Sri Lalitha Arya Dwisathi pdf download – శ్రీ లలితా స్తవరత్నం (ఆర్యా ద్విశతీ)

వందే గజేంద్రవదనం
వామాంకారూఢవల్లభాశ్లిష్టం |
కుంకుమపరాగశోణం
కువలయినీజారకోరకాపీడం || 1 ||
స జయతి సువర్ణశైలః
సకలజగచ్చక్రసంఘటితమూర్తిః |
కాంచననికుంజవాటీ-
-కందలదమరీప్రపంచసంగీతః || 2 ||
హరిహయనైరృతమారుత-
-హరితామంతేష్వవస్థితం తస్య |
వినుమః సానుత్రితయం
విధిహరిగౌరీశవిష్టపాధారం || 3 ||
మధ్యే పునర్మనోహర-
-రత్నరుచిస్తబకరంజితదిగంతం |
ఉపరి చతుఃశతయోజన-
-ముత్తుంగం శృంగపుంగవముపాసే || 4 ||
తత్ర చతుఃశతయోజన-
-పరిణాహం దేవశిల్పినా రచితం |
నానాసాలమనోజ్ఞం
నమాంయహం నగరమాదివిద్యాయాః || 5 ||
ప్రథమం సహస్రపూర్వక-
-షట్శతసంఖ్యాకయోజనం పరితః |
వలయీకృతస్వగాత్రం
వరణం శరణం వ్రజాంయయోరూపం || 6 ||
తస్యోత్తరే సమీరణ-
-యోజనదూరే తరంగితచ్ఛాయః |
ఘటయతు ముదం ద్వితీయో
ఘంటాస్తనసారనిర్మితః సాలః || 7 ||
ఉభయోరంతరసీమ-
-న్యుద్దామభ్రమరరంజితోదారం |
ఉపవనముపాస్మహే వయ-
-మూరీకృతమందమారుతస్యందం || 8 ||
ఆలింగ్య భద్రకాలీ-
-మాసీనస్తత్ర హరిశిలాశ్యామాం |
మనసి మహాకాలో మే
విహరతు మధుపానవిభ్రమన్నేత్రః || 9 ||
తార్తీయీకో వరణ-
-స్తస్యోత్తరసీంని వాతయోజనతః |
తాంరేణ రచితమూర్తి-
-స్తనుతామాచంద్రతారకం భద్రం || 10 ||
మధ్యే తయోశ్చ మణిమయ-
-పల్లవశాఖాప్రసూనపక్ష్మలితాం |
కల్పానోకహవాటీం
కలయే మకరందపంకిలావాలాం || 11 ||
తత్ర మధుమాధవశ్రీ-
-తరుణీభ్యాం తరలదృక్చకోరాభ్యాం |
ఆలింగితోఽవతాన్మా-
-మనిశం ప్రథమర్తురాత్తపుష్పాస్త్రః || 12 ||
నమత తదుత్తరభాగే
నాకిపథోల్లంఘిశృంగసంఘాతం |
సీసాకృతిం తురీయం
సితకిరణాలోకనిర్మలం సాలం || 13 ||
సాలద్వయాంతరాలే
సరలాలికపోతచాటుసుభగాయాం |
సంతానవాటికాయాం
సక్తం చేతోఽస్తు సతతమస్మాకం || 14 ||
తత్ర తపనాతిరూక్షః
సాంరాజ్ఞీచరణసాంద్రితస్వాంతః |
శుక్రశుచిశ్రీసహితో
గ్రీష్మర్తుర్దిశతు కీర్తిమాకల్పం || 15 ||
ఉత్తరసీమని తస్యో-
-న్నతశిఖరోత్కంపిహాటకపతాకః |
ప్రకటయతు పంచమో నః
ప్రాకారః కుశలమారకూటమయః || 16 ||
ప్రాకారయోశ్చ మధ్యే
పల్లవితాన్యభృతపంచమోన్మేషా |
హరిచందనద్రువాటీ-
-హరతాదామూలమస్మదనుతాపం || 17 ||
తత్ర నభః శ్రీముఖ్యై-
-స్తరుణీవర్గైః సమన్వితః పరితః |
వజ్రాట్టహాసముఖరో
వాంఛాపూర్తిం తనోతు వర్షర్తుః || 18 ||
మారుతయోజనదూరే
మహనీయస్తస్య చోత్తరే భాగే |
భద్రం కృషీష్ట షష్ఠః
ప్రాకారః పంచలోహధాతుమయః || 19 ||
అనయోర్మధ్యే సంతత-
-మంకూరద్దివ్యకుసుమగంధాయాం |
మందారవాటికాయాం
మానసమంగీకరోతు మే విహృతిం || 20 ||
తస్యామిషోర్జలక్ష్మీ-
-తరుణీభ్యాం శరదృతుః సదా సహితః |
అభ్యర్చయన్ స జీయా-
-దంబామామోదమేదురైః కుసుమైః || 21 ||
తస్యర్షిసంఖ్యయోజన-
-దూరే దేదీప్యమానశృంగౌఘః |
కలధౌతకలితమూర్తిః
కల్యాణం దిశతు సప్తమః సాలః || 22 ||
మధ్యే తయోర్మరుత్పథ
లంఘితవిటపాగ్రవిరుతకలకంఠా |
శ్రీపారిజాతవాటీ
శ్రియమనిశం దిశతు శీతలోద్దేశా || 23 ||
తస్యామతిప్రియాభ్యాం
సహ ఖేలన్ సహసహస్యలక్ష్మీభ్యాం |
సామంతో ఝషకేతో-
-ర్హేమంతో భవతు హేమవృద్ధ్యై నః || 24 ||
ఉత్తరతస్తస్య మహా-
-నుద్భటహుతభుక్శిఖారుణమయూఖః |
తపనీయఖండరచిత-
-స్తనుతాదాయుష్యమష్టమో వరణః || 25 ||
కాదంబవిపినవాటీ-
-మనయోర్మధ్యభువి కల్పితావాసాం |
కలయామి సూనకోరక-
-కందలితామోదతుందిలసమీరాం || 26 ||
తస్యామతిశిశిరాకృతి-
-రాసీనస్తపతపస్యలక్ష్మీభ్యాం |
