వాసుదేవమహేశాత్మ-కృష్ణవేణీధునీస్వసా |
స్వసారాద్యా జనోద్ధర్త్రీ పుత్రీ సహ్యస్య గౌతమీ || 1 ||
సురర్షివంద్యా భువనేనవద్యా
యాద్యాత్ర నద్యాశ్రితపాపహంత్రీ |
దేవేన యా కృత్రిమగోవధోత్థ-
దోషాపనుత్యే మునయే ప్రదత్తా || 2 ||
వార్యుత్తమం యే ప్రపిబన్తి మర్త్యా-
యస్యాః సకృత్తోఽపి భవన్త్యమర్త్యాః |
నన్దన్త ఊర్ధ్వం చ యదాప్లవేన
నరా దృఢేనేవ సవప్లవేన || 3 ||
దర్శనమాత్రేణ ముదా గతిదా గోదావరీ వరీవర్త్రి |
సమవర్తివిహాయద్రోధాసీ ముక్తిః సతీ నరీనర్తి || 4 ||
రంయే వసతామసతామపి యత్తీరే హి సా గతిర్భవతి |
స్వచ్ఛాన్తరోర్ధ్వరేతోయోగోమునీనాం హి సా గతిర్భవతి || 5 ||
తీవ్రతాపప్రశమనీ సా పునాతు మహాధునీ |
మునీడ్యా ధర్మజననీ పావనీ నోద్యతాశినీ || 6 ||
సదా గోదార్తిహా గంగా జన్తుతాపాపహారిణీ |
మోదాస్పదా మహాభంగా పాతు పాపాపహారిణీ || 7 ||
గోదా మోదాస్పదా మే భవతు
వరవతా దేవదేవర్షివన్ద్యా |
పారావారాగ్ర్యరామా జయతి
యతియమీట్సేవితా విశ్వవిత్తా || 8 ||
పాపాద్యా పాత్యపాపా
ధృతిమతిగతిదా కోపతాపాభ్యపఘ్నీ |
వందే తాం దేవదేహాం
మలకులదలనీం పావనీం వన్ద్యవన్ద్యాం || 9 ||
ఇతి శ్రీమత్పరమహంస పరివ్రాజకాచార్య శ్రీవాసుదేవానందసరస్వతీ విరచితం శ్రీగోదాష్టకం |