నమోఽస్తు సూర్యాయ సహస్రరశ్మయే
సహస్రశాఖాన్వితసంభవాత్మనే |
సహస్రయోగోద్భవభావభాగినే
సహస్రసంఖ్యాయుగధారిణే నమః || 1 ||
యన్మండలం దీప్తికరం విశాలం
రత్నప్రభం తీవ్రమనాదిరూపం |
దారిద్ర్యదుఃఖక్షయకారణం చ
పునాతు మాం తత్సవితుర్వరేణ్యం || 2 ||
యన్మండలం దేవగణైః సుపూజితం
విప్రైః స్తుతం భావనముక్తికోవిదం |
తం దేవదేవం ప్రణమామి సూర్యం
పునాతు మాం తత్సవితుర్వరేణ్యం || 3 ||
యన్మండలం జ్ఞానఘనం త్వగంయం
త్రైలోక్యపూజ్యం త్రిగుణాత్మరూపం |
సమస్తతేజోమయదివ్యరూపం
పునాతు మాం తత్సవితుర్వరేణ్యం || 4 ||
యన్మండలం గూఢమతిప్రబోధం
ధర్మస్య వృద్ధిం కురుతే జనానాం |
యత్సర్వపాపక్షయకారణం చ
పునాతు మాం తత్సవితుర్వరేణ్యం || 5 ||
యన్మండలం వ్యాధివినాశదక్షం
యదృగ్యజుః సామసు సంప్రగీతం |
ప్రకాశితం యేన చ భూర్భువః స్వః
పునాతు మాం తత్సవితుర్వరేణ్యం || 6 ||
యన్మండలం వేదవిదో వదంతి
గాయంతి యచ్చారణసిద్ధసంఘాః |
యద్యోగినో యోగజుషాం చ సంఘాః
పునాతు మాం తత్సవితుర్వరేణ్యం || 7 ||
యన్మండలం సర్వజనైశ్చ పూజితం
జ్యోతిశ్చ కుర్యాదిహ మర్త్యలోకే |
యత్కాలకాలాద్యమనాదిరూపం
పునాతు మాం తత్సవితుర్వరేణ్యం || 8 ||
యన్మండలం విష్ణుచతుర్ముఖాఖ్యం
యదక్షరం పాపహరం జనానాం |
యత్కాలకల్పక్షయకారణం చ
పునాతు మాం తత్సవితుర్వరేణ్యం || 9 ||
యన్మండలం విశ్వసృజం ప్రసిద్ధ-
-ముత్పత్తిరక్షాప్రళయప్రగల్భం |
యస్మిన్ జగత్సంహరతేఽఖిలం చ
పునాతు మాం తత్సవితుర్వరేణ్యం || 10 ||
యన్మండలం సర్వగతస్య విష్ణో-
-రాత్మా పరం ధామ విశుద్ధతత్త్వం |
సూక్ష్మాంతరైర్యోగపథానుగంయం
పునాతు మాం తత్సవితుర్వరేణ్యం || 11 ||
యన్మండలం వేదవిదోపగీతం
యద్యోగినాం యోగపథానుగంయం |
తత్సర్వవేద్యం ప్రణమామి సూర్యం
పునాతు మాం తత్సవితుర్వరేణ్యం || 12 ||
సూర్యమండలసు స్తోత్రం యః పఠేత్సతతం నరః |
సర్వపాపవిశుద్ధాత్మా సూర్యలోకే మహీయతే || 13 ||
ఇతి శ్రీభవిష్యోత్తరపురాణే శ్రీకృష్ణార్జునసంవాదే శ్రీ సూర్య మండల స్తోత్రం |