Sri Kali Kavacham (Trailokya Vijayam) pdf download – శ్రీ కాళీ కవచం (త్రైలోక్యవిజయం)

శ్రీసదాశివ ఉవాచ |
త్రైలోక్యవిజయస్యాస్య కవచస్య ఋషిః శివః |
ఛందోఽనుష్టుబ్దేవతా చ ఆద్యాకాళీ ప్రకీర్తితా || 1 ||
మాయాబీజం బీజమితి రమా శక్తిరుదాహృతా |
క్రీం కీలకం కాంయసిద్ధౌ వినియోగః ప్రకీర్తితః || 2 ||
అథ కవచం |
హ్రీమాద్యా మే శిరః పాతు శ్రీం కాళీ వదనం మమ |
హృదయం క్రీం పరా శక్తిః పాయాత్కంఠం పరాత్పరా || 3 ||
నేత్రే పాతు జగద్ధాత్రీ కర్ణౌ రక్షతు శంకరీ |
ఘ్రాణం పాతు మహామాయా రసనాం సర్వమంగళా || 4 ||
దంతాన్ రక్షతు కౌమారీ కపోలౌ కమలాలయా |
ఓష్ఠాధరౌ క్షమా రక్షేచ్చిబుకం చారుహాసినీ || 5 ||
గ్రీవాం పాయాత్కులేశానీ కకుత్పాతు కృపామయీ |
ద్వౌ బాహూ బాహుదా రక్షేత్కరౌ కైవల్యదాయినీ || 6 ||
స్కంధౌ కపర్దినీ పాతు పృష్ఠం త్రైలోక్యతారిణీ |
పార్శ్వే పాయాదపర్ణా మే కటిం మే కమఠాసనా || 7 ||
నాభౌ పాతు విశాలాక్షీ ప్రజాస్థానం ప్రభావతీ |
ఊరూ రక్షతు కల్యాణీ పాదౌ మే పాతు పార్వతీ || 8 ||
జయదుర్గాఽవతు ప్రాణాన్ సర్వాంగం సర్వసిద్ధిదా |
రక్షాహీనం తు యత్ స్థానం వర్జితం కవచేన చ || 9 ||
తత్సర్వం మే సదా రక్షేదాద్యాకాళీ సనాతనీ |
ఇతి తే కథితం దివ్యం త్రైలోక్యవిజయాభిధం || 10 ||
కవచం కాళికాదేవ్యా ఆద్యాయాః పరమాద్భుతం |
పూజాకాలే పఠేద్యస్తు ఆద్యాధికృతమానసః || 11 ||
సర్వాన్ కామానవాప్నోతి తస్యాద్యాశు ప్రసీదతి |
మంత్రసిద్ధిర్భవేదాశు కింకరాః క్షుద్రసిద్ధయః || 12 ||
అపుత్రో లభతే పుత్రం ధనార్థీ ప్రాప్నుయాద్ధనం |
విద్యార్థీ లభతే విద్యాం కామీ కామానవాప్నుయాత్ || 13 ||
సహస్రావృత్తపాఠేన వర్మణోఽస్య పురస్క్రియా |
పురశ్చరణసంపన్నం యథోక్తఫలదం భవేత్ || 14 ||
చందనాగరుకస్తూరీకుంకుమై రక్తచందనైః |
భూర్జే విలిఖ్య గుటికాం స్వర్ణస్థాం ధారయేద్యది || 15 ||
శిఖాయాం దక్షిణే బాహౌ కంఠే వా సాధకః కటౌ |
తస్యాద్యా కాళికా వశ్యా వాంఛితార్థం ప్రయచ్ఛతి || 16 ||
న కుత్రాపి భయం తస్య సర్వత్ర విజయీ కవిః |
అరోగీ చిరజీవీ స్యాద్బలవాన్ ధారణక్షమః || 17 ||
సర్వవిద్యాసు నిపుణః సర్వశాస్త్రార్థతత్త్వవిత్ |
వశే తస్య మహీపాలా భోగమోక్షౌ కరస్థితౌ || 18 ||
ఇతి మహానిర్వాణతంత్రే సప్తమోల్లాసే త్రైలోక్యవిజయకవచం నామ శ్రీ కాళికా కవచం |