శివమనిశం కురుతాన్మే
శిశిరర్తుః సతతశీతలదిగంతః || 27 ||
తస్యాం కదంబవాట్యాం
తత్ప్రసవామోదమిలితమధుగంధం |
సప్తావరణమనోజ్ఞం
శరణం సముపైమి మంత్రిణీశరణం || 28 ||
తత్రాలయే విశాలే
తపనీయారచితతరలసోపానే |
మాణిక్యమండపాంత-
-ర్మహితే సింహాసనే సుమణిఖచితే || 29 ||
బిందుత్రిపంచకోణ-
-ద్విపనృపవసువేదదలకురేఖాఢ్యే |
చక్రే సదా నివిష్టాం
షష్ఠ్యష్టత్రింశదక్షరేశానీం || 30 ||
తాపింఛమేచకాభాం
తాలీదలఘటితకర్ణతాటంకాం |
తాంబూలపూరితముఖీం
తాంరాధరబింబదృష్టదరహాసాం || 31 ||
కుంకుమపంకిలదేహాం
కువలయజీవాతుశావకవతంసాం |
కోకనదశోణచరణాం
కోకిలనిక్వాణకోమలాలాపాం || 32 ||
వామాంగగలితచూలీం
వనమాల్యకదంబమాలికాభరణాం |
ముక్తాలలంతికాంచిత
ముగ్ధాలికమిలితచిత్రకోదారాం || 33 ||
కరవిధృతకీరశావక-
-కలనినదవ్యక్తనిఖిలనిగమార్థాం |
వామకుచసంగివీణావాదన-
-సౌఖ్యార్ధమీలితాక్షియుగాం || 34 ||
ఆపాటలాంశుకధరా-
-మాదిరసోన్మేషవాసితకటాక్షాం |
ఆంనాయసారగులికా-
-మాద్యాం సంగీతమాతృకాం వందే || 35 ||
తస్య చ సువర్ణసాల-
-స్యోత్తరతస్తరుణకుంకుమచ్ఛాయః |
శమయతు మమ సంతాపం
సాలో నవమః స పుష్పరాగమయః || 36 ||
అనయోరంతరవసుధాః
ప్రణుమః ప్రత్యగ్రపుష్పరాగమయీః |
సింహాసనేశ్వరీమను-
-చింతననిస్తంద్రసిద్ధనీరంధ్రాః || 37 ||
తత్సాలోత్తరదేశే
తరుణజపాకిరణధోరణీశోణః |
ప్రశమయతు పద్మరాగ-
-ప్రాకారో మమ పరాభవం దశమః || 38 ||
అంతరభూకృతవాసా-
-ననయోరపనీతచిత్తవైమత్యాన్ |
చక్రేశీపదభక్తాం-
-శ్చారణవర్గానహర్నిశం కలయే || 39 ||
సారంగవాహయోజనదూరే-
-ఽసంఘటితకేతనస్తస్య |
గోమేదకేన రచితో
గోపాయతు మాం సమున్నతః సాలః || 40 ||
వప్రద్వయాంతరోర్వ్యాం
వటుకైర్వివిధైశ్చ యోగినీబృందైః |
సతతం సమర్చితాయాః
సంకర్షణ్యాః ప్రణౌమి చరణాబ్జం || 41 ||
తాపసయోజనదూరే
తస్య సముత్తుంగ గోపురోపేతః |
వాంఛాపూర్త్యై భవతా-
-ద్వజ్రమణీనికరనిర్మితో వప్రః || 42 ||
వరణద్వితయాంతరతో
వాసజుషో విహితమధురసాస్వాదాః |
రంభాదివిబుధవేశ్యా
రచయంతు మహాంతమస్మదానందం || 43 ||
తత్ర సదా ప్రవహంతీ
తటినీ వజ్రాభిధా చిరం జీయాత్ |
చటులోర్మిజాలనృత్య-
-త్కలహంసీకులకలక్వణితపుష్టా || 44 ||
రోధసి తస్యా రుచిరే
వజ్రేశీ జయతి వజ్రభూషాఢ్యా |
వజ్రప్రదానతోషిత-
-వజ్రిముఖత్రిదశవినుతచారిత్రా || 45 ||
తస్యోదీచ్యాం హరితి
స్తవకితసుషమావలీఢవియదంతః |
వైడూర్యరత్నరచితో
వైమల్యం దిశతు చేతసో వరణః || 46 ||
అధిమధ్యమేతయోః పున-
-రంబాచరణావలంబితస్వాంతాన్ |
కార్కోటకాదినాగాన్
కలయామః కిం చ బలిముఖాన్ దనుజాన్ || 47 ||
గంధవహసంఖ్యయోజన-
-దూరే గగనోర్ధ్వజాంఘికస్తస్య |
వాసవమణిప్రణీతో
వరణో బహలయతు వైదుషీం విశదాం || 48 ||
మధ్యక్షోణ్యామనయో-
-ర్మహేంద్రనీలాత్మకాని చ సరాంసి |
శాతోదరీసహాయా-
-న్భూపాలానపి పునః పునః ప్రణుమః || 49 ||
ఆశుగయోజనదూరే
తస్యోర్ధ్వం కాంతిధవలితదిగంతః |
ముక్తావిరచితగాత్రో
ముహురస్మాకం ముదే భవతు సాలః || 50 ||
ఆవృత్త్యోరధిమధ్యం
పూర్వస్యాం దిశి పురందరః శ్రీమాన్ |
అభ్రమువిటాధిరూఢో
విభ్రమమస్మాకమనిశమాతనుతాత్ || 51 ||
తత్కోణే వ్యజనస్రు-
-క్తోమరపాత్రస్రువాన్నశక్తిధరః |
స్వాహాస్వధాసమేతః
సుఖయతు మాం హవ్యవాహనః సుచిరం || 52 ||
దక్షిణదిగంతరాలే
దండధరో నీలనీరదచ్ఛాయః |
త్రిపురాపదాబ్జభక్తస్తిరయతు
మమ నిఖిలమంహసాం నికరం || 53 ||
తస్యైవ పశ్చిమాయాం
దిశి దలితేందీవరప్రభాశ్యామః |
ఖేటాసియష్టిధారీ
