Sri Maha Saraswati Stavam pdf download – శ్రీ మహాసరస్వతీ స్తవం

అశ్వతర ఉవాచ |
జగద్ధాత్రీమహం దేవీమారిరాధయిషుః శుభాం |
స్తోష్యే ప్రణంయ శిరసా బ్రహ్మయోనిం సరస్వతీం || 1 ||
సదసద్దేవి యత్కించిన్మోక్షవచ్చార్థవత్పదం |
తత్సర్వం త్వయ్యసంయోగం యోగవద్దేవి సంస్థితం || 2 ||
త్వమక్షరం పరం దేవి యత్ర సర్వం ప్రతిష్ఠితం |
అక్షరం పరమం దేవి సంస్థితం పరమాణువత్ || 3 ||
అక్షరం పరమం బ్రహ్మ విశ్వంచైతత్క్షరాత్మకం |
దారుణ్యవస్థితో వహ్నిర్భౌమాశ్చ పరమాణవః || 4 ||
తథా త్వయి స్థితం బ్రహ్మ జగచ్చేదమశేషతః |
ఓంకారాక్షరసంస్థానం యత్తు దేవి స్థిరాస్థిరం || 5 ||
తత్ర మాత్రాత్రయం సర్వమస్తి యద్దేవి నాస్తి చ |
త్రయో లోకాస్త్రయో వేదాస్త్రైవిద్యం పావకత్రయం || 6 ||
త్రీణి జ్యోతీంషి వర్ణాశ్చ త్రయో ధర్మాగమాస్తథా |
త్రయో గుణాస్త్రయః శబ్దస్త్రయో వేదాస్తథాశ్రమాః || 7 ||
త్రయః కాలాస్తథావస్థాః పితరోఽహర్నిశాదయః |
ఏతన్మాత్రాత్రయం దేవి తవ రూపం సరస్వతి || 8 ||
విభిన్నదర్శినామాద్యా బ్రహ్మణో హి సనాతనాః |
సోమసంస్థా హవిః సంస్థాః పాకసంస్థాశ్చ సప్త యాః || 9 ||
తాస్త్వదుచ్చారణాద్దేవి క్రియంతే బ్రహ్మవాదిభిః |
అనిర్దేశ్యం తథా చాన్యదర్ధమాత్రాన్వితం పరం || 10 ||
అవికార్యక్షయం దివ్యం పరిణామవివర్జితం |
తవైతత్పరమం రూపం యన్న శక్యం మయోదితుం || 11 ||
న చాస్యేన చ తజ్జిహ్వా తాంరోష్ఠాదిభిరుచ్యతే |
ఇంద్రోఽపి వసవో బ్రహ్మా చంద్రార్కౌ జ్యోతిరేవ చ || 12 ||
విశ్వావాసం విశ్వరూపం విశ్వేశం పరమేశ్వరం |
సాంఖ్యవేదాంతవాదోక్తం బహుశాఖాస్థిరీకృతం || 13 ||
అనాదిమధ్యనిధనం సదసన్న సదేవ యత్ |
ఏకంత్వనేకం నాప్యేకం భవభేదసమాశ్రితం || 14 ||
అనాఖ్యం షడ్గుణాఖ్యంచ వర్గాఖ్యం త్రిగుణాశ్రయం |
నానాశక్తిమతామేకం శక్తివైభవికం పరం || 15 ||
సుఖాసుఖం మహాసౌఖ్యరూపం త్వయి విభావ్యతే |
ఏవం దేవి త్వయా వ్యాప్తం సకలం నిష్కలంచ యత్ |
అద్వైతావస్థితం బ్రహ్మ యచ్చ ద్వైతే వ్యవస్థితం || 16 ||
యేఽర్థా నిత్యా యే వినశ్యంతి చాన్యే
యే వా స్థూలా యే చ సూక్ష్మాతిసూక్ష్మాః |
యే వా భూమౌ యేఽంతరీక్షేఽన్యతో వా
తేషాం తేషాం త్వత్త ఏవోపలబ్ధిః || 17 ||
యచ్చామూర్తం యచ్చ మూర్తం సమస్తం
యద్వా భూతేష్వేకమేకంచ కించిత్ |
యద్దివ్యస్తి క్ష్మాతలే ఖేఽన్యతో వా
త్వత్సంబంధం త్వత్స్వరైర్వ్యంజనైశ్చ || 18 ||
ఇతి శ్రీమార్కండేయపురాణే త్రయోవింశోఽధ్యాయే అశ్వతర ప్రోక్త మహాసరస్వతీ స్తవం |