Sri Hanuman Manasika Puja pdf download – శ్రీ హనుమాన్ మానసిక పూజా

మైత్రేయ ఉవాచ |
కథమారాధ్యతే చిత్తే హనుమాన్ మారుతాత్మజః |
కీదృశైరుపచారైర్వా వద మే విస్తరాన్మునే || 1 ||
శ్రీపరాశర ఉవచ |
హనుమంతం మహాత్మానం పింగాక్షం హేమసన్నిభం |
మందస్మితం సుఖాసీనం ధ్యాయేదీప్సితసిద్ధయే || 2 ||
తాపత్రయపరివ్యాప్తం చిత్తం కృత్వా సునిర్మలం |
భావయేన్మనసా దేవం భవశాపవిముక్తయే || 3 ||
ప్రాతఃకాలే సముత్థాయ హనూమంతం హృదిస్మరన్ |
శుచౌదేశే సమాసీనః కృత ప్రాభాతకీక్రియాః || 4 ||
విజనం దేశమాశ్రిత్య కదళీవనమధ్యగః |
చిత్తవిక్షేపరహితః పూజావిధిముపక్రమేత్ || 5 ||
పూజా చ పంచధాజ్ఞేయా కపీంద్రస్య మహాత్మనః |
జలే చ ప్రతిమాయాం చ శిలాయాం సూర్యమండలే |
నిశ్చలే మానసే వాపి పూజయేజ్జగతాం పతిం || 6 ||
ఆద్యే సర్వోపచారాన్ వై జలేనైవ ప్రకల్పయేత్ |
ద్వితీయే తు యథాశాస్త్రం తథా ద్రవ్యం నివేదయేత్ || 7 ||
తృతీయే న విశేషోఽస్తి ద్వితీయ ఇవ పూజయేత్ |
తురీయే నిశ్చలాం దృష్టిం కృత్వా భాస్కరమండలే || 8 ||
పూజాద్రవ్యం సమానీయ చక్షుషా సన్నిధాపయేత్ |
పంచమీ మానసీపూజా సర్వేషాముత్తమోత్తమం || 9 ||
తత్తద్రవ్యాణి సర్వాణి పూజాయాః సాధనాని వై |
నిశ్చలే నాంతరంగేణ కపీంద్రాయ నివేదయేత్ || 10 ||
దళైర్ద్వాదశభిర్యుక్తం హైమం హృదయపంకజం |
భావయే ద్వికచం రంయం కర్ణికా కేసరాన్వితం || 11 ||
తత్ర సింహాసనం తత్ర హైమం భాస్కరసన్నిభం |
నిరస్తాంతస్తమస్తోమం కల్పయేన్మునిపుంగవ || 12 ||
ఆవాహయేద్ధనూమంతం తత్ర సింహాసనే సుధీః |
అథ ధ్యాయేత్ కపిశ్రేష్ఠం చతురావరణాన్వితం || 13 ||
వామభాగస్థితాం పత్నీం సూర్యపుత్రీం సువర్చలాం |
పశ్యంతం స్నిగ్ధయా దృష్ట్యా స్మితయుక్త ముఖాంబుజాం || 14 ||
ఛత్రచామరసంయుక్తం వినతాద్యైః సుసేవితం |
యుక్తహార గణోపేతం తత్ర కుండలభూషితం || 15 ||
గ్రైవేయభూషితగ్రీవం కనకాంగదధారిణం |
నానామణిసముత్కీర్ణం కిరీటోజ్జ్వలశేఖరం || 16 ||
మేఖలాదామసంవీతం మణినూపురశోభితం |
రత్నకంకణవిద్యోతం పాణిం రక్తాంబుజద్వయం || 17 ||
క్వథిత స్వర్ణవర్ణాంగముష్ట్రధ్వజసమన్వితం |
పద్మాసనే సమాసీనం పీతాంబరసమన్వితం || 18 ||
చతుర్భుజధరం శాంతం సర్వవ్యాపినమీశ్వరం |
సర్వదేవ పరీవారం సర్వాభీష్టఫలప్రదం || 19 ||
(ఆవాహనాద్యుపచార ప్రారంభః)
ఆవాహయామి సర్వేశం సూర్యపుత్రీప్రియం ప్రభుం |
అంజనాతనయం దేవం మాయాతీతం జగద్గురుం || 20 ||
దేవదేవ జగన్నాథ కేసరిప్రియనందన |
రత్నసింహాసనం తుభ్యం దాస్యామి హనుమత్ ప్రభో || 21 ||
ఆగచ్ఛ హనుమన్ దేవ త్వం సువర్చలయా సహ |
పూజా సమాప్తిపర్యంతం భవ సన్నిహితో ముదా || 22 ||
భీమాగ్రజ మహాప్రాజ్ఞ త్వం మమాభిముఖో భవ |
సువర్చలాపతే శ్రీమన్ ప్రసీద జగతాం పతే || 23 ||
యోగిధ్యేయాంఘ్రిపద్మాయ జగతాం పతయే నమః |
పాద్యం మయార్పితం దేవ గృహాణ పురుషోత్తమ || 24 ||
లక్ష్మణప్రాణసంరక్ష సీతాశోకవినాశన |
గృహాణార్ఘ్యం మయా దత్తం పార్వతీ ప్రియనందన || 25 ||
బాలాగ్ర సేతుబంధాయ శతాననవధాయ చ |
తుభ్యమాచమనం దత్తం ప్రతిగృహ్ణీష్వ మారుతే || 26 ||
అర్జునధ్వజసంవాస దశానన మదాపహ |