ఖేదానపనయతు యాతుధానో మే || 54 ||
తస్యా ఉత్తరదేశే
ధవలాంగో విపులఝషవరారూఢః |
పాశాయుధాత్తపాణిః
పాశీ విదలయతు పాశజాలాని || 55 ||
వందే తదుత్తరహరి-
-త్కోణే వాయుం చమూరువరవాహం |
కోరకితతత్త్వబోధా-
-న్గోరక్షప్రముఖయోగినోఽపి ముహుః || 56 ||
తరుణీరిడాప్రధానా-
-స్తిస్రో వాతస్య తస్య కృతవాసాః |
ప్రత్యగ్రకాపిశాయన-
-పానపరిభ్రాంతలోచనాః కలయే || 57 ||
తల్లోకపూర్వభాగే
ధనదం ధ్యాయామి శేవధికులేశం |
అపి మాణిభద్రముఖ్యా-
-నంబాచరణావలంబినో యక్షాన్ || 58 ||
తస్యైవ పూర్వసీమని
తపనీయారచితగోపురే నగరే |
కాత్యాయనీసహాయం
కలయే శీతాంశుఖండచూడాలం || 59 ||
తత్పురషోడశవరణ-
-స్థలభాజస్తరుణచంద్రచూడాలాన్ |
రుద్రాధ్యాయే పఠితా-
-న్రుద్రాణీసహచరాన్భజే రుద్రాన్ || 60 ||
పవమానసంఖ్యయోజన-
-దూరే బాలతృణ్మేచకస్తస్య |
సాలో మరకతరచితః
సంపదమచలాం శ్రియం చ పుష్ణాతు || 61 ||
ఆవృతియుగ్మాంతరతో
హరితమణీనివహమేచకే దేశే |
హాటకతాలీవిపినం
హాలాఘటఘటితవిటపమాకలయే || 62 ||
తత్రైవ మంత్రిణీగృహ-
-పరిణాహం తరలకేతనం సదనం |
మరకతసౌధమనోజ్ఞం
దద్యాదాయూంషి దండనాథాయాః || 63 ||
సదనే తత్ర హరిన్మణి-
-సంఘటితే మండపే శతస్తంభే |
కార్తస్వరమయపీఠే
కనకమయాంబురుహకర్ణికామధ్యే || 64 ||
బిందుత్రికోణవర్తుల-
-షడస్రవృత్తద్వయాన్వితే చక్రే |
సంచారిణీ దశోత్తర-
శతార్ణమనురాజకమలకలహంసీ || 65 ||
కోలవదనా కుశేశయ-
-నయనా కోకారిమండితశిఖండా |
సంతప్తకాంచనాభా
సంధ్యారుణచేలసంవృతనితంబా || 66 ||
హలముసలశంఖచక్రా-
-ఽంకుశపాశాభయవరస్ఫురితహస్తా |
కూలంకషానుకంపా
కుంకుమజంబాలితస్తనాభోగా || 67 ||
ధూర్తానామతిదూరా-
-వార్తాశేషావలగ్నకమనీయా |
ఆర్తాలీశుభదాత్రీ
వార్తాలీ భవతు వాంఛితార్థాయ || 68 ||
తస్యాః పరితో దేవీః
స్వప్నేశ్యున్మత్తభైరవీముఖ్యాః |
ప్రణమత జంభిన్యాద్యాః
భైరవవర్గాంశ్చ హేతుకప్రముఖాన్ || 69 ||
పూర్వోక్తసంఖ్యయోజన-
-దూరే పూయాంశుపాటలస్తస్య |
విద్రావయతు మదార్తిం
విద్రుమసాలో విశంకటద్వారః || 70 ||
ఆవరణయోరహర్నిశ-
-మంతరభూమౌప్రకాశశాలిన్యాం |
ఆసీనమంబుజాసన-
-మభినవసిందూరగౌరమహమీడే || 71 ||
వరణస్య తస్య మారుత-
-యోజనతో విపులగోపురద్వారః |
సాలో నానారత్నైః
సంఘటితాంగః కృషీష్ట మదభీష్టం || 72 ||
అంతరకక్ష్యామనయో-
-రవిరలశోభాపిచండిలోద్దేశాం |
మాణిక్యమండపాఖ్యాం
మహతీమధిహృదయమనిశమాకలయే || 73 ||
తత్ర స్థితం ప్రసన్నం
తరుణతమాలప్రవాలకిరణాభం |
కర్ణావలంబికుండల-
-కందలితాభీశుకవచితకపోలం || 74 ||
శోణాధరం శుచిస్మిత-
-మేణాంకవదనమేధమానకృపం |
ముగ్ధైణమదవిశేషక-
-ముద్రితనిటిలేందురేఖికారుచిరం || 75 ||
నాలీకదలసహోదర-
-నయనాంచలఘటితమనసిజాకూతం |
కమలాకఠినపయోధర-
-కస్తూరీఘుసృణపంకిలోరస్కం || 76 ||
చాంపేయగంధికైశ్యం
శంపాసబ్రహ్మచారికౌశేయం |
శ్రీవత్సకౌస్తుభధరం
శ్రితజనరక్షాధురీణచరణాబ్జం || 77 ||
కంబుసుదర్శనవిలస-
-త్కరపద్మం కంఠలోలవనమాలం |
ముచుకుందమోక్షఫలదం
ముకుందమానందకందమవలంబే || 78 ||
తద్వరణోత్తరభాగే
తారాపతిబింబచుంబినిజశృంగః |
వివిధమణీగణఘటితో
వితరతు సాలో వినిర్మలాం ధిషణాం || 79 ||
ప్రాకారద్వితయాంతర-
-కక్ష్యాం పృథురత్ననికరసంకీర్ణాం |
నమత సహస్రస్తంభక-
-మండపనాంనాతివిశ్రుతాం భువనే || 80 ||
ప్రణుమస్తత్ర భవానీ-
-సహచరమీశానమిందుఖండధరం |
శృంగారనాయికామను-
-శీలనభాజోఽపి భృంగినందిముఖాన్ || 81 ||
తస్యైణవాహయోజన-
-దూరే వందే మనోమయం వప్రం |
అంకూరన్మణికిరణా-
