అద్య మే సఫలం జన్మ చాద్య మే సఫలం తపః |
అద్య మే సఫలం జ్ఞానం శంభో త్వత్పాదదర్శనాత్ || 1 ||
కృతార్థోఽహం కృతార్థోఽహం కృతార్థోఽహం మహేశ్వర |
అద్య తే పాదపద్మస్య దర్శనాద్భక్తవత్సల || 2 ||
శివః శంభుః శివః శంభుః శివః శంభుః శివః శివః |
ఇతి వ్యాహరతో నిత్యం దినాన్యాయాంతు యాంతు మే || 3 ||
శివే భక్తిః శివే భక్తిః శివే భక్తిర్భవే భవే |
సదా భూయాత్సదా భూయాత్సదా భూయాత్సునిశ్చలా || 4 ||
అజన్మమరణం యస్య మహాదేవాన్యదైవతం |
మా జనిష్యత మద్వంశే జాతో వా ద్రాగ్విపద్యతాం || 5 ||
జాతస్య జాయమానస్య గర్భస్థస్యాపి దేహినః |
మా భూన్మమ కులే జన్మ యస్య శంభుర్న దైవతం || 6 ||
వయం ధన్యా వయం ధన్యా వయం ధన్యా జగత్త్రయే |
ఆదిదేవో మహాదేవో యదస్మత్కులదైవతం || 7 ||
హర శంభో మహాదేవ విశ్వేశామరవల్లభ |
శివశంకర సర్వాత్మన్నీలకంఠ నమోఽస్తు తే || 8 ||
అగస్త్యాష్టకమేతత్తు యః పఠేచ్ఛివసన్నిధౌ |
శివలోకమవాప్నోతి శివేన సహ మోదతే || 9 ||