ఆశావశాదష్టదిగంతరాలే
దేశాంతరభ్రాంతమశాంతబుద్ధిం |
ఆకారమాత్రాదవనీసురం మాం
అకృత్యకృత్యం శివ పాహి శంభో || 1 ||
మాంసాస్థిమజ్జామలమూత్రపాత్ర-
-గాత్రాభిమానోజ్ఝితకృత్యజాలం |
మద్భావనం మన్మథపీడితాంగం
మాయామయం మాం శివ పాహి శంభో || 2 ||
సంసారమాయాజలధిప్రవాహ-
-సంమగ్నముద్భ్రాంతమశాంతచిత్తం |
త్వత్పాదసేవావిముఖం సకామం
సుదుర్జనం మాం శివ పాహి శంభో || 3 ||
ఇష్టానృతం భ్రష్టమనిష్టధర్మం
నష్టాత్మబోధం నయలేశహీనం |
కష్టారిషడ్వర్గనిపీడితాంగం
దుష్టోత్తమం మాం శివ పాహి శంభో || 4 ||
వేదాగమాభ్యాసరసానభిజ్ఞం
పాదారవిందం తవ నార్చయంతం |
వేదోక్తకర్మాణి విలోపయంతం
వేదాకృతే మాం శివ పాహి శంభో || 5 ||
అన్యాయవిత్తార్జనసక్తచిత్తం
అన్యాసు నారీష్వనురాగవంతం |
అన్యాన్నభోక్తారమశుద్ధదేహం
ఆచారహీనం శివ పాహి శంభో || 6 ||
పురాత్తతాపత్రయతప్తదేహం
పరాం గతిం గంతుముపాయవర్జ్యం |
పరావమానైకపరాత్మభావం
నరాధమం మాం శివ పాహి శంభో || 7 ||
పితా యథా రక్షతి పుత్రమీశ
జగత్పితా త్వం జగతః సహాయః |
కృతాపరాధం తవ సర్వకార్యే
కృపానిధే మాం శివ పాహి శంభో || 8 ||
ఇతి శ్రీవృద్ధనృసింహభారతీ స్వామీ విరచితం శ్రీ శివాష్టకం |