Jatayu Kruta Sri Rama Stotram pdf download – శ్రీ రామ స్తుతిః (జటాయు కృతం)

జటాయురువాచ |
అగణితగుణమప్రమేయమాద్యం
సకలజగత్స్థితిసంయమాదిహేతుం |
ఉపరమపరమం పరమాత్మభూతం
సతతమహం ప్రణతోఽస్మి రామచంద్రం || 1 ||
నిరవధిసుఖమిందిరాకటాక్షం
క్షపితసురేంద్రచతుర్ముఖాదిదుఃఖం |
నరవరమనిశం నతోఽస్మి రామం
వరదమహం వరచాపబాణహస్తం || 2 ||
త్రిభువనకమనీయరూపమీడ్యం
రవిశతభాసురమీహితప్రదానం |
శరణదమనిశం సురాగమూలే
కృతనిలయం రఘునందనం ప్రపద్యే || 3 ||
భవవిపినదవాగ్నినామధేయం
భవముఖదైవతదైవతం దయాలుం |
దనుజపతిసహస్రకోటినాశం
రవితనయాసదృశం హరిం ప్రపద్యే || 4 ||
అవిరతభవభావనాతిదూరం
భవవిముఖైర్మునిభిః సదైవ దృశ్యం |
భవజలధిసుతారణాంఘ్రిపోతం
శరణమహం రఘునందనం ప్రపద్యే || 5 ||
గిరిశగిరిసుతామనోనివాసం
గిరివరధారిణమీహితాభిరామం |
సురవరదనుజేంద్రసేవితాంఘ్రిం
సురవరదం రఘునాయకం ప్రపద్యే || 6 ||
పరధనపరదారవర్జితానాం
పరగుణభూతిషు తుష్టమానసానాం |
పరహితనిరతాత్మనాం సుసేవ్యం
రఘువరమంబుజలోచనం ప్రపద్యే || 7 ||
స్మితరుచిరవికాసితాననాబ్జ-
-మతిసులభం సురరాజనీలనీలం |
సితజలరుహచారునేత్రశోభం
రఘుపతిమీశగురోర్గురుం ప్రపద్యే || 8 ||
హరికమలజశంభురూపభేదా-
-త్త్వమిహ విభాసి గుణత్రయానువృత్తః |
రవిరివ జలపూరితోదపాత్రే-
-ష్వమరపతిస్తుతిపాత్రమీశమీడే || 9 ||
రతిపతిశతకోటిసుందరాంగం
శతపథగోచరభావనావిదూరం |
యతిపతిహృదయే సదా విభాతం
రఘుపతిమార్తిహరం ప్రభుం ప్రపద్యే || 10 ||
ఇత్యేవం స్తువతస్తస్య ప్రసన్నోఽభూద్రఘూత్తమః |
ఉవాచ గచ్ఛ భద్రం తే మమ విష్ణోః పరం పదం || 11 ||
శృణోతి య ఇదం స్తోత్రం లిఖేద్వా నియతః పఠేత్ |
స యాతి మమ సారూప్యం మరణే మత్ స్మృతిం లభేత్ || 12 ||
ఇతి రాఘవభాషితం తదా
శ్రుతవాన్ హర్షసమాకులో ద్విజః ||
రఘునందనసాంయమాస్థితః
ప్రయయౌ బ్రహ్మసుపూజితం పదం || 13 ||
ఇతి శ్రీమదధ్యాత్మరామాయణే అరణ్యకాండే అష్టమసర్గే జటాయు కృత శ్రీ రామ స్తోత్రం ||