-మంతరకక్ష్యాం చ నిర్మలామనయోః || 82 ||
తత్రైవామృతవాపీం
తరలతరంగావలీఢతటయుగ్మాం |
ముక్తామయకలహంసీ-
-ముద్రితకనకారవిందసందోహాం || 83 ||
శక్రోపలమయభృంగీ-
-సంగీతోన్మేషఘోషితదిగంతాం |
కాంచనమయాంగవిలస-
-త్కారండవషండతాండవమనోజ్ఞాం || 84 ||
కురువిందాత్మకహల్లక-
-కోరకసుషమాసమూహపాటలితాం |
కలయే సుధాస్వరూపాం
కందలితామందకైరవామోదాం || 85 ||
తద్వాపికాంతరాలే తరలే
మణిపోతసీంని విహరంతీం |
సిందూరపాటలాంగీం
సితకిరణాంకూరకల్పితవతంసాం || 86 ||
పర్వేందుబింబవదనాం
పల్లవశోణాధరస్ఫురితహాసాం |
కుటిలకబరీం కురంగీ-
-శిశునయనాం కుండలస్ఫురితగండాం || 87 ||
నికటస్థపోతనిలయాః
శక్తీః శయవిధృతహేమశృంగజలైః |
పరిషించంతీం పరిత-
-స్తారాం తారుణ్యగర్వితాం వందే || 88 ||
ప్రాగుక్తసంఖ్యయోజనదూరే
ప్రణమామి బుద్ధిమయసాలం |
అనయోరంతరకక్ష్యా-
-మష్టాపదపుష్టమేదినీం రుచిరాం || 89 ||
కాదంబరీనిధానాం
కలయాంయానందవాపికాం తస్యాం |
శోణాశ్మనివహనిర్మిత-
-సోపానశ్రేణిశోభమానతటీం || 90 ||
మాణిక్యతరణినిలయాం
మధ్యే తస్యా మదారుణకపోలాం |
అమృతేశీత్యభిధానా-
-మంతః కలయామి వారుణీం దేవీం || 91 ||
సౌవర్ణకేనిపాతన-
-హస్తాః సౌందర్యగర్వితా దేవ్యః |
తత్పురతః స్థితిభాజో
వితరంత్వస్మాకమాయుషో వృద్ధిం || 92 ||
తస్య పృషదశ్వయోజన-
-దూరేఽహంకారసాలమతితుంగం |
వందే తయోశ్చ మధ్యే
కక్ష్యాం వలమానమలయపవమానాం || 93 ||
వినుమో విమర్శవాపీం
సౌషుంనసుధాస్వరూపిణీం తత్ర |
వేలాతిలంఘ్యవీచీ-
-కోలాహలభరితకూలవనవాటీం || 94 ||
తత్రైవ సలిలమధ్యే
తాపింఛదలప్రపంచసుషమాభాం |
శ్యామలకంచుకలసితాం
శ్యామావిటబింబడంబరహరాస్యాం || 95 ||
ఆభుగ్నమసృణచిల్లీ-
-హసితాయుగ్మశరకార్ముకవిలాసాం |
మందస్మితాంచితముఖీం
మణిమయతాటంకమండితకపోలాం || 96 ||
కురువిందతరణినిలయాం
కులాచలస్పర్ధికుచనమన్మధ్యాం |
కుంకుమవిలిప్తగాత్రీం
కురుకుల్లాం మనసి కుర్మహే సతతం || 97 ||
తత్సాలోత్తరభాగే
భానుమయం వప్రమాశ్రయే దీప్తం |
మధ్యం చ విపులమనయో-
-ర్మన్యే విశ్రాంతమాతపోద్గారం || 98 ||
తత్ర కురువిందపీఠే
తామరసే కనకకర్ణికాఘటితే |
ఆసీనమరుణవాసస-
-మంలానప్రసవమాలికాభరణం || 99 ||
చక్షుష్మతీప్రకాశన-
-శక్తిచ్ఛాయాసమారచితకేలిం |
మాణిక్యముకుటరంయం
మన్యే మార్తాండభైరవం హృదయే || 100 ||
ఇందుమయసాలమీడే
తస్యోత్తరతస్తుషారగిరిగౌరం |
అత్యంతశిశిరమారుత-
-మనయోర్మధ్యం చ చంద్రికోద్గారం || 101 ||
తత్ర ప్రకాశమానం
తారానికరైః పరిష్కృతోద్దేశం |
అమృతమయకాంతికందల-
-మంతః కలయామి కుందసితమిందుం || 102 ||
శృంగారసాలమీడే
శృంగోల్లసితం తదుత్తరే భాగే |
మధ్యస్థలే తయోరపి
మహితాం శృంగారపూర్వికాం పరిఖాం || 103 ||
తత్ర మణినౌస్థితాభి-
-స్తపనీయావిరచితాగ్రహస్తాభిః |
శృంగారదేవతాభిః
సహితం పరిఖాధిపం భజే మదనం || 104 ||
శృంగారవరణవర్యస్యోత్తరతః
సకలవిబుధసంసేవ్యం |
చింతామణిగణరచితం
చింతాం దూరీకరోతు మే సదనం || 105 ||
మణిసదనసాలయోరధి-
-మధ్యం దశతాలభూమిరుహదీర్ఘైః |
పర్ణైః సువర్ణవర్ణై-
-ర్యుక్తాం కాండైశ్చ యోజనోత్తుంగైః || 106 ||
మృదులైస్తాలీపంచక-
-మానైర్మిలితాం చ కేసరకదంబైః |
సంతతగలితమరంద-
-స్రోతోనిర్యన్మిలిందసందోహాం || 107 ||
పాటీరపవనబాలక-
-ధాటీనిర్యత్పరాగపింజరితాం |
కలహంసీకులకలకల-
-కూలంకషనినదనిచయకమనీయాం || 108 ||
పద్మాటవీం భజామః
పరిమలకల్లోలపక్ష్మలోపాంతాం |
[* దేవ్యర్ఘ్యపాత్రధారీ
తస్యాః పూర్వదిశి దశకలాయుక్తః | *] వలయితమూర్తిర్భగవా-
