ఓమంఘ్రిపద్మమకరందకులామృతం తే
నిత్యం భజంతి దివి యత్సురసిద్ధసంఘాః |
జ్ఞాత్వామృతం చ కణశస్తదహం భజామి
శ్రీవల్లభేశ మమ దేహి కరావలంబం || 1 ||
శ్రీమాతృసూనుమధునా శరణం ప్రపద్యే
దారిద్ర్యదుఃఖశమనం కురు మే గణేశ |
మత్సంకటం చ సకలం హర విఘ్నరాజ
శ్రీవల్లభేశ మమ దేహి కరావలంబం || 2 ||
గంగాధరాత్మజ వినాయక బాలమూర్తే
వ్యాధిం జవేన వినివారయ ఫాలచంద్ర |
విజ్ఞానదృష్టిమనిశం మయి సన్నిధేహి
శ్రీవల్లభేశ మమ దేహి కరావలంబం || 3 ||
గణ్యం మదీయభవనం చ విధాయ దృష్ట్యా
మద్దారపుత్రతనయాన్ సహజాంశ్చ సర్వాన్ |
ఆగత్య చాశు పరిపాలయ శూర్పకర్ణ
శ్రీవల్లభేశ మమ దేహి కరావలంబం || 4 ||
ణాకారమంత్రఘటితం తవ యంత్రరాజం
భక్త్యా స్మరామి సతతం దిశ సంపదో మే |
ఉద్యోగసిద్ధిమతులాం కవితాం చ లక్ష్మీం
శ్రీవల్లభేశ మమ దేహి కరావలంబం || 5 ||
పాదాదికేశమఖిలం సుధయా చ పూర్ణం
కోశాగ్నిపంచకమిదం శివభూతబీజం |
త్వద్రూపవైభవమహో జనతా న వేత్తి
శ్రీవల్లభేశ మమ దేహి కరావలంబం || 6 ||
తాపత్రయం మమ హరామృతదృష్టివృష్ట్యా
పాపం వ్యపోహయ గజానన చాపదో మే |
దుష్టం విధాతృలిఖితం పరిమార్జయాశు
శ్రీవల్లభేశ మమ దేహి కరావలంబం || 7 ||
యే త్వాం విదంతి శివకల్పతరుం ప్రశస్తం
తేభ్యో దదాసి కుశలం నిఖిలార్థలాభం |
మహ్యం తదైవ సకలం దిశ వక్రతుండ
శ్రీవల్లభేశ మమ దేహి కరావలంబం || 8 ||
నాదాంతవేద్యమమలం తవ పాదపద్మం
నిత్యం భజే విబుధ షట్పదసేవ్యమానం |
సత్తాశమాద్యమఖిలం దిశ మే గణేశ
శ్రీవల్లభేశ మమ దేహి కరావలంబం || 9 ||
మోదామృతేన తవ మాం స్నపయాశు బాలం
పాపాబ్ధిపంకలులితం చ సహాయహీనం |
వస్త్రాదిభూషణధనాని చ వాహనాదీన్
శ్రీవల్లభేశ మమ దేహి కరావలంబం || 10 ||
శ్రీవల్లభేశదశకం హఠయోగసాధ్యం
హేరంబ తే భగవతీశ్వర భృంగనాదం |
శృత్వానిశం శ్రుతివిదః కులయోగినో యే
భూతిప్రదం భువి జనాః సుధియో రమంతాం || 11 ||