Tripurasundari Veda Pada Stava pdf download – శ్రీ త్రిపురసుందరీ వేదపాద స్తవః

వేదపాదస్తవం వక్ష్యే దేవ్యాః ప్రియచికీర్షయా |
యథామతి మతిం దేవస్తన్నో దంతిః ప్రచోదయాత్ || 1 ||
అకించిత్కరకర్మభ్యః ప్రత్యాహృత్య కృపావశాత్ |
సుబ్రహ్మణ్యః స్తుతావస్యాం తన్నః షణ్ముఖః ప్రచోదయాత్ || 2 ||
అకారాదిక్షకారాంతవర్ణావయవశాలినీ |
వీణాపుస్తకహస్తావ్యాత్ప్రణో దేవీ సరస్వతీ || 3 ||
యా వర్ణపదవాక్యార్థగద్యపద్యస్వరూపిణీ |
వాచి నర్తయతు క్షిప్రం మేధాం దేవీ సరస్వతీ || 4 ||
ఉపాస్యమానా విప్రేంద్రైః సంధ్యాసు చ తిసృష్వపి |
సద్యః ప్రసీద మే మాతః సంధ్యావిద్యే సరస్వతీ || 5 ||
మందా నిందాలోలుపాహం స్వభావా-
-దేతత్స్తోత్రం పూర్యతే కిం మయేతి |
మా తే భీతిర్హే మతే త్వాదృశానా-
-మేషా నేత్రీ రాధసా సూనృతానాం || 6 ||
తరంగభ్రుకుటీకోటిభంగ్యా తర్జయతే జరాం |
సుధామయాయ శుభ్రాయ సింధూనాం పతయే నమః || 7 ||
తస్య మధ్యే మణిద్వీపః కల్పకారామభూషితః |
అస్తు మే లలితావాసః స్వస్తిదా అభయంకరః || 8 ||
కదంబమంజరీనిర్యద్వారుణీపారణోన్మదైః |
ద్విరేఫైర్వర్ణనీయాయ వనానాం పతయే నమః || 9 ||
తత్ర వప్రావలీ లీలా గగనోల్లంఘిగోపురం |
మాతః కౌతూహలం దద్యాత్సగ్ంహార్యం నగరం తవ || 10 ||
మకరందఝరీమజ్జన్మిలిందకులసంకులాం |
మహాపద్మాటవీం వందే యశసా సంపరీవృతాం || 11 ||
తత్రైవ చింతామణిధోరణార్చిభి-
-ర్వినిర్మితం రోపితరత్నశృంగం |
భజే భవానీభవనావతంస-
-మాదిత్యవర్ణం తమసః పరస్తాత్ || 12 ||
మునిభిః స్వాత్మలాభాయ యచ్చక్రం హృది సేవ్యతే |
తత్ర పశ్యామి బుద్ధ్యా తదక్షరే పరమే వ్యోమన్ || 13 ||
పంచబ్రహ్మమయో మంచస్తత్ర యో బిందుమధ్యగః |
తవ కామేశి వాసోఽయమాయుష్మంతం కరోతు మాం || 14 ||
నానారత్నగులుచ్ఛాలీకాంతికింమీలితోదరం |
విమృశామి వితానం తేఽతిశ్లక్ష్ణమతిలోమశం || 15 ||
పర్యంకతల్పోపరి దర్శనీయం
సబాణచాపాంకుశపాశపాణిం |
అశేషభూషారమణీయమీడే
త్రిలోచనం నీలకంఠం ప్రశాంతం || 16 ||
జటారుణం చంద్రకలాలలామం
ఉద్వేలలావణ్యకలాభిరామం |
కామేశ్వరం కామశరాసనాంకం
సమస్తసాక్షిం తమసః పరస్తాత్ || 17 ||
తత్ర కామేశవామాంకే ఖేలంతీమలికుంతలాం |
సచ్చిదానందలహరీం మహాలక్ష్మీముపాస్మహే || 18 ||
చారుగోరోచనాపంకజంబాలితఘనస్తనీం |
నమామి త్వామహం లోకమాతరం పద్మమాలినీం || 19 ||
శివే నమన్నిర్జరకుంజరాసుర-
-ప్రతోలికామౌలిమరీచివీచిభిః |
ఇదం తవ క్షాలనజాతసౌభగం
చరణం నో లోకే సుధితాం దధాతు || 20 ||
కల్పస్యాదౌ కారణేశానపి త్రీ-