-న్వహ్నిః క్రోశోన్నతశ్చిరం పాయాత్ || 109 ||
తత్రాధారే దేవ్యాః
పాత్రీరూపః ప్రభాకరః శ్రీమాన్ |
ద్వాదశకలాసమేతో
ధ్వాంతం మమ బహులమాంతరం భింద్యాత్ || 110 ||
తస్మిన్ దినేశపాత్రే
తరంగితామోదమమృతమయమర్ఘ్యం |
చంద్రకలాత్మకమమృతం
సాంద్రీకుర్యాదమందమానందం || 111 ||
అమృతే తస్మిన్నభితో
విహరంత్యో వివిధమణితరణిభాజః |
షోడశ కలాః సుధాంశోః
శోకాదుత్తారయంతు మామనిశం || 112 ||
తత్రైవ విహృతిభాజో
ధాతృముఖానాం చ కారణేశానాం |
సృష్ట్యాదిరూపికాస్తాః
శమయంత్వఖిలాః కలాశ్చ సంతాపం || 113 ||
కీనాశవరుణకిన్నర-
-రాజదిగంతేషు రత్నగేహస్య |
కలయామి తాన్యజస్రం
కలయంత్వాయుష్యమర్ఘ్యపాత్రాణి || 114 ||
పాత్రస్థలస్య పురతః
పద్మారమణవిధిపార్వతీశానాం |
భవనాని శర్మణే నో
భవంతు భాసా ప్రదీపితజగంతి || 115 ||
సదనస్యానలకోణే
సతతం ప్రణమామి కుండమాగ్నేయం |
తత్ర స్థితం చ వహ్నిం
తరలశిఖాజటిలమంబికాజనకం || 116 ||
తస్యాసురదిశి తాదృశ-
-రత్నపరిస్ఫురితపర్వనవకాఢ్యం |
చక్రాత్మకం శతాంగం
శతయోజనమున్నతం భజే దివ్యం || 117 ||
తత్రైవ దిశి నిషణ్ణం
తపనీయధ్వజపరంపరాశ్లిష్టం |
రథమపరం చ భవాన్యా
రచయామో మనసి రత్నమయచూడం || 118 ||
భవనస్య వాయుభాగే
పరిష్కృతో వివిధవైజయంతీభిః |
రచయతు ముదం రథేంద్రః
సచివేశాన్యాః సమస్తవంద్యాయాః || 119 ||
కుర్మోఽధిహృదయమనిశం
క్రోడాస్యాయాః శతాంగమూర్ధన్యం |
రుద్రదిశి రత్నధాంనో
రుచిరశలాకాప్రపంచకంచుకితం || 120 ||
పరితో దేవీధాంనః
ప్రణీతవాసా మనుస్వరూపిణ్యః |
కుర్వంతు రశ్మిమాలా-
-కృతయః కుశలాని దేవతా నిఖిలాః || 121 ||
ప్రాగ్ద్వారస్య భవానీ-
-ధాంనః పార్శ్వద్వయారచితవాసే |
మాతంగీకిటిముఖ్యౌ
మణిసదనే మనసి భావయామి చిరం || 122 ||
యోజనయుగలాభోగా
తత్క్రోశపరిణాహయైవ భిత్త్యా చ |
చింతామణిగృహభూమి-
-ర్జీయాదాంనాయమయచతుర్ద్వారా || 123 ||
ద్వారే ద్వారే ధాంనః
పిండీభూతా నవీనబింబాభాః |
విదధతు విపులాం కీర్తిం
దివ్యా లౌహిత్యసిద్ధ్యో దేవ్యః || 124 ||
మణిసదనస్యాంతరతో
మహనీయే రత్నవేదికామధ్యే |
బిందుమయచక్రమీడే
పీఠానాముపరి విరచితావాసం || 125 ||
చక్రాణాం సకలానాం
ప్రథమమధః సీమఫలకవాస్తవ్యాః |
అణిమాదిసిద్ధయో మా-
-మవంతు దేవీ ప్రభాస్వరూపిణ్యః || 126 ||
అణిమాదిసిద్ధిఫలక-
-స్యోపరిహరిణాంకఖండకృతచూడాః |
భద్రం పక్ష్మలయంతు
బ్రాహ్మీప్రముఖాశ్చ మాతరోఽస్మాకం || 127 ||
తస్యోపరి మణిఫలకే
తారుణ్యోత్తుంగపీనకుచభారాః |
సంక్షోభిణీప్రధానాః
భ్రాంతి విద్రావయంతు దశ ముద్రాః || 128 ||
ఫలకత్రయస్వరూపే
పృథులే త్రైలోక్యమోహనే చక్రే |
దీవ్యంతు ప్రకటాఖ్యా-
-స్తాసాం కర్త్రీం చ భగవతీ త్రిపురా || 129 ||
తదుపరి విపులే ధిష్ణ్యే
తరలదృశస్తరుణకోకనదభాసః |
కామాకర్షిణ్యాద్యాః
కలయే దేవీః కలాధరశిఖండాః || 130 ||
సర్వాశాపరిపూరకచక్రే-
-ఽస్మిన్ గుప్తయోగినీసేవ్యాః |
త్రిపురేశీ మమ దురితం
తుద్యాత్ కంఠావలంబిమణిహారా || 131 ||
తస్యోపరి మణిపీఠే
తాంరాంభోరుహదలప్రభాశోణాః |
ధ్యాయాంయనంగకుసుమా-
-ప్రముఖా దేవీశ్చ విధృతకూర్పాసాః || 132 ||
సంక్షోభకారకేఽస్మిం-
-శ్చక్రే శ్రీత్రిపురసుందరీ సాక్షాత్ |
గోప్త్రీ గుప్తతరాఖ్యాః
గోపాయతు మాం కృపార్ద్రయా దృష్ట్యా || 133 ||
సంక్షోభిణీప్రధానాః
శక్తీస్తస్యోర్ధ్వవలయకృతవాసాః |
ఆలోలనీలవేణీ-
-రంతః కలయామి యౌవనోన్మత్తాః || 134 ||
సౌభాగ్యదాయకేఽస్మిం-
