హరిర్హరతి పాపాని దుష్టచిత్తైరపి స్మృతః |
అనిచ్ఛయాఽపి సంస్పృష్టో దహత్యేవ హి పావకః || 1 ||
స గంగా స గయా సేతుః స కాశీ స చ పుష్కరం |
జిహ్వాగ్రే వర్తతే యస్య హరిరిత్యక్షరద్వయం || 2 ||
వారాణస్యాం కురుక్షేత్రే నైమిశారణ్య ఏవ చ |
యత్కృతం తేన యేనోక్తం హరిరిత్యక్షరద్వయం || 3 ||
పృథివ్యాం యాని తీర్థాని పుణ్యాన్యాయతనాని చ |
తాని సర్వాణ్యశేషాణి హరిరిత్యక్షరద్వయం || 4 ||
గవాం కోటిసహస్రాణి హేమకన్యాసహస్రకం |
దత్తం స్యాత్తేన యేనోక్తం హరిరిత్యక్షరద్వయం || 5 ||
ఋగ్వేదోఽథ యజుర్వేదః సామవేదోఽప్యథర్వణః |
అధీతస్తేన యేనోక్తం హరిరిత్యక్షరద్వయం || 6 ||
అశ్వమేధైర్మహాయజ్ఞైర్నరమేధైస్తథైవ చ |
ఇష్టం స్యాత్తేన యేనోక్తం హరిరిత్యక్షరద్వయం || 7 ||
ప్రాణః ప్రయాణ పాథేయం సంసారవ్యాధినాశనం |
దుఃఖాత్యంత పరిత్రాణం హరిరిత్యక్షరద్వయం || 8 ||
బద్ధః పరికరస్తేన మోక్షాయ గమనం ప్రతి |
సకృదుచ్చారితం యేన హరిరిత్యక్షరద్వయం || 9 ||
హర్యష్టకమిదం పుణ్యం ప్రాతరుత్థాయ యః పఠేత్ |
ఆయుష్యం బలమారోగ్యం యశో వృద్ధిః శ్రియావహం || 10 ||
ప్రహ్లాదేన కృతం స్తోత్రం దుఃఖసాగరశోషణం |
యః పఠేత్స నరో యాతి తద్విష్ణోః పరమం పదం || 11 ||