-న్స్రష్టుం దేవి త్రీన్గుణానాదధానాం |
సేవే నిత్యం శ్రేయసే భూయసే త్వా-
-మజామేకాం లోహితశుక్లకృష్ణాం || 21 ||
కేశోద్భూతైరద్భుతామోదపూరై-
-రాశాబృందం సాంద్రమాపూరయంతీం |
త్వామానంయ త్వత్ప్రసాదాత్స్వయంభూ-
-రస్మాన్మాయీ సృజతే విశ్వమేతత్ || 22 ||
అర్ధోన్మీలద్యౌవనోద్దామదర్పాం
దివ్యాకల్పైరర్పయంతీం మయూఖాన్ |
దేవి ధ్యాత్వా త్వాం పురా కైటభారి-
-ర్విశ్వం బిభర్తి భువనస్య నాభిః || 23 ||
కల్హారశ్రీమంజరీపుంజరీతిం
ధిక్కుర్వంతీమంబ తే పాటలింనా |
మూర్తిం ధ్యాత్వా శాశ్వతీం భూతిమాయ-
-న్నింద్రో రాజా జగతో య ఈశే || 24 ||
దేవతాంతరమంత్రౌఘజపశ్రీఫలభూతయా |
జాపకస్తవ దేవ్యంతే విద్యయా విందతేఽమృతం || 25 ||
పుంస్కోకిలకలక్వాణకోమలాలాపశాలిని |
భద్రాణి కురు మే మాతర్దురితాని పరాసువ || 26 ||
అంతేవాసిన్నస్తి చేత్తే ముముక్షా
వక్ష్యే యుక్తిం ముక్తసర్వైషణః సన్ |
సద్భ్యః సాక్షాత్సుందరీం జ్ఞప్తిరూపాం
శ్రద్ధాభక్తిధ్యానయోగాదవేహి || 27 ||
షోఢాన్యాసాదిదేవైశ్చ సేవితా చక్రమధ్యగా |
కామేశమహిషీ భూయః షోడశీ శర్మ యచ్ఛతు || 28 ||
శాంతో దాంతో దేశికేంద్రం ప్రణంయ
తస్యాదేశాత్తారకం మంత్రతత్త్వం |
జానీతే చేదంబ ధన్యః సమానం
నాతః పరం వేదితవ్యం హి కించిత్ || 29 ||
త్వమేవ కారణం కార్యం క్రియా జ్ఞానం త్వమేవ చ |
త్వామంబ న వినా కించిత్త్వయి సర్వం ప్రతిష్ఠితం || 30 ||
పరాగమద్రీంద్రసుతే తవాంఘ్రి-
-సరోజయోరంబ దధామి మూర్ధ్నా |
అలంకృతం వేదవధూశిరోభి-
-ర్యతో జాతో భువనాని విశ్వా || 31 ||
దుష్టాన్దైత్యాన్హంతుకామాం మహర్షీన్
శిష్టానన్యాన్పాతుకామాం కరాబ్జైః |
అష్టాభిస్త్వాం సాయుధైర్భాసమానాం
దుర్గాం దేవీగ్ం శరణమహం ప్రపద్యే || 32 ||
దేవి సర్వానవద్యాంగి త్వామనాదృత్య యే క్రియాః |
కుర్వంతి నిష్ఫలాస్తేషామదుగ్ధా ఇవ ధేనవః || 33 ||
నాహం మన్యే దైవతం మాన్యమన్య-
-త్త్వత్పాదాబ్జాదంబికే కుంభజాద్యాః |
యే ధ్యాతారో భక్తిసంశుద్ధచిత్తాః
పరామృతాత్పరిముచ్యంతి సర్వే || 34 ||
కుర్వాణోఽపి దురారంభాంస్తవ నామాని శాంభవి |
ప్రజపన్నేతి మాయాంతమతి మృత్యుం తరాంయహం || 35 ||
కల్యాణి త్వం కుందహాసప్రకాశై-
-రంతర్ధ్వాంతం నాశయంతీ క్షణేన |
హంతాస్మాకం ధ్యాయతాం త్వత్పదాబ్జ-
-ముచ్చతిష్ఠ మహతే సౌభగాయ || 36 ||
తితీర్షయా భవాంభోధేర్హయగ్రీవాదయః పురా |
అప్రమత్తా భవత్పూజాం సువిద్వాంసో వితేనిరే || 37 ||
మద్వశ్యా యే దురాచారా యే చ సన్మార్గగామినః |
భవత్యాః కృపయా సర్వే సువర్యంతు యజమానాః || 38 ||