-శ్చక్రేశీ త్రిపురవాసినీ జీయాత్ |
శక్తీశ్చ సంప్రదాయాభిధాః
సమస్తాః ప్రమోదయంత్వనిశం || 135 ||
మణిపీఠోపరి తాసాం
మహతి చతుర్హస్తవిస్తృతే వలయే |
సంతతవిరచితవాసాః
శక్తీః కలయామి సర్వసిద్ధిముఖాః || 136 ||
సర్వార్థసాధకాఖ్యే
చక్రేఽముష్మిన్ సమస్తఫలదాత్రీ |
త్రిపురా శ్రీర్మమ కుశలం
దిశతాదుత్తీర్ణయోగినీసేవ్యా || 137 ||
తాసాం నిలయస్యోపరి
ధిష్ణ్యే కౌసుంభకంచుకమనోజ్ఞాః |
సర్వాజ్ఞాద్యాః దేవ్యః
సకలాః సంపాదయంతు మమ కీర్తిం || 138 ||
చక్రే సమస్తరక్షా-
-కరనాంన్యస్మిన్ సమస్తజనసేవ్యాం |
మనసి నిగర్భాసహితాం
మన్యే శ్రీత్రిపురమాలినీం దేవీం || 139 ||
సర్వజ్ఞాసదనస్యోపరి
చక్రే విపులే సమాకలితగేహాః |
వందే వశినీముఖ్యాః
శక్తీః సిందూరరేణురుచః || 140 ||
శ్రీసర్వరోగహరాఖ్య-
-చక్రేఽస్మింస్త్రిపురపూర్వికాం సిద్ధాం |
వందే రహస్యనాంనా
వేద్యాభిః శక్తిభిః సదా సేవ్యాం || 141 ||
వశినీగృహోపరిష్టా-
-ద్వింశతిహస్తోన్నతే మహాపీఠే |
శమయంతు శత్రుబృందం
శస్త్రాణ్యస్త్రాణి చాదిదంపత్యోః || 142 ||
శస్త్రసదనోపరిష్టా-
-ద్వలయే వలవైరిరత్నసంఘటితే |
కామేశ్వరీప్రధానాః
కలయే దేవీః సమస్తజనవంద్యాః || 143 ||
చక్రేఽత్ర సర్వసిద్ధిప్రద-
-నామని సర్వఫలదాత్రీ |
త్రిపురాంబావతు సతతం
పరాపరరహస్యయోగినీసేవ్యా || 144 ||
కామేశ్వరీగృహోపరివలయే
వివిధమనుసంప్రదాయజ్ఞాః |
చత్వారో యుగనాథా
జయంతు మిత్రేశపూర్వకాః గురవః || 145 ||
నాథభవనోపరిష్టా-
-న్నానారత్నచయమేదురే పీఠే |
కామేశ్యాద్యా నిత్యాః
కలయంతు ముదం తిథిస్వరూపిణ్యః || 146 ||
నిత్యాసదనస్యోపరి
నిర్మలమణినివహవిరచితే ధిష్ణ్యే |
కుశలం షడంగదేవ్యః
కలయంత్వస్మాకముత్తరలనేత్రాః || 147 ||
సదనస్యోపరి తాసాం
సర్వానందమయనామకే బిందౌ |
పంచబ్రహ్మాకారాం
మంచం ప్రణమామి మణిగణాకీర్ణం || 148 ||
పరితో మణిమంచస్య
ప్రలంబమానా నియంత్రితా పాశైః |
మాయామయీ జవనికా
మమ దురితం హరతు మేచకచ్ఛాయా || 149 ||
మంచస్యోపరి లంబ-
-న్మదనీపున్నాగమాలికాభరితం |
హరిగోపమయవితానం
హరతాదాలస్యమనిశమస్మాకం || 150 ||
పర్యంకస్య భజామః
పాదాన్బింబాంబుదేందుహేమరుచః |
అజహరిరుద్రేశమయా-
-ననలాసురమారుతేశకోణస్థాన్ || 151 ||
ఫలకం సదాశివమయం
ప్రణౌమి సిందూరరేణుకిరణాభం |
ఆరభ్యాంగేశీనాం
సదనాత్కలితం చ రత్నసోపానం || 152 ||
పట్టోపధానగండక-
-చతుష్టయస్ఫురితపాటలాస్తరణం |
పర్యంకోపరి ఘటితం
పాతు చిరం హంసతూలశయనం నః || 153 ||
తస్యోపరి నివసంతం
తారుణ్యశ్రీనిషేవితం సతతం |
ఆవృంతపుల్లహల్లక-
-మరీచికాపుంజమంజులచ్ఛాయం || 154 ||
సిందూరశోణవసనం
శీతాంశుస్తబకచుంబితకిరీటం |
కుంకుమతిలకమనోహర-
-కుటిలాలికహసితకుముదబంధుశిశుం || 155 ||
పూర్ణేందుబింబవదనం
ఫుల్లసరోజాతలోచనత్రితయం |
తరలాపాంగతరంగిత-
-శఫరాంకనశాస్త్రసంప్రదాయార్థం || 156 ||
మణిమయకుండలపుష్య-
-న్మరీచికల్లోలమాంసలకపోలం |
విద్రుమసహోదరాధర-
-విసృమరసుస్మితకిశోరసంచారం || 157 ||
ఆమోదికుసుమశేఖర-
-మానీలభ్రూలతాయుగమనోజ్ఞం |
వీటీసౌరభవీచీ-
-ద్విగుణితవక్త్రారవిందసౌరభ్యం || 158 ||
పాశాంకుశేక్షుచాప-
-ప్రసవశరస్ఫురితకోమలకరాబ్జం |
కాశ్మీరపంకిలాంగం
కామేశం మనసి కుర్మహే సతతం || 159 ||
తస్యాంకభువి నిషణ్ణాం
తరుణకదంబప్రసూనకిరణాభాం |
శీతాంశుఖండచూడాం
సీమంతన్యస్తసాంద్రసిందూరాం || 160 ||
కుంకుమలలామభాస్వ-
-న్నిటిలాం కుటిలతరచిల్లికాయుగలాం |
నాలీకతుల్యనయనాం
నాసాంచలనటితమౌక్తికాభరణాం || 161 ||
