రామానుజాయ మునయే నమ ఉక్తి మాత్రం
కామాతురోఽపి కుమతిః కలయన్నభీక్షం |
యామామనన్తి యమినాం భగవజ్జనానాం
తామేవ విందతి గతిం తమసః పరస్తాత్ || 1 ||
సోమావచూడసురశేఖరదుష్కరేణ
కామాతిగోఽపి తపసా క్షపయన్నఘాని |
రామానుజాయ మునయే నమ ఇత్యనుక్త్వా
కోవా మహీసహచరే కురుతేఽనురాగం || 2 ||
రామానుజాయ నమ ఇత్యసకృద్గృణీతే
యో మాన మాత్సర మదస్మర దూషితోఽపి |
ప్రేమాతురః ప్రియతమామపహాయ పద్మాం
భూమా భుజంగశయనస్తమనుప్రయాతి || 3 ||
వామాలకానయనవాగురికాగృహీతం
క్షేమాయ కించిదపి కర్తుమనీహమానం |
రామానుజో యతిపతిర్యది నేక్షతే మాం
మా మామకోఽయమితి ముంచతి మాధవోఽపి || 4 ||
రామానుజేతి యదితం విదితం జగత్యాం
నామీపి న శ్రుతిసమీపముపైతి యేషాం |
మా మా మదీయ ఇతి సద్భిరుపేక్షితాస్తే
కామానువిద్ధమనసో నిపతన్త్యధోఽధః || 5 ||
నామానుకీర్త్య నరకార్తిహరం యదీయం
వ్యోమాధిరోహతి పదం సకలోఽపి లోకః |
రామానుజో యతిపతిర్యది నావిరాసీత్
కో మాదృశః ప్రభవితా భవముత్తరీతుం || 6 ||
సీమామహీధ్రపరిధిం పృథివీమవాప్తుం
వైమానికేశ్వరపురీమధివాసితుం వా |
వ్యోమాధిరోఢుమపి న స్పృహయన్తి నిత్యం
రామానుజాంఘ్రియుగళం శరణం ప్రపన్నాః || 7 ||
మా మా ధునోతి మనసోఽపి న గోచరం యత్
భూమాసఖేన పురుషేణ సహానుభూయ |
ప్రేమానువిద్ధహృదయప్రియభక్తలభ్యే
రామానుజాంఘ్రికమలే రమతాం మనో మే || 8 ||
శ్లోకాష్టకమిదం పుణ్యం యో భక్త్యా ప్రత్యహం పఠేత్ |
ఆకారత్రయసంపన్నః శోకాబ్ధిం తరతి ద్రుతం ||