శ్రీచక్రస్థాం శాశ్వతైశ్వర్యదాత్రీం
పౌండ్రం చాపం పుష్పబాణాన్దధానాం |
బంధూకాభాం భావయామి త్రినేత్రాం
తామగ్నివర్ణాం తపసా జ్వలంతీం || 39 ||
భవాని తవ పాదాబ్జనిర్ణేజనపవిత్రతాః |
భవామయప్రశాంత్యై త్వామపో యాచామి భేషజం || 40 ||
చిదానందసుధాంభోధేస్తవానందలవోఽస్తి యః |
కారణేశైస్త్రిభిః సాకం తద్విశ్వముపజీవతి || 41 ||
నో వా యాగైర్నైవ పూర్తాదికృత్యై-
-ర్నో వా జప్యైర్నో మహద్భిస్తపోభిః |
నో వా యోగైః క్లేశకృద్భిః సుమేధా
నిచాయ్యేమాం శాంతిమత్యంతమేతి || 42 ||
ప్రాతః పాహి మహావిద్యే మధ్యాహ్నే తు మృడప్రియే |
సాయం పాహి జగద్వంద్యే పునర్నః పాహి విశ్వతః || 43 ||
బంధూకాభైర్భానుభిర్భాసయంతీ
విశ్వం శశ్వత్తుంగపీనస్తనార్ధా |
లావణ్యాబ్ధేః సుందరి త్వం ప్రసాదా-
-దాయుః ప్రజాగ్ం రయిమస్మాసు ధేహి || 44 ||
కర్ణాకర్ణయ మే తత్త్వం యా చిచ్ఛక్తిరితీర్యతే |
త్రిర్వదామి ముముక్షూణాం సా కాష్ఠా సా పరా గతిః || 45 ||
వాగ్దేవీతి త్వాం వదంత్యంబ కేచి-
-ల్లక్ష్మీర్గౌరీత్యేవమన్యేఽప్యుశంతి |
శశ్వన్మాతః ప్రత్యగద్వైతరూపాం
శంసంతి కేచిన్నివిదో జనాః || 46 ||
లలితేతి సుధాపూరమాధురీచోరమంబికే |
తవ నామాస్తి యత్తేన జిహ్వా మే మధుమత్తమా || 47 ||
యే సంపన్నాః సాధనైస్తైశ్చత్తుర్భిః
శుశ్రూషాభిర్దేశికం ప్రీణయంతి |
సంయగ్విద్వాన్ శుద్ధసత్త్వాంతరాణాం
తేషామేవైతాం బ్రహ్మవిద్యాం వదేత || 48 ||
అభిచారాదిభిః కృత్యాం యః ప్రేరయతి మయ్యుమే |
తవ హుంకారసంత్రస్తా ప్రత్యక్కర్తారమృచ్ఛతు || 49 ||
జగత్పవిత్రి మామికామపాహరాశు దుర్జరాం |
ప్రసీద మే దయాధునే ప్రశస్తిమంబ నః స్కృధి || 50 ||
కదంబారుణమంబాయా రూపం చింతయ చిత్త మే |
ముంచ పాపీయసీం నిష్ఠాం మా గృధః కస్య స్విద్ధనం || 51 ||
భండభండనలీలాయాం రక్తచందనపంకిలః |
అంకుశస్తవ తం హన్యాద్యశ్చ నో ద్విషతే జనః || 52 ||
రే రే చిత్త త్వం వృధా శోకసింధౌ
మజ్జస్యంతర్వచ్ంయుపాయం విముక్త్యై |
దేవ్యాః పాదౌ పూజయైకాక్షరేణ
తత్తే పదం సంగ్రహేణ బ్రవీంయోం || 53 ||
చంచద్బాలాతపజ్యోత్స్నాకలామండలశాలినే |
ఐక్షవాయ నమో మాతర్బాహుభ్యాం తవ ధన్వనే || 54 ||
తామేవాద్యాం బ్రహ్మవిద్యాముపాసే
మూర్తైర్వేదైః స్తూయమానాం భవానీం |
హంత స్వాత్మత్వేన యాం ముక్తికామో
మత్వా ధీరో హర్షశోకౌ జహాతి || 55 ||
శరణం కరవాణ్యంబ చరణం తవ సుందరి |
శపే త్వత్పాదుకాభ్యాం మే నాన్యః పంథా అయనాయ || 56 ||
రత్నచ్ఛత్రైశ్చామరైర్దర్పణాద్యై-
