Agastya Kruta Sri Lakshmi Stotram pdf download – శ్రీ లక్ష్మీ స్తోత్రం (అగస్త్య కృతం)

జయ పద్మపలాశాక్షి జయ త్వం శ్రీపతిప్రియే |
జయ మాతర్మహాలక్ష్మి సంసారార్ణవతారిణి || 1 ||
మహాలక్ష్మి నమస్తుభ్యం నమస్తుభ్యం సురేశ్వరి |
హరిప్రియే నమస్తుభ్యం నమస్తుభ్యం దయానిధే || 2 ||
పద్మాలయే నమస్తుభ్యం నమస్తుభ్యం చ సర్వదే |
సర్వభూతహితార్థాయ వసువృష్టిం సదా కురు || 3 ||
జగన్మాతర్నమస్తుభ్యం నమస్తుభ్యం దయానిధే |
దయావతి నమస్తుభ్యం విశ్వేశ్వరి నమోఽస్తు తే || 4 ||
నమః క్షీరార్ణవసుతే నమస్త్రైలోక్యధారిణి |
వసువృష్టే నమస్తుభ్యం రక్ష మాం శరణాగతం || 5 ||
రక్ష త్వం దేవదేవేశి దేవదేవస్య వల్లభే |
దారిద్ర్యాత్త్రాహి మాం లక్ష్మి కృపాం కురు మమోపరి || 6 ||
నమస్త్రైలోక్యజనని నమస్త్రైలోక్యపావని |
బ్రహ్మాదయో నమంతి త్వాం జగదానందదాయిని || 7 ||
విష్ణుప్రియే నమస్తుభ్యం నమస్తుభ్యం జగద్ధితే |
ఆర్తిహంత్రి నమస్తుభ్యం సమృద్ధిం కురు మే సదా || 8 ||
అబ్జవాసే నమస్తుభ్యం చపలాయై నమో నమః |
చంచలాయై నమస్తుభ్యం లలితాయై నమో నమః || 9 ||
నమః ప్రద్యుంనజనని మాతస్తుభ్యం నమో నమః |
పరిపాలయ మాం మాతః మాం తుభ్యం శరణాగతం || 10 ||
శరణ్యే త్వాం ప్రపన్నోఽస్మి కమలే కమలాలయే |
త్రాహి త్రాహి మహాలక్ష్మి పరిత్రాణపరాయణే || 11 ||
పాండిత్యం శోభతే నైవ న శోభంతే గుణా నరే |
శీలత్వం నైవ శోభేత మహాలక్ష్మి త్వయా వినా || 12 ||
తావద్విరాజతే రూపం తావచ్ఛీలం విరాజతే |
తావద్గుణా నరాణాం చ యావల్లక్ష్మీః ప్రసీదతి || 13 ||
లక్ష్మి త్వయాఽలంకృతమానవా యే
పాపైర్విముక్తా నృపలోకమాన్యాః |
గుణైర్విహీనా గుణినో భవంతి
దుశ్శీలినః శీలవతాం వరిష్ఠాః || 14 ||
లక్ష్మీర్భూషయతే రూపం లక్ష్మీర్భూషయతే కులం |
లక్ష్మీర్భూషయతే విద్యాం సర్వా లక్ష్మీర్విశిష్యతే || 15 ||
లక్ష్మీ త్వద్గుణకీర్తనేన కమలా భూర్యాత్యలం జిహ్మతాం
రుద్రాద్యా రవిచంద్రదేవపతయో వక్తుం చ నైవ క్షమాః |
అస్మాభిస్తవ రూపలక్షణగుణాన్వక్తుం కథం శక్యతే
మాతర్మాం పరిపాహి విశ్వజననీ కృత్వా మమేష్టం ధ్రువం || 16 ||
దీనార్తిభీతం భవతాపపీడితం
ధనైర్విహీనం తవ పార్శ్వమాగతం |
కృపానిధిత్వాన్మమ లక్ష్మి సత్వరం
ధనప్రదానాద్ధననాయకం కురు || 17 ||
మాం విలోక్య జననీ హరిప్రియే
నిర్ధనం తవ సమీపమాగతం |
దేహి మే ఝటితి లక్ష్మి కరాగ్రం
వస్త్రకాంచనవరాన్నమద్భుతం || 18 ||
త్వమేవ జననీ లక్ష్మీః పితా లక్ష్మీస్త్వమేవ చ |
భ్రాతా త్వం చ సఖా లక్ష్మీర్విద్యా లక్ష్మీస్త్వమేవ చ || 19 ||
త్రాహి త్రాహి మహాలక్ష్మి త్రాహి త్రాహి సురేశ్వరి |
త్రాహి త్రాహి జగన్మాతః దారిద్ర్యాత్త్రాహి వేగతః || 20 ||
నమస్తుభ్యం జగద్ధాత్రి నమస్తుభ్యం నమో నమః |
ధర్మాధారే నమస్తుభ్యం నమః సంపత్తిదాయినీ || 21 ||
దారిద్ర్యార్ణవమగ్నోఽహం నిమగ్నోఽహం రసాతలే |
మజ్జంతం మాం కరే ధృత్వా తూద్ధర త్వం రమే ద్రుతం || 22 ||
కిం లక్ష్మి బహునోక్తేన జల్పితేన పునః పునః |
అన్యన్మే శరణం నాస్తి సత్యం సత్యం హరిప్రియే || 23 ||
ఏతచ్ఛ్రుత్వాఽగస్త్యవాక్యం హృష్యమాణా హరిప్రియా |
ఉవాచ మధురాం వాణీం తుష్టాఽహం తవ సర్వదా || 24 ||
శ్రీలక్ష్మీరువాచ |
యత్త్వయోక్తమిదం స్తోత్రం యః పఠిష్యతి మానవః |
శృణోతి చ మహాభాగస్తస్యాహం వశవర్తినీ || 25 ||
నిత్యం పఠతి యో భక్త్యా త్వలక్ష్మీస్తస్య నశ్యతి |
ఋణం చ నశ్యతే తీవ్రం వియోగం నైవ పశ్యతి || 26 ||
యః పఠేత్ప్రాతరుత్థాయ శ్రద్ధాభక్తిసమన్వితః |
గృహే తస్య సదా తిష్టేన్నిత్యం శ్రీః పతినా సహ || 27 ||
సుఖసౌభాగ్యసంపన్నో మనస్వీ బుద్ధిమాన్భవేత్ |
పుత్రవాన్ గుణవాన్ శ్రేష్ఠో భోగభోక్తా చ మానవః || 28 ||
ఇదం స్తోత్రం మహాపుణ్యం లక్ష్ంయాగస్త్యప్రకీర్తితం |
విష్ణుప్రసాదజననం చతుర్వర్గఫలప్రదం || 29 ||
రాజద్వారే జయశ్చైవ శత్రోశ్చైవ పరాజయః |
భూతప్రేతపిశాచానాం వ్యాఘ్రాణాం న భయం తథా || 30 ||
న శస్త్రానలతోయౌఘాద్భయం తస్య ప్రజాయతే |
దుర్వృత్తానాం చ పాపానాం బహుహానికరం పరం || 31 ||
మందురాకరిశాలాసు గవాం గోష్ఠే సమాహితః |
పఠేత్తద్దోషశాంత్యర్థం మహాపాతకనాశనం || 32 ||
సర్వసౌఖ్యకరం నౄణామాయురారోగ్యదం తథా |
అగస్త్యమునినా ప్రోక్తం ప్రజానాం హితకాంయయా || 33 ||
ఇత్యగస్త్యవిరచితం శ్రీ లక్ష్మీ స్తోత్రం |