ్రీ తుంగభద్రా స్తుతిః |