అంకురితమందహాస-
-మరుణాధరకాంతివిజితబింబాభాం |
కస్తూరీమకరీయుత-
-కపోలసంక్రాంతకనకతాటంకాం || 162 ||
కర్పూరసాంద్రవీటీ-
-కబలితవదనారవిందకమనీయాం |
కంబుసహోదరకంఠ-
-ప్రలంబమానాచ్ఛమౌక్తికకలాపాం || 163 ||
కహ్లారదామకోమల-
-భుజయుగలస్ఫురితరత్నకేయూరాం |
కరపద్మమూలవిలస-
-త్కాంచనమయకటకవలయసందోహాం || 164 ||
పాణిచతుష్టయవిలస-
-త్పాశాంకుశపుండ్రచాపపుష్పాస్త్రాం |
కూలంకషకుచశిఖరాం
కుంకుమకర్దమితరత్నకూర్పాసాం || 165 ||
అణుదాయాదవలగ్నా-
-మంబుదశోభాసనాభిరోమలతాం |
మాణిక్యఖచితకాంచీ-
-మరీచికాక్రాంతమాంసలనితంబాం || 166 ||
కరభోరుకాండయుగలాం
జంఘాజితకామజైత్రతూణీరాం |
ప్రపదపరిభూతకూర్మాం
పల్లవసచ్ఛాయపదయుగమనోజ్ఞాం || 167 ||
కమలభవకంజలోచన-
-కిరీటరత్నాంశురంజితపదాబ్జాం |
ఉన్మస్తకానుకంపా-
-ముత్తరలాపాంగపోషితానంగాం || 168 ||
ఆదిమరసావలంబా-
-మనిదం ప్రథమోక్తివల్లరీకలికాం |
ఆబ్రహ్మకీటజననీ-
-మంతః కలయామి సుందరీమనిశం || 169 ||
కస్తు క్షితౌ పటీయా-
-న్వస్తు స్తోతుం శివాంకవాస్తవ్యం |
అస్తు చిరంతనసుకృతైః
ప్రస్తుతకాంయాయ తన్మమ పురస్తాత్ || 170 ||
ప్రభుసంమితోక్తిగంయం
పరమశివోత్సంగతుంగపర్యంకం |
తేజః కించన దివ్యం
పురతో మే భవతు పుండ్రకోదండం || 171 ||
మధురిమభరితశరాసం
మకరందస్యందిమార్గణోదారం |
కైరవిణీవిటచూడం
కైవల్యాయాస్తు కించన మహో నః || 172 ||
అక్షుద్రమిక్షుచాపం
పరోక్షమవలగ్నసీంని త్ర్యక్షం |
క్షపయతు మే క్షేమేతర-
-ముక్షరథప్రేమపక్ష్మలం తేజః || 173 ||
భృంగరుచిసంగరకరాపాంగం
శృంగారతుంగమరుణాంగం |
మంగలమభంగురం మే
ఘటయతు గంగాధరాంగసంగి మహః || 174 ||
ప్రపదాజితకూర్మమూర్జిత-
-కరుణం భర్మరుచినిర్మథనదేహం |
శ్రితవర్మ మర్మ శంభోః
కించన మమ నర్మ శర్మ నిర్మాతు || 175 ||
కాలకురలాలికాలిమ-
-కందలవిజితాలి విధృతమణివాలి |
మిలతు హృది పులినజఘనం
బహులితగలగరలకేలి కిమపి మహః || 176 ||
కుంకుమతిలకితఫాలా
కురువిందచ్ఛాయపాటలదుకూలా |
కరుణాపయోధివేలా
కాచన చిత్తే చకాస్తు మే లీలా || 177 ||
పుష్పంధయరుచివేణ్యః
పులినాభోగత్రపాకరశ్రేణ్యః |
జీయాసురిక్షుపాణ్యః
కాశ్చన కామారికేలిసాక్షిణ్యః || 178 ||
తపనీయాంశుకభాంసి
ద్రాక్షామాధుర్యనాస్తికవచాంసి |
కతిచన శుచం మహాంసి
క్షపయతు కపాలితోషితమనాంసి || 179 ||
అసితకచమాయతాక్షం
కుసుమశరం కూలముద్వహకృపార్ద్రం |
ఆదిమరసాధిదైవత-
-మంతః కలయే హరాంకవాసి మహః || 180 ||
కర్ణోపాంతతరంగిత-
-కటాక్షవిస్పందికంఠదఘ్నకృపాం |
కామేశ్వరాంకనిలయాం
కామపి విద్యాం పురాతనీం కలయే || 181 ||
అరవిందకాంత్యరుంతుద-
-విలోచనద్వంద్వసుందరముఖేందు |
ఛందః కందలమందిర-
-మంతఃపురమైందుశేఖరం వందే || 182 ||
బింబినికురంబడంబర-
-విడంబకచ్ఛాయమంబరవలగ్నం |
కంబుగలమంబుదకుచం
బింబోకం కమపి చుంబతు మనో మే || 183 ||
కమపి కమనీయరూపం
కలయాంయంతః కదంబకుసుమాఢ్యం |
చంపకరుచిరసువేషైః
సంపాదితకాంత్యలంకృతదిగంతం || 184 ||
శంపారుచిభర-
-గర్హాసంపాదకకాంతికవచితదిగంతం |
సిద్ధాంతం నిగమానాం
శుద్ధాంతం కిమపి శూలినః కలయే || 185 ||
ఉద్యద్దినకరశోణా-
-నుత్పలబంధుస్తనంధయాపీడాన్ |
కరకలితపుండ్రచాపా-
-న్కలయే కానపి కపర్దినః ప్రాణాన్ || 186 ||
రశనాలసజ్జఘనయా
రసనాజీవాతుచాపభాసురయా |
ఘ్రాణాయుష్కరశరయా
ఘ్రాతం చిత్తం కయాపి వాసనయా || 187 ||
సరసిజసహయుధ్వదృశా
శంపాలతికాసనాభివిగ్రహయా |
భాసా కయాపి చేతో
నాసామణిశోభివదనయా భరితం || 188 ||