-శ్చక్రేశానీం సర్వదోపాచరంత్యః |
యోగిన్యోఽన్యాః శక్తయశ్చాణిమాద్యా
యూయం పాతః స్వస్తిభిః సదా నః || 57 ||
దరిద్రం మాం విజానీహి సర్వజ్ఞాసి యతః శివే |
దూరీకృత్యాశు దురితమథా నో వర్ధయా రయిం || 58 ||
మహేశ్వరి మహామంత్రకూటత్రయకలేబరే |
కాదివిద్యాక్షరశ్రేణిముశంతస్త్వా హవామహే || 59 ||
మూలాధారాదూర్ధ్వమంతశ్చరంతీం
భిత్త్వా గ్రంథీన్మూర్ధ్ని నిర్యత్సుధార్ద్రాం |
పశ్యంతస్త్వాం యే చ తృప్తిం లభంతే
తేషాం శాంతిః శాశ్వతీ నేతరేషాం || 60 ||
మహ్యం ద్రుహ్యంతి యే మాతస్త్వద్ధ్యానాసక్తచేతసే |
తానంబ సాయకైరేభిరవ బ్రహ్మద్విషో జహి || 61 ||
త్వద్భక్తానామంబ శాంతైషణానాం
బ్రహ్మిష్ఠానాం దృష్టిపాతేన పూతః |
పాపీయానప్యావృతః స్వర్వధూభిః
శోకాతిగో మోదతే స్వర్గలోకే || 62 ||
సంతు విద్యా జగత్యస్మిన్సంసారభ్రమహేతవః |
భజేఽహం త్వాం యయా విద్వాన్విద్యయామృతమశ్నుతే || 63 ||
విద్వన్ముఖ్యైర్విద్రుమాభం విశాల-
-శ్రోణీశింజన్మేఖలాకింకిణీకం |
చంద్రోత్తంసం చిన్మయం వస్తు కించి-
-ద్విద్ధి త్వమేతన్నిహితం గుహాయాం || 64 ||
న విస్మరామి చిన్మూర్తిమిక్షుకోదండశాలినీం |
మునయః సనకప్రేష్ఠాస్తామాహుః పరమాం గతిం || 65 ||
చక్షుఃప్రేంఖత్ప్రేమకారుణ్యధారాం
హంసజ్యోత్స్నాపూరహృష్యచ్చకోరాం |
యామాశ్లిష్యన్మోదతే దేవదేవః
సా నో దేవీ సుహవా శర్మ యచ్ఛతు || 66 ||
ముంచ వంచకతాం చిత్త పామరం చాపి దైవతం |
గృహాణ పదమంబాయా ఏతదాలంబనం పరం || 67 ||
కా మే భీతిః కా క్షతిః కిం దురాపం
కామేశాంకోత్తుంగపర్యంకసంస్థాం |
తత్త్వాతీతామచ్యుతానందదాత్రీం
దేవీమహం నిరృతిం వందమానః || 68 ||
చింతామణిమయోత్తంసకాంతికంచుకితాననే |
లలితే త్వాం సకృన్నత్వా న బిభేతి కుతశ్చన || 69 ||
తారుణ్యోత్తుంగితకుచే లావణ్యోల్లాసితేక్షణే |
తవాజ్ఞయైవ కామాద్యా మాస్మాన్ప్రాపన్నరాతయః || 70 ||
ఆకర్ణాకృష్టకామాసస్త్రసంజాతం తాపమంబ మే |
ఆచామతు కటాక్షస్తే పర్జన్యో వృష్టిమానివ || 71 ||
కుర్వే గర్వేణాపచారానపారా-
-నద్యప్యంబ త్వత్పదాబ్జం తథాపి |
మన్యే ధన్యే దేవి విద్యావలంబం
మాతేవ పుత్రం బిభృతాస్వేనం || 72 ||
యథోపాస్తిక్షతిర్న స్యాత్తవ చక్రస్య సుందరి |
కృపయా కురు కల్యాణి తథా మే స్వస్తిరాయుషి || 73 ||
చక్రం సేవే తారకం సర్వసిధ్యై
శ్రీమన్మాతః సిద్ధయశ్చాణిమాద్యాః |
నిత్యా ముద్రా శక్తయశ్చాంగదేవ్యో
యస్మిన్దేవా అధి విశ్వే నిషేదుః || 74 ||
సుకుమారే సుఖాకారే సునేత్రే సూక్ష్మమధ్యమే |
సుప్రసన్నా భవ శివే సుమృడీకా సరస్వతీ || 75 ||
