ఓంకారజపరతానామోంకారార్థం ముదా వివృణ్వానం |
ఓజఃప్రదం నతేభ్యస్తమహం ప్రణమామి చంద్రమౌళీశం || 1 ||
నంరసురాసురనికరం నలినాహంకారహారిపదయుగలం |
నమదిష్టదానధీరం సతతం ప్రణమామి చంద్రమౌళీశం || 2 ||
మననాద్యత్పదయోః ఖలు మహతీం సిద్ధిం జవాత్ప్రపద్యంతే |
మందేతరలక్ష్మీప్రదమనిశం ప్రణమామి చంద్రమౌళీశం || 3 ||
శితికంఠమిందుదినకరశుచిలోచనమంబుజాక్షవిధిసేవ్యం |
నతమతిదానధురీణం సతతం ప్రణమామి చంద్రమౌళీశం || 4 ||
వాచో వినివర్తంతే యస్మాదప్రాప్య సహ హృదైవేతి |
గీయంతే శ్రుతితతిభిస్తమహం ప్రణమామి చంద్రమౌళీశం || 5 ||
యచ్ఛంతి యత్పదాంబుజభక్తాః కుతుకాత్స్వభక్తేభ్యః |
సర్వానపి పురుషార్థాంస్తమహం ప్రణమామి చంద్రమౌళీశం || 6 ||
పంచాక్షరమనువర్ణైరాదౌ క్లుప్తాం స్తుతిం పఠన్నేనాం |
ప్రాప్య దృఢాం శివభక్తిం భుక్త్వా భోగాఁల్లభేత ముక్తిమపి || 7 ||
ఇతి శ్రీసచ్చిదానంద శివాభినవ నృసింహభారతీ స్వామిభిః విరచితం శ్రీ చంద్రమౌలీశ స్తోత్రం ||