స్వసంకల్పకలాకల్పైరాయుధైరాయుధేశ్వరః |
జుష్టః షోడశభిర్దివ్యైర్జుషతాం వః పరః పుమాన్ || 1 ||
యదాయత్తం జగచ్చక్రం కాలచక్రం చ శాశ్వతం |
పాతు వస్తత్పరం చక్రం చక్రరూపస్య చక్రిణః || 2 ||
యత్ప్రసూతిశతైరాసన్ ద్రుమాః పరశులాంఛితాః | [రుద్రాః] స దివ్యో హేతిరాజస్య పరశుః పరిపాతు వః || 3 ||
హేలయా హేతిరాజేన యస్మిన్ దైత్యాః సముద్ధృతే |
శకుంతా ఇవ ధావంతి స కుంతః పాలయేత వః || 4 ||
దైత్యదానవముఖ్యానాం దండ్యానాం యేన దండనం |
హేతిదండేశదండోఽసౌ భవతాం దండయేద్ద్విషః || 5 ||
అనన్యాన్వయభక్తానాం రుంధన్నాశామతంగజాన్ |
అనంకుశవిహారో వః పాతు హేతీశ్వరాంకుశః || 6 ||
సంభూయ శలభాయంతే యత్ర పాపాని దేహినాం |
స పాతు శతవక్త్రాగ్నిహేతిర్హేతీశ్వరస్య వః || 7 ||
అవిద్యాం స్వప్రకాశేన విద్యారూపశ్ఛినత్తి యః |
స సుదర్శననిస్త్రింశః సౌతు వస్తత్త్వదర్శనం || 8 ||
క్రియాశక్తిగుణోవిష్ణోర్యో భవత్యతిశక్తిమాన్ |
అకుంఠశక్తిః సా శక్తిరశక్తిం వారయేత వః || 9 ||
తారత్వం యస్య సంస్థానే శబ్దే చ పరిదృశ్యతే |
ప్రభోః ప్రహరణేంద్రస్య పాంచజన్యః స పాతు వః || 10 ||
యం సాత్త్వికమహంకారం ఆమనంత్యక్షసాయకం |
అవ్యాద్వశ్చక్రరూపస్య తద్ధనుః శార్‍ఙ్గధన్వనః || 11 ||
ఆయుధేంద్రేణ యేనైవ విశ్వసర్గో విరచ్యతే |
స వః సౌదర్శనః కుర్యాత్ పాశః పాశవిమోచనం || 12 ||
విహారో యేన దేవస్య విశ్వక్షేత్రకృషీవలః |
వ్యజ్యతే తేన సీరేణ నాసీరవిజయోఽస్తు వః || 13 ||
ఆయుధానామహం వజ్రం ఇత్యగీయత యః స వః |
అవ్యాద్ధేతీశవజ్రోఽసావదధీచ్యస్థిసంభవః || 14 ||
విశ్వసంహృతిశక్తిర్యా విశ్రుతా బుద్ధిరూపిణీ |
సా వః సౌదర్శనీ భూయాద్గదప్రశమనీ గదా || 15 ||
యాత్యతిక్షోదశాలిత్వం ముసలో యేన తేన వః |
హేతీశముసలేనాశు భిద్యతాం మోహమౌసలం || 16 ||
శూలిదృష్టమనోర్వాచ్యో యేన శూలయతి ద్విషః |
భవతాం తేన భవతాత్ త్రిశూలేన విశూలతా || 17 ||
అస్త్రగ్రామస్య కృత్స్నస్య ప్రసూతిం యం ప్రచక్షతే |
సోఽవ్యాత్ సుదర్శనో విశ్వం ఆయుధైః షోడశాయుధః || 18 ||
శ్రీమద్వేంకటనాథేన శ్రేయసే భూయసే సతాం |
కృతేయమాయుధేంద్రస్య షోడశాయుధసంస్తుతిః || 19 ||
ఇతి శ్రీవేదాంతదేశిక విరచితం షోడశాయుధ స్తోత్రం |