నవయావకాభసిచయాన్వితయా
గజయానయా దయాపరయా |
ధృతయామినీశకలయా
ధియా కయాపి క్షతామయా హి వయం || 189 ||
అలమలమకుసుమబాణై-
-రబింబశోణైరపుండ్రకోదండైః |
అకుముదబాంధవచూడై-
-రన్యైరిహ జగతి దైవతం మన్యైః || 190 ||
కువలయసదృక్షనయనైః
కులగిరికూటస్థబంధుకుచభారైః |
కరుణాస్పందికటాక్షైః
కవచితచిత్తోఽస్మి కతిపయైః కుతుకైః || 191 ||
నతజనసులభాయ నమో
నాలీకసనాభిలోచనాయ నమః |
నందితగిరిశాయ నమో
మహసే నవనీపపాటలాయ నమః || 192 ||
కాదంబకుసుమదాంనే
కాయచ్ఛాయాకణాయితార్యంణే |
సీంనే చిరంతనగిరాం
భూంనే కస్మైచిదాదదే ప్రణతిం || 193 ||
కుటిలకబరీభరేభ్యః
కుంకుమసబ్రహ్మచారికిరణేభ్యః |
కూలంకషస్తనేభ్యః
కుర్మః ప్రణతిం కులాద్రికుతుకేభ్యః || 194 ||
కోకనదశోణచరణా-
-త్కోమలకురలాలివిజితశైవాలాత్ |
ఉత్పలసగంధినయనా-
-దురరీకుర్మో న దేవతమాన్యాం || 195 ||
ఆపాటలాధరాణా-
-మానీలస్నిగ్ధబర్బరకచానాం |
ఆంనాయజీవనానా-
-మాకూతానాం హరస్య దాసోఽహం || 196 ||
పుంఖితవిలాసహాస-
-స్ఫురితాసు పురాహితాంకనిలయాసు |
మగ్నం మనో మదీయం
కాస్వపి కామారిజీవనాడీషు || 197 ||
లలితా పాతు శిరో మే
లలాటమంబా చ మధుమతీరూపా |
భ్రూయుగ్మం చ భవానీ
పుష్పశరా పాతు లోచనద్వంద్వం || 198 ||
పాయాన్నాసాం బాలా
సుభగా దంతాంశ్చ సుందరీ జిహ్వాం |
అధరోష్ఠమాదిశక్తి-
-శ్చక్రేశీ పాతు మే చిరం చిబుకం || 199 ||
కామేశ్వరీ చ కర్ణౌ
కామాక్షీ పాతు గండయోర్యుగలం |
శృంగారనాయికావ్యా-
-ద్వదనం సింహాసనేశ్వరీ చ గలం || 200 ||
స్కందప్రసూశ్చ పాతు
స్కంధౌ బాహూ చ పాటలాంగీ మే |
పాణీ చ పద్మనిలయా
పాయాదనిశం నఖావలీర్విజయా || 201 ||
కోదండినీ చ వక్షః
కుక్షిం చావ్యాత్ కులాచలతనూజా |
కల్యాణీ చ వలగ్నం
కటిం చ పాయాత్కలాధరశిఖండా || 202 ||
ఊరుద్వయం చ పాయా-
-దుమా మృడానీ చ జానునీ రక్షేత్ |
జంఘే చ షోడశీ మే
పాయాత్ పాదౌ చ పాశసృణిహస్తా || 203 ||
ప్రాతః పాతు పరా మాం
మధ్యాహ్నే పాతు మణిగృహాధీశా |
శర్వాణ్యవతు చ సాయం
పాయాద్రాత్రౌ చ భైరవీ సాక్షాత్ || 204 ||
భార్యాం రక్షతు గౌరీం
పాయాత్ పుత్రాంశ్చ బిందుగృహపీఠా |
శ్రీవిద్యా చ యశో మే
శీలం చావ్యాచ్చిరం మహారాజ్ఞీ || 205 ||
పవనమయి పావకమయి
క్షోణీమయి గగనమయి కృపీటమయి |
రవిమయి శశిమయి దిఙ్మయి
సమయమయి ప్రాణమయి శివే పాహి || 206 ||
కాలి కపాలిని శూలిని
భైరవి మాతంగి పంచమి త్రిపురే |
వాగ్దేవి వింధ్యవాసిని
బాలే భువనేశి పాలయ చిరం మాం || 207 ||
అభినవసిందూరాభా-
-మంబ త్వాం చింతయంతి యే హృదయే |
ఉపరి నిపతంతి తేషా-
-ముత్పలనయనాకటాక్షకల్లోలాః || 208 ||
వర్గాష్టకమిలితాభి-
-ర్వశినీముఖ్యాభిరావృతాం భవతీం |
చింతయతాం సితవర్ణాం
వాచో నిర్యాంత్యయత్నతో వదనాత్ || 209 ||
కనకశలాకాగౌరీం
కర్ణవ్యాలోలకుండలద్వితయాం |
ప్రహసితముఖీం చ భవతీం
ధ్యాయంతో యే త ఏవ భూధనదాః || 210 ||
శీర్షాంభోరుహమధ్యే
శీతలపీయూషవర్షిణీం భవతీం |
అనుదినమనుచింతయతా-
-మాయుష్యం భవతి పుష్కలమవన్యాం || 211 ||
మధురస్మితాం మదారుణనయనాం
మాతంగకుంభవక్షోజాం |
చంద్రవతంసినీం త్వాం
సవిధే పశ్యంతి సుకృతినః కేచిత్ || 212 ||
లలితాయాః స్తవరత్నం
లలితపదాభిః ప్రణీతమార్యాభిః |
ప్రతిదినమవనౌ పఠతాం
ఫలాని వక్తుం ప్రగల్భతే సైవ || 213 ||
సదసదనుగ్రహనిగ్రహ-
-గృహీతమునివిగ్రహో భగవాన్ |
సర్వాసాముపనిషదాం
దుర్వాసా జయతి దేశికః ప్రథమః || 214 ||
ఇతి మహర్షిదుర్వాసః విరచితం శ్రీలలితాస్తవరత్నం |