నిశంయైతజ్జామదగ్న్యో మాహాత్ంయం సర్వతోఽధికం |
స్తోత్రస్య భూయః పప్రచ్ఛ దత్తాత్రేయం గురూత్తమం || 1 ||
భగవన్ త్వన్ముఖాంభోజనిర్గమద్వాక్సుధారసం |
పిబతః శ్రోత్రముఖతో వర్ధతేఽనుక్షణం తృషా || 2 ||
అష్టోత్తరశతం నాంనాం శ్రీదేవ్యా యత్ప్రసాదతః |
కామః సంప్రాప్తవాన్ లోకే సౌభాగ్యం సర్వమోహనం || 3 ||
సౌభాగ్యవిద్యావర్ణానాముద్ధారో యత్ర సంస్థితః |
తత్సమాచక్ష్వ భగవన్ కృపయా మయి సేవకే || 4 ||
నిశంయైవం భార్గవోక్తిం దత్తాత్రేయో దయానిధిః |
ప్రోవాచ భార్గవం రామం మధురాఽక్షరపూర్వకం || 5 ||
శృణు భార్గవ యత్పృష్టం నాంనామష్టోత్తరం శతం |
శ్రీవిద్యావర్ణరత్నానాం నిధానమివ సంస్థితం || 6 ||
శ్రీదేవ్యా బహుధా సంతి నామాని శృణు భార్గవ |
సహస్రశతసంఖ్యాని పురాణేష్వాగమేషు చ || 7 ||
తేషు సారతమం హ్యేతత్సౌభాగ్యాష్టోత్తరాత్మకం |
యదువాచ శివః పూర్వం భవాన్యై బహుధార్థితః || 8 ||
సౌభాగ్యాష్టోత్తరశతనామస్తోత్రస్య భార్గవ |
ఋషిరుక్తః శివశ్ఛందోఽనుష్టుప్ శ్రీలలితాంబికా || 9 ||
దేవతా విన్యసేత్కూటత్రయేణావర్త్య సర్వతః |
ధ్యాత్వా సంపూజ్య మనసా స్తోత్రమేతదుదీరయేత్ || 10 ||
కామేశ్వరీ కామశక్తిః కామసౌభాగ్యదాయినీ |
కామరూపా కామకలా కామినీ కమలాసనా || 11 ||
కమలా కల్పనాహీనా కమనీయకళావతీ |
కమలాభారతీసేవ్యా కల్పితాఽశేషసంసృతిః || 12 ||
అనుత్తరాఽనఘాఽనంతాఽద్భుతరూపాఽనలోద్భవా |
అతిలోకచరిత్రాఽతిసుందర్యతిశుభప్రదా || 13 ||
అఘహంత్ర్యతివిస్తారాఽర్చనతుష్టాఽమితప్రభా |
ఏకరూపైకవీరైకనాథైకాంతాఽర్చనప్రియా || 14 ||
ఏకైకభావతుష్టైకరసైకాంతజనప్రియా |
ఏధమానప్రభావైధద్భక్తపాతకనాశినీ || 15 ||
ఏలామోదముఖైనోఽద్రిశక్రాయుధసమస్థితిః |
ఈహాశూన్యేప్సితేశాదిసేవ్యేశానవరాంగనా || 16 ||
ఈశ్వరాఽఽజ్ఞాపికేకారభావ్యేప్సితఫలప్రదా |
ఈశానేతిహరేక్షేషదరుణాక్షీశ్వరేశ్వరీ || 17 ||
లలితా లలనారూపా లయహీనా లసత్తనుః |
లయసర్వా లయక్షోణిర్లయకర్ణీ లయాత్మికా || 18 ||
లఘిమా లఘుమధ్యాఽఽఢ్యా లలమానా లఘుద్రుతా |
హయాఽఽరూఢా హతాఽమిత్రా హరకాంతా హరిస్తుతా || 19 ||
హయగ్రీవేష్టదా హాలాప్రియా హర్షసముద్ధతా |
హర్షణా హల్లకాభాంగీ హస్త్యంతైశ్వర్యదాయినీ || 20 ||
హలహస్తార్చితపదా హవిర్దానప్రసాదినీ |
రామ రామాఽర్చితా రాజ్ఞీ రంయా రవమయీ రతిః || 21 ||
రక్షిణీ రమణీ రాకా రమణీమండలప్రియా |
రక్షితాఽఖిలలోకేశా రక్షోగణనిషూదినీ || 22 ||
అంబాంతకారిణ్యంభోజప్రియాఽంతకభయంకరీ |
అంబురూపాంబుజకరాంబుజజాతవరప్రదా || 23 ||
అంతఃపూజాప్రియాంతఃస్వరూపిణ్యంతర్వచోమయీ |
అంతకారాతివామాంకస్థితాంతఃసుఖరూపిణీ || 24 ||
సర్వజ్ఞా సర్వగా సారా సమా సమసుఖా సతీ |
సంతతిః సంతతా సోమా సర్వా సాంఖ్యా సనాతనీ || 25 ||
ఏతత్తే కథితం రామ నాంనామష్టోత్తరం శతం |
అతిగోప్యమిదం నాంనః సర్వతః సారముద్ధృతం || 26 ||
ఏతస్య సదృశం స్తోత్రం త్రిషు లోకేషు దుర్లభం |
అప్రకాశ్యమభక్తానాం పురతో దేవతాద్విషాం || 27 ||
ఏతత్ సదాశివో నిత్యం పఠంత్యన్యే హరాదయః |
ఏతత్ప్రభావాత్కందర్పస్త్రైలోక్యం జయతి క్షణాత్ || 28 ||
సౌభాగ్యాష్టోత్తరశతనామస్తోత్రం మనోహరం |
యస్త్రిసంధ్యం పఠేన్నిత్యం న తస్య భువి దుర్లభం || 29 ||
శ్రీవిద్యోపాసనవతామేతదావశ్యకం మతం |
సకృదేతత్ప్రపఠతాం నాన్యత్కర్మ విలుప్యతే || 30 ||
అపఠిత్వా స్తోత్రమిదం నిత్యం నైమిత్తికం కృతం |
వ్యర్థీభవతి నగ్నేన కృతం కర్మ యథా తథా || 31 ||
సహస్రనామపాఠాదావశక్తస్త్వేతదీరయేత్ |
సహస్రనామపాఠస్య ఫలం శతగుణం భవేత్ || 32 ||
సహస్రధా పఠిత్వా తు వీక్షణాన్నాశయేద్రిపూన్ |
కరవీరరక్తపుష్పైర్హుత్వా లోకాన్ వశం నయేత్ || 33 ||
స్తంభేయత్ శ్వేతకుసుమైర్నీలైరుచ్చాటయేద్రిపూన్ |
మరిచైర్విద్వేషణాయ లవంగైర్వ్యాధినాశనే || 34 ||
సువాసినీర్బ్రాహ్మణాన్ వా భోజయేద్యస్తు నామభిః |
యశ్చ పుష్పైః ఫలైర్వాపి పూజయేత్ ప్రతినామభిః || 35 ||
చక్రరాజేఽథవాన్యత్ర స వసేచ్ఛ్రీపురే చిరం |
యః సదా వర్తయన్నాస్తే నామాష్టశతముత్తమం |
తస్య శ్రీలలితా రాజ్ఞీ ప్రసన్నా వాంఛితప్రదా || 36 ||
ఇతి శ్రీత్రిపురారహస్యే మాహాత్ంయఖండే షడ్వింశోఽధ్యాయే దత్తాత్రేయ ప్రోక్త సౌభాగ్యాష్టోత్తరశతనామ స్తోత్రం |