త్రిభువనభవనాభిరామకోశం సకలకళంకహరం పరం ప్రకాశం |
అశరణశరణం శరణ్యమీశం హరిమజమచ్యుతమీశ్వరం ప్రపద్యే || 1 ||
కువలయదలనీలసంనికాశం శరదమలాంబరకోటరోపమానం |
భ్రమరతిమిరకజ్జలాఞ్జనాభం సరసిజచక్రగదాధరం ప్రపద్యే || 2 ||
విమలమలికలాపకోమలాఙ్గం సితజలపఙ్కజకుడ్మలాభశఙ్ఖం
శ్రుతిరణితవిరఞ్చిచఞ్చరీకం స్వహృదయపద్మదలాశ్రయం ప్రపద్యే || 3 ||
సితనఖగణతారకావికీర్ణం స్మితధవలాననపీవరేన్దుబింబం
హృదయమణిమరీచిజాలగఙ్గం హరిశరదంబరమాతతం ప్రపద్యే || 4 ||
అవిరలకృతసృష్టిసర్వలీనం సతతమజాతమవర్థనం విశాలం
గుణశతజరఠాభిజాతదేహం తరుదలశాయిన మర్భకం ప్రపద్యే || 5 ||
నవవికసితపద్మరేణుగౌరం స్ఫుటకమలావపుషా విభూషితాఙ్గం
దినశమసమయారుణాఙ్గరాగం కనకనిభాంబరసున్దరం ప్రపద్యే || 6 ||
దితిసుతనలినీతుషారపాతం సురనలినీసతతోదితార్కబింబం
కమలజనలినీజలావపూరం హృది నలినీనిలయం విభుం ప్రపద్యే || 7 ||
త్రిభువననలినీసితారవిన్దం తిమిరసమానవిమోహదీపమగ్ర్యం
స్ఫుటతరమజడం చిదాత్మతత్త్వం జగదఖిలార్తిహరం హరిం ప్రపద్యే || 8 ||