విద్యుద్వల్లీకందలీం కల్పయంతీం
మూర్తిం స్ఫూర్త్యా పంకజం ధారయంతీం |
ధ్యాయన్హి త్వాం జాయతే సార్వభౌమో
విశ్వా ఆశాః పృతనాః సంజయంజయన్ || 76 ||
అవిజ్ఞాయ పరాం శక్తిమాత్మభూతాం మహేశ్వరీం |
అహో పతంతి నిరయేష్వేకే చాత్మహనో జనాః || 77 ||
సిందూరాభైః సుందరైరంశుబృందై-
-ర్లాక్షాలక్ష్ంయాం మజ్జయంతీం జగంతి |
హేరంబాంబ త్వాం హృదా లంబతే య-
-స్తస్మై విశః స్వయమేవానమంతే || 78 ||
తవ తత్త్వం విమృశతాం ప్రత్యగద్వైతలక్షణం |
చిదానందఘనాదన్యన్నేహ నానాస్తి కించన || 79 ||
కంఠాత్కుండలినీం నీత్వా సహస్రారం శివే తవ |
న పునర్జాయతే గర్భే సుమేధా అమృతోక్షితః || 80 ||
త్వత్పాదుకానుసంధానప్రాప్తసర్వాత్మతాదృశి |
పూర్ణాహంకృతిమత్యస్మిన్న కర్మ లిప్యతే నరే || 81 ||
తవానుగ్రహనిర్భిన్నహృదయగ్రంథిరద్రిజే |
స్వాత్మత్వేన జగన్మత్వా తతో న విజుగుప్సతే || 82 ||
కదా వసుదలోపేతే త్రికోణనవకాన్వితే |
ఆవాహయామి చక్రే త్వాం సూర్యాభాం శ్రియమైశ్వరీం || 83 ||
హ్రీమిత్యేకం తావకం వాచకార్ణం
యజ్జిహ్వాగ్రే దేవి జాగర్తి కించిత్ |
కో వాయం స్యాత్కామకామస్త్రిలోక్యాం
సర్వేఽస్మై దేవాః బలిమావహంతి || 84 ||
నాకస్త్రీణాం కిన్నరీణాం నృపాణా-
-మప్యాకర్షీ చేతసా చింతనీయం |
త్వత్పాణిస్థం కుంకుమాభం శివే యం
ద్విష్మస్తస్మిన్ప్రతి ముంచామి పాశం || 85 ||
నూనం సింహాసనేశ్వర్యాస్తవాజ్ఞాం శిరసా వహన్ |
భయేన పవమానోఽయం సర్వా దిశోఽనువిధావతి || 86 ||
త్రికలాఢ్యాం త్రిహృల్లేఖాం ద్విహంసస్వరభూషితాం |
యో జపత్యంబ తే విద్యాం సోఽక్షరః పరమః స్వరాట్ || 87 ||
దారిద్ర్యాబ్ధౌ దేవి మగ్నోఽపి శశ్వ-
-ద్వాచా యాచే నాహమంబ త్వదన్యం |
తస్మాదస్మద్వాంఛితం పూరయైత-
-దుషా సా నక్తా సుదుఘేవ ధేనుః || 88 ||
యో వా యద్యత్కామనాకృష్టచిత్తః
స్తుత్వోపాస్తే దేవి తే చక్రవిద్యాం |
కల్యాణానామాలయః కాలయోగా-
-త్తం తం లోకం జయతే తాంశ్చ కామాన్ || 89 ||
సాధకః సతతం కుర్యాదైక్యం శ్రీచక్రదేహయోః |
తథా దేవ్యాత్మనోరైక్యమేతావదనుశాసనం || 90 ||
హస్తాంభోజప్రోల్లసచ్చామరాభ్యాం
శ్రీవాణీభ్యాం పార్శ్వయోర్వీజ్యమానాం |
శ్రీసంంరాజ్ఞి త్వాం సదాలోకయేయం
సదా సద్భిః సేవ్యమానాం నిగూఢాం || 91 ||
ఇష్టానిష్టప్రాప్తివిచ్ఛిత్తిహేతుః
స్తోతుం వాచాం క్లుప్తిరిత్యేవ మన్యే |
త్వద్రూపం హి స్వానుభూత్యైకవేద్యం
న చక్షుషా గృహ్యతే నాపి వాచా || 92 ||
హరస్వరైశ్చతుర్వర్గప్రదం మంత్రం సబిందుకం |
