Sri Gayatri Ashtottara Shatanama Stotram 2 pdf download – శ్రీ గాయత్రీ అష్టోత్తరశతనామ స్తోత్రం –2

అస్య శ్రీగాయత్ర్యష్టోత్తరశత దివ్యనామస్తోత్ర మంత్రస్య బ్రహ్మావిష్ణుమహేశ్వరా ఋషయః ఋగ్యజుస్సామాథర్వాణి ఛందాంసి పరబ్రహ్మస్వరూపిణీ గాయత్రీ దేవతా ఓం తద్బీజం భర్గః శక్తిః ధియః కీలకం మమ గాయత్రీప్రసాద సిద్ధ్యర్థే జపే వినియోగః |
తరుణాదిత్యసంకాశా సహస్రనయనోజ్జ్వలా |
స్యందనోపరిసంస్థానా ధీరా జీమూతనిస్స్వనా || 1 ||
మత్తమాతంగగమనా హిరణ్యకమలాసనా |
ధీజనోద్ధారనిరతా యోగినీ యోగధారిణీ || 2 ||
నటనాట్యైకనిరతా ప్రణవాద్యక్షరాత్మికా |
ఘోరాచారక్రియాసక్తా దారిద్ర్యచ్ఛేదకారిణీ || 3 ||
యాదవేంద్రకులోద్భూతా తురీయపదగామినీ |
గాయత్రీ గోమతీ గంగా గౌతమీ గరుడాసనా || 4 ||
గేయా గానప్రియా గౌరీ గోవిందపరిపూజితా |
గంధర్వనగరాకారా గౌరవర్ణా గణేశ్వరీ || 5 ||
గుణాశ్రయా గుణవతీ గుహ్యకా గణపూజితా |
గుణత్రయసమాయుక్తా గుణత్రయవివర్జితా || 6 ||
గుహావాసా గుహాచారా గుహ్యా గంధర్వరూపిణీ |
గార్గ్యప్రియా గురుపథా గుహ్యలింగాంకధారిణీ || 7 ||
సావిత్రీ సూర్యతనయా సుషుంణానాడిభేదినీ |
సుప్రకాశా సుఖాసీనా సువ్రతా సురపూజితా || 8 ||
సుషుప్త్యవస్థా సుదతీ సుందరీ సాగరాంబరా |
సుధాంశుబింబవదనా సుస్తనీ సువిలోచనా || 9 ||
శుభ్రాంశునాసా సుశ్రోణీ సంసారార్ణవతారిణీ |
సామగానప్రియా సాధ్వీ సర్వాభరణభూషితా || 10 ||
సీతా సర్వాశ్రయా సంధ్యా సఫలా సుఖదాయినీ |
వైష్ణవీ విమలాకారా మాహేంద్రీ మాతృరూపిణీ || 11 ||
మహాలక్ష్మీర్మహాసిద్ధిర్మహామాయా మహేశ్వరీ |
మోహినీ మదనాకారా మధుసూదనసోదరీ || 12 ||
మీనాక్షీ క్షేమసంయుక్తా నగేంద్రతనయా రమా |
త్రివిక్రమపదాక్రాంతా త్రిసర్వా త్రివిలోచనా || 13 ||
సూర్యమండలమధ్యస్థా చంద్రమండలసంస్థితా |
వహ్నిమండలమధ్యస్థా వాయుమండలసంస్థితా || 14 ||
వ్యోమమండలమధ్యస్థా చక్రస్థా చక్రరూపిణీ |
కాలచక్రవిధానజ్ఞా చంద్రమండలదర్పణా || 15 ||
జ్యోత్స్నాతపేనలిప్తాంగీ మహామారుతవీజితా |
సర్వమంత్రాశ్రితా ధేనుః పాపఘ్నీ పరమేశ్వరీ || 16 ||
చతుర్వింశతివర్ణాఢ్యా చతుర్వర్గఫలప్రదా |
మందేహరాక్షసఘ్నీ చ షట్కుక్షిః త్రిపదా శివా || 17 ||
జపపారాయణప్రీతా బ్రాహ్మణ్యఫలదాయినీ |
నమస్తేఽస్తు మహాలక్ష్మీ మహాసంపత్తిదాయిని || 18 ||
నమస్తే కరుణామూర్తే నమస్తే భక్తవత్సలే |
గాయత్రీం పూజయేద్యస్తు శతైరష్టోత్తరైః పృథక్ || 19 ||
తస్య పుణ్యఫలం వక్తుం బ్రహ్మణాపి న శక్యతే |
ప్రాతఃకాలే చ మధ్యాహ్నే సాయాహ్నే చ రఘూత్తమ || 20 ||
యే పఠంతీహ లోకేఽస్మిన్ సర్వాన్ కామానవాప్నుయాత్ |
పఠనాదేవ గాయత్రీ నాంనామష్టోత్తరం శతం || 21 ||
బ్రహ్మహత్యాది పాపేభ్యో ముచ్యతే నాత్ర సంశయః |
దినే దినే పఠేద్యస్తు గాయత్రీస్తవముత్తమం || 22 ||
స నరో ముక్తిమాప్నోతి పునరావృత్తివర్జితం |
పుత్రప్రదమపుత్రాణాం దరిద్రాణాం ధనప్రదం || 23 ||
రోగిణాం రోగశమనం సర్వైశ్వర్యప్రదాయకం |
బహునా కిమిహోక్తేన స్తోత్రం సర్వఫలప్రదం || 24 ||
ఇతి శ్రీవిశ్వామిత్ర ప్రోక్తం శ్రీ గాయత్ర్యష్టోత్తరశతనామ స్తోత్రం |