ఘోరే సంసారవహ్నౌ ప్రళయముపగతే యా హి కృత్వా శ్మశానే
నృత్యత్యన్యూనశక్తిర్జగదిదమఖిలం ముండమాలాభిరామా |
భిద్యద్బ్రహ్మాండభాండం పటుతరనినదైరట్టహాసైరుదారైః
సాస్మాకం వైరివర్గం శమయతు తరసా భద్రదా భద్రకాళీ || 1 ||
మగ్నే లోకేఽంబురాశౌ నలినభవనుతా విష్ణునా కారయిత్వా
చక్రోత్కృత్తోరుకంఠం మధుమపి భయదం కైటభం చాతిభీమం |
పద్మోత్పత్తేః ప్రభూతం భయముత రిపుతోయాహరత్సానుకంపా
సాస్మాకం వైరివర్గం శమయతు తరసా భద్రదా భద్రకాళీ || 2 ||
విశ్వత్రాణం విధాతుం మహిషమథ రాణే యాఽసురం భీమరూపం
శూలేనాహత్య వక్షస్యమరపతినుతా పాతయంతీ చ భూమౌ |
తస్యాసృగ్వాహినీభిర్జలనిధిమఖిలం శోణితాభం చ చక్రే
సాస్మాకం వైరివర్గం శమయతు తరసా భద్రదా భద్రకాళీ || 3 ||
యా దేవీ చండముండౌ త్రిభువననళినీవారణౌ దేవశత్రూ
దృష్ట్వా యుద్ధోత్సవే తౌ ద్రుతతరమభియాతాసినా కృత్తకంఠౌ |
కృత్వా తద్రక్తపానోద్భవమదముదితా సాట్టహాసాతిభీమా
సాస్మాకం వైరివర్గం శమయతు తరసా భద్రదా భద్రకాళీ || 4 ||
సద్యస్తం రక్తబీజం సమరభువి నతా ఘోరరూపానసంఖ్యాన్
రాక్తోద్భూతైరసంఖ్యైర్గజతురగరథైః సార్థమన్యాంశ్చ దైత్యాన్ |
వక్త్రే నిక్షిప్య దృష్ట్వా గురుతరదశనైరాపపౌ శోణితౌఘం
సాస్మాకం వైరివర్గం శమయతు తరసా భద్రదా భద్రకాళీ || 5 ||
స్థానాద్భ్రష్టైశ్చ దేవైస్తుహినగిరితటే సంగతైః సంస్తుతా యా
సంఖ్యాహీనైః సమేతం త్రిదశరిపుగణైః స్యందనేభాశ్వయుక్తైః |
యుద్ధే శుంభం నిశుంభం త్రిభువనవిపదం నాశయంతీ చ జఘ్నే
సాస్మాకం వైరివర్గం శమయతు తరసా భద్రదా భద్రకాళీ || 6 ||
శంభోర్నేత్రానలే యా జననమపి జగత్త్రాణహేతోరయాసీత్
భూయస్తీక్ష్ణాతిధారావిదలితదనుజా దారుకం చాపి హత్వా |
తస్యాసృక్పానతుష్టా ముహురపి కృతవత్యట్టహాసం కఠోరం
సాస్మాకం వైరివర్గం శమయతు తరసా భద్రదా భద్రకాళీ || 7 ||
యా దేవీ కాలరాత్రీ తుహినగిరసుతా లోకమాతా ధరిత్రీ
వాణీ నిద్రా చ మాయా మనసిజదయితా ఘోరరూపాతిసౌంయా |
చాముండా ఖడ్గహస్తా రిపుహననపరా శోణితాస్వాదకామా
సా హన్యాద్విశ్వవంద్యా మమ రిపునివహా భద్రదా భద్రకాళీ || 8 ||
భద్రకాళ్యష్టకం జప్యం శత్రుసంక్షయకాంక్షిణా |
స్వర్గాపవర్గదం పుణ్యం దుష్టగ్రహనివారణం || 9 ||