దేవ్యా జపత విప్రేంద్రా అన్యా వాచో విముంచథ || 93 ||
యస్తే రాకాచంద్రబింబాసనస్థాం
పీయూషాబ్ధిం కల్పయంతీం మయూఖైః |
మూర్తిం భక్త్యా ధ్యాయతే హృత్సరోజే
న తస్య రోగో న జరా న మృత్యుః || 94 ||
తుభ్యం మాతర్యోఽంజలిం మూర్ధ్ని ధత్తే
మౌలిశ్రేణ్యా భూభుజస్తం నమంతి |
యః స్తౌతి త్వామంబ చిద్వల్లివాచా
తం ధీరాసః కవయ ఉన్నయంతి || 95 ||
వైరించోఘైర్విష్ణురుద్రేంద్రబృందై-
-ర్దుర్గాకాలీభైరవీశక్తిసంఘైః |
యంత్రేశి త్వం వర్తసే స్తూయమానా
న తత్ర సూర్యో భాతి న చంద్రతారకం || 96 ||
భూత్యై భవాని త్వాం వందే సురాః శతమఖాదయః |
త్వామానంయ సమృద్ధాః స్యురాయో ధామాని దివ్యాని || 97 ||
పుష్పవత్పుల్లతాటంకాం ప్రాతరాదిత్యపాటలాం |
యస్త్వామంతః స్మరత్యంబ తస్య దేవా అసన్వశే || 98 ||
వశ్యే విద్రుమసంకాశాం విద్యాయాం విశదప్రభాం |
త్వామంబ భావయేద్భూత్యై సువర్ణాం హేమమాలినీం || 99 ||
వామాంకస్థామీశితుర్దీప్యమానాం
భూషాబృందైరిందురేఖావతంసాం |
యస్త్వాం పశ్యన్ సంతతం నైవ తృప్తః
తస్మై చ దేవి వషడస్తు తుభ్యం || 100 ||
నవనీపవనీవాసలాలసోత్తరమానసే |
శృంగారదేవతే మాతః శ్రియం వాసయ మే కులే || 101 ||
భక్త్యాభక్త్యా వాపి పద్యావసాన-
-శ్రుత్యా స్తుత్యా చైతయా స్తౌతి యస్త్వాం |
తస్య క్షిప్రం త్వత్ప్రసాదేన మాతః
సత్యాః సంతు యజమానస్య కామాః || 102 ||
బాలిశేన మయా ప్రోక్తమపి వాత్సల్యశాలినోః |
ఆనందమాదిదంపత్యోరిమా వర్ధంతు వాంగిరః || 103 ||
మాధురీసౌరభావాసచాపసాయకధారిణీం |
దేవీం ధ్యాయన్ పఠేదేతత్సర్వకామార్థసిద్ధయే || 104 ||
స్తోత్రమేతత్ప్రజపతస్తవ త్రిపురసుందరి |
అనుద్వీక్ష్య భయాద్దూరం మృత్యుర్ధావతి పంచమః || 105 ||
యః పఠతి స్తుతిమేతాం
విద్యావంతం తమంబ ధనవంతం |
కురు దేవి యశస్వంతం
వర్చస్వంతం మనుష్యేషు || 106 ||
యే శృణ్వంతి స్తుతిమిమాం తవ దేవ్యనసూయకాః |
తేభ్యో దేహి శ్రియం విద్యాముద్వర్చ ఉత్తనూబలం || 107 ||
త్వామేవాహం స్తౌమి నిత్యం ప్రణౌమి
శ్రీవిద్యేశాం వచ్మి సంచింతయామి |
అధ్యాస్తే యా విశ్వమాతా విరాజో
హృత్పుండరీకం విరజం విశుద్ధం || 108 ||
శంకరేణ రచితం స్తవోత్తమం
యః పఠేజ్జగతి భక్తిమాన్నరః |
తస్య సిద్ధిరతులా భవేద్ధ్రువా
సుందరీ చ సతతం ప్రసీదతి || 109 ||
యత్రైవ యత్రైవ మనో మదీయం
తత్రైవ తత్రైవ తవ స్వరూపం |
యత్రైవ యత్రైవ శిరో మదీయం
తత్రైవ తత్రైవ పదద్వయం తే || 110 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య
శ్రీమచ్ఛంకరభగవతః కృతౌ త్రిపురసుందరీ వేదపాద స్తవః |