మధుపర్కం ప్రదాస్యామి హనుమన్ ప్రతిగృహ్యతాం || 27 ||
గంగాది సర్వతీర్థేభ్యః సమానీతైర్నవోదకైః |
భవంత స్నాపయిష్యామి కపినాయక గృహ్యతాం || 28 ||
పీతాంబరమిదం తుభ్యం తప్తహాటకసన్నిభం |
దాస్యామి వానరశ్రేష్ఠ సంగృహాణ నమోఽస్తు తే || 29 ||
బ్రహ్మసూత్రమిదం భవ్యం ముక్తాదామోపశోభితం |
స్వీకురుష్వాంజనాపుత్ర భక్తరక్షణ తత్పర || 30 ||
ఉత్తరీయం తు దాస్యామి సంసారోత్తారకారణ |
గృహాణ పరమప్రీత్యా నతోఽస్మి తవ పాదయోః || 31 ||
భూషణాని మహార్హాణి కిరీట ప్రముఖాన్యహం |
తుభ్యం దాస్యామి సర్వేశ గృహాణ కపినాయక || 32 ||
కస్తూరీకుంకుమోన్మిశ్రం కర్పూరాగరువాసితం |
శ్రీచందనం తు దాస్యామి గృహ్యతాం హనుమత్ ప్రభో || 33 ||
సుగంధీని సురూపాణి వన్యాని వివిధాని చ |
చంపకాదీని పుష్పాణి కమలాన్యుత్పలాని చ || 34 ||
తులసీదళమాదీని మనసా కల్పయామి తే |
గృహాణ హనుమద్దేవ ప్రణతోఽస్మి పదాంబుజే || 35 ||
శాలీయానక్షతాన్రంయాన్ పద్మరాగసమప్రభాన్ |
అఖండాన్ ఖండితధ్వాంత స్వీకురుష్వ దయానిధే || 36 ||
కపిలాఘృతసంయుక్తః కృష్ణాగరుసముద్భవః |
మయా సమర్పితో ధూపః హనుమన్ ప్రతిగృహ్యతాం || 37 ||
నిరస్తాజ్ఞానతిమిరతేజోరాశే జగత్పతే |
దీపం గృహాణ దేవేశ గోఘృతాత్తం దశాన్వితం || 38 ||
ఇదం దివ్యాన్నమమృతం సూపశాకఫలాన్వితం |
సాజ్యం సదధి సక్షీరం శర్కరామధుసంయుతం || 39 ||
భక్ష్యం భోజ్యం చ లేహ్యం చ చోష్యం చాపి చతుర్విధం |
గృహాణ హనుమన్ భక్త్యా స్వర్ణపాత్రే నివేదితం || 40 ||
సమర్పయామి పానీయం మధ్యేమధ్యే సుధోపమం |
సచ్చిదానందరూపాయ సృష్టిస్థిత్యంతహేతవే || 41 ||
పూగీఫలైః సమాయుక్తం కర్పూరాదిసమన్వితం |
స్వర్ణవర్ణదళోపేతం తాంబూలం గృహ్యతాం హరే || 42 ||
నీరాజనమిదం దివ్యం మంగళార్థం కపి ప్రభో |
మయా సమర్పితం తాత గృహాణ వరదో భవ || 43 ||
నృత్యం గీతం చ వాద్యం చ కృతం గంధర్వసత్తమైః |
ప్రకల్పయామి మనసా రామదూతాయ తే నమః || 44 ||
రాజోపచారైః సతతం పురాణపఠనాదిభిః |
సంతుష్టో భవ సర్వాత్మన్ సర్వలింగమయాత్మక || 45 ||
మేరావణ మహాప్రాజ్ఞ ప్రాణవాయు బిలేశయ |
పునరర్ఘ్యం ప్రదాస్యామి పవనాత్మజ గృహ్యతాం || 46 ||
మందారపారిజాతాది పుష్పాంజలిమిమం ప్రభో |
స్వర్ణపుష్పసమాకీర్ణముష్ట్రధ్వజ గృహాణ వై || 47 ||
ప్రదక్షిణనమస్కారాన్ సాష్టాంగాన్ పంచసంఖ్యయా |
దాస్యామి కపినాథాయ గృహాణాభీష్టదాయక || 48 ||
దేవదేవ జగన్నాథ పురాణపురుషోత్తమ |
అనేన పూజావిధినా సుప్రీతో భవ సర్వదా || 49 ||
సువర్చలాసమేతస్త్వం చతురావరణాన్వితం |
హంసతూలికయోపేతే మమ హృత్పంకజే వస || 50 ||
శ్రీపరాశర ఉవాచ |
ఇత్యేవం మానసీపూజా సర్వాభీష్టప్రదాయినీ |
శంకరేణ పురా గౌర్యాః కథితా విస్తరాన్మునే || 51 ||
ప్రాతర్మధ్యాహ్నయోశ్చాపి సాయంకాల నిశీథయోః |
యదా కదాపి పూజేయం మానసీ సర్వదోత్తమా || 51 ||
ఏతస్య పూజనవిధైః పఠనేనాపి మానవః |
సర్వాన్ కామానవాప్నోతి శ్రవణేన విశేషతః || 52 ||
బ్రహ్మ క్షత్ర విశాం స్త్రీణాం బాలానాం చ శుభావహం |
ఇదం పవిత్రం పాపఘ్నం భుక్తిముక్తిఫలప్రదం || 53 ||
ఇతి శ్రీపరాశరసంహితాయాం శ్రీపరాశరమైత్రేయ సంవాదే శ్రీ హనుమాన్ మాసిక పూజా నామ ద్విపంచాశత్పటలః |