బ్రహ్మవిష్ణు ఊచతుః |
నమామి త్వాం విశ్వకర్త్రీం పరేశీం
నిత్యామాద్యాం సత్యవిజ్ఞానరూపాం |
వాచాతీతాం నిర్గుణాం చాతిసూక్ష్మాం
జ్ఞానాతీతాం శుద్ధవిజ్ఞానగంయాం || 1 ||
పూర్ణాం శుద్ధాం విశ్వరూపాం సురూపాం
దేవీం వంద్యాం విశ్వవంద్యామపి త్వాం |
సర్వాంతఃస్థాముత్తమస్థానసంస్థా-
-మీడే కాళీం విశ్వసంపాలయిత్రీం || 2 ||
మాయాతీతాం మాయినీం వాపి మాయాం
భీమాం శ్యామాం భీమనేత్రాం సురేశీం |
విద్యాం సిద్ధాం సర్వభూతాశయస్థా-
-మీడే కాళీం విశ్వసంహారకర్త్రీం || 3 ||
నో తే రూపం వేత్తి శీలం న ధామ
నో వా ధ్యానం నాపి మంత్రం మహేశి |
సత్తారూపే త్వాం ప్రపద్యే శరణ్యే
విశ్వారాధ్యే సర్వలోకైకహేతుం || 4 ||
ద్యౌస్తే శీర్షం నాభిదేశో నభశ్చ
చక్షూంషి తే చంద్రసూర్యానలాస్తే |
ఉన్మేషాస్తే సుప్రబోధో దివా చ
రాత్రిర్మాతశ్చక్షుషోస్తే నిమేషం || 5 ||
వాక్యం దేవా భూమిరేషా నితంబం
పాదౌ గుల్ఫం జానుజంఘస్త్వధస్తే |
ప్రీతిర్ధర్మోఽధర్మకార్యం హి కోపః
సృష్టిర్బోధః సంహృతిస్తే తు నిద్రా || 6 ||
అగ్నిర్జిహ్వా బ్రాహ్మణాస్తే ముఖాబ్జం
సంధ్యే ద్వే తే భ్రూయుగం విశ్వమూర్తిః |
శ్వాసో వాయుర్బాహవో లోకపాలాః
క్రీడా సృష్టిః సంస్థితిః సంహృతిస్తే || 7 ||
ఏవంభూతాం దేవి విశ్వాత్మికాం త్వాం
కాళీం వందే బ్రహ్మవిద్యాస్వరూపాం |
మాతః పూర్ణే బ్రహ్మవిజ్ఞానగంయే
దుర్గేఽపారే సారరూపే ప్రసీద || 8 ||
ఇతి శ్రీమహాభాగవతే మహాపురాణే బ్రహ్మవిష్ణుకృతా శ్రీ భద్రకాళీ స్తుతిః |