శుకతుండచ్ఛవిసవితుశ్చండరుచేః పుండరీకవనబంధోః |
మండలముదితం వందే కుండలమాఖండలాశాయాః || 1 ||
యస్యోదయాస్తసమయే సురముకుటనిఘృష్టచరణకమలోఽపి |
కురుతేంజలిం త్రినేత్రః స జయతి ధాంనాం నిధిః సూర్యః || 2 ||
ఉదయాచలతిలకాయ ప్రణతోఽస్మి వివస్వతే గ్రహేశాయ |
అంబరచూడామణయే దిగ్వనితాకర్ణపూరాయ || 3 ||
జయతి జనానందకరః కరనికరనిరస్తతిమిరసంఘాతః |
లోకాలోకాలోకః కమలారుణమండలః సూర్యః || 4 ||
ప్రతిబోధితకమలవనః కృతఘటనశ్చక్రవాకమిథునానాం |
దర్శితసమస్తభువనః పరహితనిరతో రవిః సదా జయతి || 5 ||
అపనయతు సకలకలికృతమలపటలం సప్రతప్తకనకాభః |
అరవిందవృందవిఘటనపటుతరకిరణోత్కరః సవితా || 6 ||
ఉదయాద్రిచారుచామర హరితహయఖురపరిహతరేణురాగ |
హరితహయ హరితపరికర గగనాంగణదీపక నమస్తేఽస్తు || 7 ||
ఉదితవతి త్వయి విలసతి ముకులీయతి సమస్తమస్తమితబింబే |
న హ్యన్యస్మిన్ దినకర సకలం కమలాయతే భువనం || 8 ||
జయతి రవిరుదయసమయే బాలాతపః కనకసన్నిభో యస్య |
కుసుమాంజలిరివ జలధౌ తరంతి రథసప్తయః సప్త || 9 ||
ఆర్యాః సాంబపురే సప్త ఆకాశాత్పతితా భువి |
యస్య కంఠే గృహే వాపి న స లక్ష్ంయా వియుజ్యతే || 10 ||
ఆర్యాః సప్త సదా యస్తు సప్తంయాం సప్తధా జపేత్ |
తస్య గేహం చ దేహం చ పద్మా సత్యం న ముంచతి || 11 ||
నిధిరేష దరిద్రాణాం రోగిణాం పరమౌషధం |
సిద్ధిః సకలకార్యాణాం గాథేయం సంస్మృతా రవేః || 12 ||
ఇతి శ్రీయాజ్ఞవల్క్య విరచితం శ్రీ సూర్యార్యా స్తోత్రం |